Read Tupuri 1 SAMYEL 21 Bible Online

1 SAMYEL 21 - Tupuri bible

1 SAMYEL 21

¹Dafid raw urgi, kal rawge. Jonatañ kal ferge le liñ lay.

²Dafid raw woge Nob see Ahimeleg je sië jag no. AÀ himeleg raw caa pel äe le de ëee caw daëge day wiin gano: Wer mayse ga ndo mbo boñ tu la? Je tigriñ bay wer äo ni wa has yawla?

³Dafid raw riñ Ahimeleg gano: Wañ haç jag le me day wii me ga jobo mo laa mopo ti fen maga se äo' me le ti äe mo wa lay, ti waçaçre maga ndi fern mo wa lay. Diñ wersen ndi go de ngaä ngeel yiñgi go ne weere joçoçre äin wo no kay no.

⁴Mayse baa do äo patala la? Haç hole peçeç me dwee noga fen maga sen do äo mono.

⁵Je sië jagn raw ferge ne Dafid gano: Hole ma tigriñ bay do äi wa, diñ maga sen wo go de laage ti nen sagsag ne Baa mo tawa no, hayga weere joçoçre äon bay wo de woge see naare wo wa an no.

⁶Dafid kal ferge ne je sië jagn gano: AÈ go de mañ jag wuur ti woge see naare wo do maga wuur hay mbe woge seäaa jag jaw nono. Feçeçre mani weere joçoçre äin wo go bay ëage, day aà mo hay ba ga seele wuurn la sara laybla' no, aà wo go wara bay ëag ti sen ëa.

⁷Do kay nono, je sië jagn raw haç hole peçeç maga go de laage ti nen sagsag ne Baa ne hene werga hole ma tigriñ hay bay ni wa, hay tawa diñ maga aà hoon le go pel Manwuri day aè hay coon de ma de wuu ti wur maga aà hoon le go mono.

⁸Paga ti wur sen ni aè hay we de dig jobo pel Manwur yoo weere joçoçre Sawuln wo ni. Je sen hay diñ Doyeg maga hay diñ je kluu ma yoo jar koë horog mani Sawuln wo mono.

⁹Dafid kal wii Ahimeleg gano: Manjaw po noga moslam po bay do äo wa yawla? Ndi mañ moslam äin le do gaa lay, ndi hoo feçeçre durgi äin wo le do gaa lay werga ree peele mani wañn hay naa ndi go do rus debañ.

¹⁰Je sië jag kal ferge ne hen gano: Moslam mani Goliyad je Filisteçeç maga ndo hay iin le go äil log ma Elan yañ la. AÀ yañ wo de kuugi de oçoçbe wo de heege faale efod no. Hayga ndo da we ga ndo mañn no, ni ndo mañn mbo werga ma tigriñ bay la wa so. Dafid kal gano: Te ma dosen nono da' ga, haçn mbo me.

¹¹Dafid kal urgi go ciñ, raw dañge wo go do Sawul ti wur sen ni tu. Se raw woge ni Akis wañ Gade.

¹²Weere joçoçre mani Akis raw wo riñgi äe gana: Äa lam na bay diñ Dafid wañ ma äil sirn wa ge? A mo na bay diñ je maga aè hay 'waa siñ ne hen ti ga: Sawul ii weräaara ndare, Dafid ii ndar hwal lay mo wa ge?

¹³Dafid raw kañ ti ti waçaçre sen wo, day se raw caa heçeçne go debañ do Akis wañ Gade.

¹⁴Se raw joñ see äe go do je loëge pel äaara ni, joñ mbe feçeçre wo go haçyhaçy yoo äaara, klir feçeçre go see jag tiñ wo, srew saçaçre go ti piñ äe lay.

¹⁵Akis day wii weere joçoçre äen wo gana: Nday mbay go de koge ga blon go de loëge, wer mayse ga nday ban le me la?

¹⁶Coo jar loëge wo see äi nen maga nday baa ma deñn le me ma joñ feçeçre loëge äen wo pel äi la yawla? A mbe mo deñ ma kalge le me liñ yawla?