Read Tupuri 1 TESALONIG WO 4 Bible Online

1 TESALONIG WO 4 - Tupuri bible

1 TESALONIG WO 4

¹Ni pa mono heçeçre wuur no, nday yañ de laa waçaçre seele maga Baa fruy ti äe jag wuur go cwaçy doga nday de seege patala nono. Wuur de wii weege de kamge de ëu Yeso Wañkluu pa ga nday mo joñ wee nen ya' wer äe ciñ ni dañge.

²Nday yañ de ko hadge maga wuur hay had wee de äe ti jag Yeso Wañkluu mono.

³Fen maga äil Baa dan mokay diñ ga nday mo hay de el bay dage, nday mo ëaw see äay see joñge figliw no,

⁴ga wosela äuy yoo äay mo hay see waçy[1] äe diñ de faage ma bay ëag lay, bay jaçëge be lay,

⁵mo men ëiggi ma de älagge joñ blum äe do jar maga bay wo ti jag Baa wa no wa.

⁶Daga jobo mo joñ nen hen äe ti feçeçre noga joñ de hram see äe wa. Wuur hay yañ go de riñ weege ti sen de el celel ga Wañkluu joñ ge bon jar ma joñ älagge dosen wo nono äuy.

⁷Baa ëe naa le bay joñ ge diñ ree meyeëe wa, ama maga naa mo lag bay dage.

⁸Diñ wersen je maga tob hadge se kay we go, tob go diñ je tabay gaa, ama diñ Baa maga hay haç Nenterse äe ma bay ëagn wee mono.

⁹Ti waçaçre dage ma ti yoo heçeçrebe ma de haç äiln ne Yeson wo mono, sen bay maga aè yern wo wee yerge wa, werga nday de see äay Baa yañ go de had sen ne nday ga nday mo da kaçaçra ti yoo kaçaçra,

¹⁰day se diñ fen maga nday de joñge äe see heçeçre äay ma Masedwan wo mo äuy yaw no. AÀ ne wuur de wii nday heçeçre wuurn ga joñ wee nen ya' wer äe ciñ ni dañge.

¹¹Dur wee ga nday mo hay yoo kaçaçra jam, wosela äuy mo joñ nen joñre äen de see äe, maga se mo da' feçeçre reege äe de see äe doga wuur hay wii wee go nono.

¹²Sen na maga nday mo koë see äay de el see jar maga bay wo ti jag Baa wa mono, day nday mo lag nen do jobo wa lay.

¹³Heçeçre wuur no, wuur da ga nday mo hay reçwre ti waçaçre jar maga wo go de huli, day nday car jiili go do jar maga ëiggi äaara bay ti mopo me' wa no wa.

¹⁴Kidolgi, naa de haç äil naa ga Yeso Kris hay hu go, day fer birgi go ciñ tenene. Dosen naa de haç äil naa pa ga Baa fer yañ go bir jar maga huë wo de haç äil äaara yañ le go ciñ tenen de Yeso lay.

¹⁵Fen maga wuur de waçaçge äe go do hadge maga Wañkluu hay had nono gano: Wañkluu wo ge le ferge mokay, naa jar maga naa bay huli ëa, naa raw pel jar ma de hulin wo gaè.

¹⁶Go do maga aà go de ngaäge nono, aè laa ngar jag wañ jar peele Baa wo yañ de ro coçoç mani Baa no, day Wañkluu de see äe raw cwaage le gesiñ, jar maga hay huë wo go de haç äil äaara wer äe raw wo laage go ciñ tañgu.

¹⁷Blam sen naa maga naa bay huli ëa, naa raw hooge go ciñ de äaara äuy nen swaare ma woge yiñgi de Wañkluu wo nen leege, naa kal lagge äiñ Wañkluu ma tum.

¹⁸Coä wee nen kaçaçra de waçaçre se kayn wo no.