Read Tupuri 2 TESALONIG WO 1 Bible Online

2 TESALONIG WO 1 - Tupuri bible

2 TESALONIG WO 1

¹Waçaçre sen mokay, yern diñ wuur Pol, Silas wo de Timote. Wuur de äo'ge äe wo ne Tayge jar ma wer Kris ma Tesalonig no, ne nday jar maga Baa Pan naan wo de Yeso Kris Wañkluu kol wee go jar äaara mono.

²Daga Baa Paçaçbe wo de Yeso Kris Wañkluu mo woo wo nday, mo ëaw wo nday jam lay.

³Nday heçeçre wuur no, wuur joñ suse' ne Baa tum tum ti äay, day sen ti ngeel äe maga wuur mo joñ no lay, werga haçge äil äay ne Kris yañ go geçeçge ciñ ni debañ lay, dage äay maga nday de da kaçaçra de äe yañ yaëge ciñ ni tum tum lay.

⁴Diñ wersen wuur de mañ ti see wuur ciñ wer äay yoo Tayge jar ma wer Kris wo, wer maga nday de lagge de haç äil äay ne Kris ngiñ nen joñge coon wo de bon maga nday de joñge äe mono.

⁵Fen po yañ ni ma kañ nen go ti ree maga Baa cagn de deele mono. Wer gaali maga nday de soëge äe mo äuy no, nday kol ge go diñ jar ma de ëu ti twaywañ mani Baa no.

⁶Werga aà nen Baa ti ngeel äe de deele ga se mo joñ ge bon jar maga wo de ma joñ bon äay patalan lay,

⁷day se mo lag ge nday jar maga nday de ma joñ bon patala go iggi lag se wuur lay, ti wur maga Yeso Wañkluu naa ge nen le ciñ de jar peele Baa ma de eegren wo wer äe mono.

⁸AÀ a ge wo le nen wuu maga de yaçaçge deñ ma joñ bon jar maga bay wo de ko Baa wan wo de jar maga day wo yaçaç Waçaçre ma de Coçoçren mani Wañkluu naa Yeson gaa mono.

⁹Bon äaara maga aà da'n ge wo mono, diñ ga aà bas wo go haçaç tum. AÀ ko ge wo Wañkluu de nen äaara gaa has lay, ko wo eegre äe ma de togoëgen gaa lay,

¹⁰ti wur maga aà wo le ferge, go de togoëge ti holañ jar äe ma bay ëagn wo day jar ma de haç äil äaara ne hen sena'n ge wo lay mono. Jar sen wo na diñ nday tu, werga nday yaçaç waçaçre sedewa äe maga wuur siin wee mono.

¹¹Diñ wersen wuur de tos Baa tum tum ti äay ga aà mo kol wee de kaçaçge ti joñre maga aà ëe wee le ti äe mono. Wuur de wii Baa ga aà mo bag jag äil de el ben wo de joñre maga nday de joñge äe de haçge äil äay mo äuy go de eegre,

¹²maga jar mo togoë wo ëu Wañkluu naa Yeso wer äay, aè mo togoë wee wer äe lay, wer bil de el mani Baa naan wo de Yeso Kris Wañkluu no.