Read Tupuri JERMI 30 Bible Online

JERMI 30 - Tupuri bible

JERMI 30

¹Manwur raw waçaç waçaçre ne Jermi do kay nono gano:

²Manwuri, Baa ma Israyel waçaç gano: Yer waçaçre maga ndi hay waçaç ra ne ndo mo äuy wo go äil kefdere.

³Ko ga wur yañ le age day ndi fer ge jar Israyel wo de jar Juda, jar äi maga wo wo go ti dañgay wo yañ le, waçaçn diñ Manwuri. Ndi fer ge ra yañ le äil sir maga ndi hay haçn go ne paçaçre äaara wo mono, day saara yaçaçn ge yañ go.

⁴Mokay diñ waçaçre maga Manwur waçaçn ti Israyel wo de Juda mono:

⁵Manwur waçaç gano: Wuur de laa sug war ree wo. AÀ diñ heçeçne de caa jare, bay diñ jam wa.

⁶Wië wee jag jare, day ko wee ëala, je twar biñ mbe yawla? Day wer mayse ga werpiiri wo go de laa do sag äuy do waçy maga äil äe de le'ge äe no lay la? Wer mayse ga nen jar äuy baë wo go la?

⁷AÀ diñ ree! Wur sen diñ wur ma kluu, ma tigriñ bay dosen no wa so hase! AÀ diñ wur lawge mani Jakob no, ama aà yaçaç yañ mbe go.

⁸Ti wur sen mono, ndi hrag ge jug äe ma de äo'ge mo soolen yañ go, ndi we' ge geyam ma de mbarge ne ndon wo yañ go day waaren kol ge wo ndo go gebe äaara gaa so hase. Kay diñ jag Manwuri.

⁹A joñ ge wo peele yañ ne Manwuri, Baa äaara no, ne Dafid wañ äaara maga ndi ban ge ne hara mono.

¹⁰Day ndo Jakob weejoçoç äin mono, joñ heçeçne wa. Kay diñ jag Manwuri. Israyele, daë wa! Gahaçyla ndi yaçaç ge ndo yañ le go do sir ma haçaç no, ndi yaçaç ge wer mani äon wo yañ go do jar sir maga aà wo wo go de hoo ge ni mono. Jakob fer ge wo yañ le. Äil äaara joñ ge yañ go feh ti iggi wo de lagge go flaçy no, day je ma age duë rage joñ ge gaa so hase.

¹¹Gahaçyla ndi yañ de äo ma yaçaç ndo go. Kay diñ jag Manwuri. Ndi taw ge wer jar maga ndi hay dus nday wo go yoo äaara wo go äuy, ama ma äay ndi taw ge nday go gaè. Ndi liñ gi ndo yañ ti faage äe ndi men ge mbe ndo go do je ma bay ree ti tu gaè.

¹²Manwur waçaç gano: Ree ma de caa mogen diñ ma taw ndo go, waçaçge äonkol joñre go.

¹³Jobo bay yaçaç ree äo see äe ma sa' waçaçge äon wa, sañgu noga guurkoo ma ruggi äe bay wa lay.

¹⁴Jar maga hay wo da ndo yoçoç wo ti go ti äo, aà bay wo kië ndo wa so hase werga ndi hay mbar ndo go do je hee äo nono, ndi hay raw wuu liñ ndo wer ngaäa seele äo ma bay blam wo no, wer kluu älagge äon wo.

¹⁵Wer mayse ga ndo law see äo ti ree ma de caa ndon noga ti ceege äo maga bay go men ndo wa la? Ndi joñ ndo do kay no na wer ngaäa seele äo ma bay blamn wo, wer kluu älagge äo no.

¹⁶Diñ wersen so ga jar maga lor wo ndo mo äuy no, aè lor ge ra yañ go lay jar hee äon wo äuy raw ge wo yañ ti dañgay lay. Jar maga äo' wo coo äo go mono, aè äo' ge coo äaara go lay. Jar maga frum wo ndo go mono, ndi haç ge ra yañ go ma frumgi lay.

¹⁷Gahaçyla, ndi peçeç ge ndo yañ go, ndi rug gi waçaçge äon wo yañ go. Kay diñ jag Manwuri. Wer maga aà ëe wo ndo ga waçy maga aè nii go, ga Siyoñ maga jobo bay de ree äe wa so has mono,

¹⁸Manwur waçaç gano: Ko wee ga ndi le de fer jar dañgay ma ti wer mani Jakobn wo le liñ, ngeel hayle äen ko wo decoo nen äi. AÈ fer yañ boo äi leegen ti tabul äe, aè fer yañ boor tiñ ma de woren wo ti ngeel äaara do maga aà hay wo nono.

¹⁹Jar 'wad ge wo siñ ma joñ suse' yañ yoo äaara, 'wad ge wo siñ few wo yañ. Ndi tes ge ra yañ, day ngaäa äaara fer ge go gesiñ gaa so hase. Ndi woo ge ra yañ day jobo mbuë gi fuy äaara gaa so has lay.

²⁰Jar ma ti wer mani Jakob joñ ge wo do ma ti wurpon nono, tayge äaara joñ ge yañ tum ëegeë pel äi day ndi ur gi yañ de jar joñ bon äaara wo.

²¹Wañ äaaran naa ge na yoo äaara ni tu, je waçaç ree äaaran kal ge mbe le go na yoo äaara tu. Ndi ya'n ge yañ le day se raw ge yañ le see äi. Gahaçyla wose sen ge yoo äay ga haç see äe de see äe tu ga se ya' le see äi na diñ wosela? Kay diñ jag Manwuri.

²²Nday joñ ge diñ jar äi, day ndi joñ ge diñ Baa äay no.

²³Ko wee soçoçge äil mani Manwur ma do degurleegen le de urgi, leege baan le go de tog eegre äe, aà de fidgi, de kii ti jar debaycoçoçren wo.

²⁴Bage poçoç ma de haçaç mani Manwurn ham ge jag gaa say se aà jag ëiggi äe go, tawn go ëa. Ti wur ma blam mono, nday joñ ge yañ de ti ngeel ma laa wer äe.