Read Tupuri MISE 6 Bible Online

MISE 6 - Tupuri bible

MISE 6

¹Laa wee fen maga Manwur waçaçn so: Ur go ciñ ma woge ti kiida pel huuli wo, Day ngeel ma de farge ciñ mo laa wo geçeçge äo!

²Nday huulin wo, nday dog tamsir ma tum wo no, Laa wee ree kiida mani Manwur no! Gahaçyla Manwur yañ de ree kiida de jar mani äen wo, AÀ da yiñ kiida de Israyel wo.

³Nday jar äi no, ndi hay joñ nday de mayla? Ndi hay gay nday de mayla? Yiñ wee jag ne ndi ëala!

⁴Gahaçyla ndi hay laa nday le go äil sir Ejipte, Ndi hay yaçaç nday le go jag gebe no, Day ndi raw laa Moyis, AÈron wo de Mariyam ne nday pele.

⁵Nday jar mani äi no, fer wee ëig ti ti fen maga Balag wañ Mowab hay ëig ne, Ti fen maga Balaam je ni Beworn hayn fern ne hen mo ëala. Ëig wee ti ti maga nday hoo le Sitim haçaç nday a go Gilgal mono, Nen maga nday mo ko de el maga Manwur joñ ra see jar mono.

⁶Ndi wo ge ooge pel Manwur noga ndi le' ge mondra pel Baa ma ciñ haçaç na de mayse do la? Ndi wo ge ooge pel äe na de siigi jag maga aè roë mo äen go äuy mo yaw, Noga de weere dere ma kiñgi boñ boñ wo do yawla?

⁷Manwur yaçaç ge mbe do äi yañ de gamlaare ma ngaäan wo, Noga de noo maga yuu do pyewre wo no mo yawla? Ndi haç ge jag weel äin go ti debaycoçoçre äi no Noga mbarga ma de äil äin go ti älagge äin yawla?

⁸O ndo je tabay no, aè hay kañ nen äo we ti fen ma de el no. Fen maga Manwur wiin do äo diñ ga ndo mo joñ fen ma de deele, Ndo mo da diñ fen ma ti faage äe no Day ni ndo mo fer ti äo gesiñ pel Manwur ti seele äo no.

⁹Geçeçge Manwur wo de 'waa äay ne äi leege no, Day je ma de ko reen diñ je maga heçeç ëu äen mono. Co' wee sug ree bonn wo de je maga äo'n le mono!

¹⁰Horog hram po noga mundore ma klee ma joñ nen jar de hram po Yañ mbe wo liñ ni je hram ëa pa yawla?

¹¹Ndi joñ ge mbi yañ bay cerge de maga ndi de mo ma far klew hram do äi, Noga de klew ma jaçë jarn äil ndar äin mo yawla?

¹²Jar horog ma äi leegen wo go de bag äil de koñne äil no. Jar ma äil äen car wo diñ gete' sagsage, Trum äaara le äil jag äaara jaçë diñ jar jaçëge tawa tu.

¹³Diñ wersen ndi kañ ge bon yañ mo ti, Ndi älag ge ndo yañ go wer älagge äon wo.

¹⁴Ndo ree ge yañ day ndo wuu gi gaa, Day sen mokay preçd ge äiiri yañ mo. Fen maga ndo da ëogge äe ëog ge do äo gaè. Fen maga ndo laa ge sen go ciñ ndi kañ ge moslam yañ go ne hen ti.

¹⁵Ndo, ndo jo' ge yañ, day ndo ween ge gaè. Ndo, ndo haçaç ge le'ge koo Olifiye yañ ti haçw, Day ndo yuu gi noo äe gaè. Ndo haçaç ge bii tlalum yañ, Day ndo joo ge yii äe ma de le'gen jag äo gaè.

¹⁶AÈ de lagge na diñ ti jag liñgi ma de yerge mani Omrin wo, Ti faage seele ma liñ ni Akabn äuy tu. Nday see na diñ ti bagge yañ äaaran wo. Diñ wersen ndi kañ ge wer äo yañ go tawge, Ndi kol ge jar ma äil äon wo yañ go diñ fen feg ti, Day soçoçre jar mani äin joñ ge na ti äay.