Read Te Tusi Tapu I Te Gana Tuvalu Lomiga Lua KENESE 1 Bible Online

KENESE 1 - Te Tusi Tapu I Te Gana Tuvalu Lomiga Lua bible

KENESE 1

¹I te kamataga o te faitega ne te Atua te lagi mo te lalolagi, [1]

²a te lalolagi e seki ai. A te vai tela e ufi ei mea katoa e pouli tagataga, ka ko te 'mana o te Atua [2]e fano i luga i te vai.

³ Ne fai te fakatonuga a te Atua penei, “Ke maina”—te mea loa ko fanaka te mainaga.

⁴Ne fiafia te Atua i te mea ne lavea ne ia, tena, vae ei ne ia te mainaga mo te pouliga,

⁵kae fakaigoa ne ia te mainaga ko te “Ao” ka ko te pouliga ko te “Po.” Ne teka atu te po tena kae oko mai te taeao — ko te aso muamua tena.

⁶ Ne toe fakatonu atu te Atua penei, “Ke isi se vanimonimo e 'vae ei te vai ki vaega e lua.” Ko te mea loa ko isi. Tena, faite ei ne te Atua te vanimonimo, tela e vaelua ei te vai i tena feitu ki lalo mo tena feitu ki luga.

⁸Ne fakaigoa ne ia te vanimonimo tena ko te “Lagi.” Ne teka atu te po tena kae oko mai te taeao ko te lua o aso tena.

⁹Ne toe fakatonu atu te Atua penei, “A te vai i te feitu ki lalo o te lagi ke maopoopo ki se koga e tasi, ko te mea ke sae aka te laukele” te mea loa ko pena.

¹⁰Ne fakaigoa ne ia te laukele ko te “Lalolagi” ka ko te vai tela ko mavae atu keatea mo te laukele ne fakaigoa ne ia ko te “Tai”. Ne kilo atu ki ei te Atua, fiafia ei a ia.

¹¹Tena, toe fakatonu atu a ia penei, “Ke 'tupu mai a vaega lakau kaina valevale i te laukele, ko lakau kola e fua i lalo o te laukele mo lakau kola e fua i luga.”

¹²Tela ne fua mai ei i te lalolagi a vaega lakau kaina valevale, ne kilo atu ki ei te Atua, fiafia ei a ia.

¹³Ne teka atu te po kae oko mai te taeao ko te tolu o aso tena.

¹⁴Ne toe fakatonu atu te Atua penei, “Ke isi ne mea fakamaina i te lagi ke faka kese ei te ao mai te po kae ke fakasino foki ki ei te taimi e kamata ei a aso, tausaga, mo tau o te tausaga;[3]

¹⁵ka maina latou i te lagi o fakamaina te lalolagi” ko te mea eiloa ko fai pena.

¹⁶Tela ne faite ei ne te Atua a mea fakamaina 'lasi e lua, ko te la ke pule i te ao, ka ko te masina ke pule i te po; ne faite foki ne ia a fetu.

¹⁷Ne fakatulaga ne ia a mea fakamaina kona i te lagi ke maina ki luga i te lalolagi,

¹⁸ke pule i te ao mo te po, kae ke faka'kese foki ei te mainaga mai te pouliga. Ne kilo atu ki ei te Atua, tela fiafia ei a ia.

¹⁹Ne teka atu te po tena kae oko mai te taeao ko te fa o aso tena.

²⁰Ne toe fakatonu atu te Atua penei, “Ke 'fonu a vai i vaegā mea ola valevale, ka ko te vanimonimo ke 'fonu i manu eva.”

²¹Tela ne faite ei ne te Atua a manu fakama'taku o te tai, mo vaega mea ola katoa kola e ola i te vai, mo vaega manueva katoa. Ne kilo atu ki ei te Atua, fiafia ei a ia.

²²Ne fakamanuia katoa ne ia kae fai atu ki mea ola katoa kola e 'nofo i te vai ke fanafanau, kae faka'fonu te tai, kae fai atu ki manu eva ke fanafanau.

²³Ne teka atu te po tena kae oko mai te taeao ko te lima o aso tena.

²⁴Ne toe fakatonu atu te Atua penei, “Ke ola mai i te laukele a vaega manu valevale: ko manu 'lata mo manu vao, manu 'lasi mo manu foniki”— ko te mea eiloa ko fai pena.

²⁵Tela ne faite ei katoa ne te Atua, kae kilokilo atu a ia mo te fiafia ki ana mea ne faite.

²⁶Tela, muna a te Atua, “Ka faite nei ne tatou a tino, ke foliga ki a tatou. Ka pule latou i ika, i manu eva, mo manu vaefa katoa, manu lata mo manu vao,[4] manu lasi mo manu foliki.”

²⁷ Tela ne faite ei ne te Atua a te tino ke foliga ki a ia. Ne faite ne ia te tagata mo te fafine,

²⁸fakamanuia atu ne ia, kae fai atu ki ei penei, “Fakatokouke otou tamaliki, ko te mea ko otou fanau ke 'nofo i te lalolagi kae pule i ei. Ko tuku atu ne au ki a koutou te pule i luga i ika, manu eva, mo manu vaefa katoa.

²⁹Ko oti ne fakatoka ne au a vaega saito mo lakau pela mo saito, mo vaegā lakau fai fuaga lakau mo otou 'kai;

³⁰ka ko manu vae fa katoa mo manu eva, ko oti ne fakatoka ne au a mouku mo lakau lau 'lei mo olotou 'kai.” Ko te mea eiloa ko pena.

³¹Ne kilo atu te Atua ki ana mea katoa ne faite, fiafia malosi eiloa a ia. Ne teka atu te po tena kae oko mai te taeao ko te ono o aso tena.