Read Te Tusi Tapu I Te Gana Tuvalu Lomiga Lua KENESE 11 Bible Online

KENESE 11 - Te Tusi Tapu I Te Gana Tuvalu Lomiga Lua bible

KENESE 11

¹Muamua eiloa, a tino katoa i te lalolagi e fai'pati katoa ki te 'gana e tasi.

²I olotou oloolo salega i te saegala, ne oko atu latou ki se kogā laukele laugatasi i Papelonia, nofo tumau ei latou i kona.

³Ne faipati ake latou penei, “O'mai i tatou ka faite a puliki kae tao ke ma'keke.” Tela ne maua ei olotou puliki, e pela foki mo kolota e fakapiki tasi ei a puliki.

⁴Ne fai ake latou penei, “O'mai i tatou ka faite se fa'kai mo tena taoa ke oko ki te lagi, ko te mea ke takutakua tatou, kae ke se salalau valevale tatou i te lalolagi.”

⁵Tena ne fanaifo ei te Aliki o onoono ki te fa'kai mo te taoa tela ne faite ne tagata kona,

⁶kae fai aka mo ana muna penei, “Kiloke, a latou se fenua e tasi kae fai'pati ki te gana e tasi; mea nei ko te kamataga fua o te mea ka fai ne latou. Ko pili nei kae ka mafai o fai ne latou so se mea e ma'nako latou o fai!

⁷Tatou ka olo ifo o faka'numi aka te lotou gana ko te mea ke se malamalama sua tino i pati a sua tino.”

⁸Tela ne fakasalalau atu ei latou ne te Aliki i te lalolagi, ko te mea eiloa ko gata te faitega o te fa'kai.

⁹Ne fakaigoa te fa'kai tena ko Papelonia,[29] me ne faka'numi ne te Aliki i kona te gana a tino katoa, kae fakasalalau atu latou ki koga kesekese o te lalolagi.

¹⁰Tenei te fakasologa o te gafa o Semu. E tusa mo te 100 tausaga o Semu kae fai tena tama tagata tela ko Apasata; ka ko tusa mo te lua tausaga mai tua ifo o te lofiaga.

¹¹Mai te taimi tena, ne ola atu eiloa Semu i nisi tausaga e 500, kae isi foki ne ana nisi tamaliki fakamuli ifo.

¹²E tusa mo te 35 tausaga o Apasata, kae fai tena tama tagata, ko Seela.

¹³Mai tua ifo, ne ola atu eiloa a ia i nisi tausaga e 500. Kae isi foki ne ana nisi tamaliki fakamuli ifo.

¹⁴E tusa mo te 30 tausaga o Seela kae fai tena tamaliki tagata, ko Epela;

¹⁵kae mai tua ifo ne ola atu eiloa a ia i nisi tausaga e 403, kae isi foki ne ana nisi tamaliki fakamuli ifo.

¹⁶E tusa mo te 34 tausaga o Epela, kae fai tena tamaliki tagata, ko Peleka;

¹⁷kae mai tua ifo ne ola atu eiloa a ia i nisi tausaga e 430, kae isi foki ne ana nisi tamaliki fakamuli ifo.

¹⁸E tusa mo te 30 tausaga o Peleka kae fai tena tamaliki tagata ko Leu;

¹⁹kae mai tua ifo, ne ola atu eiloa a ia i nisi tausaga e 209, kae isi aka foki ne ana nisi tamaliki fakamuli ifo.

²⁰E tusa mo te 32 tausaga o Leu kae fai tena tamaliki tagata, ko Seluka;

²¹kae mai tua ifo, ne ola atu eiloa a ia i nisi tausaga e 207, kae isi aka foki ne ana nisi tamaliki fakamuli ifo.

²²E tusa mo 30 tausaga o Seluka kae fai tena tamaliki tagata ko Nakoli;

²³kae mai tua ifo, ne ola atu eiloa a ia i nisi tausaga e 200, kae isi aka foki ne ana nisi tamaliki fakamuli ifo.

²⁴E tusa mo te 29 tausaga o Nakoli kae fai tena tamaliki tagata ko Tala;

²⁵kae mai tua ifo ne ola atu eiloa a ia i nisi tausaga e 119, kae isi foki ne ana nisi tamaliki fakamuli ifo.

²⁶E tusa mo te 70 tausaga o Tala kae fai ana tamaliki tagata ko Apelamo, ko Nakoli mo Halana.

²⁷Tenei te fakasologa o te gafa o Tala, te tamana o Apelamo, Nakoli mo Halana. Halana ko te tamana o Lota.

²⁸A Halana ne mate i tena fa'kai tonu eiloa tela ko Ulo i Papelonia, ka ko tena tamana i ei koi ola eiloa.

²⁹A Apelamo ne avaga ki a Salai, ka ko Nakoli ne avaga ki a Milika, te tama fafine a Halana. A Halana ko te tamana foki o Isika,

³⁰ka ko Salai e se fanau.

³¹A Tala ne malaga atu mai Ulo i Papelonia o fano ki te fenua o Kanana fakatasi mo Apelamo mo tena mokopuna ko Lota, te tama tagata a Halana, mo Salai, te avaga a Apelamo. Ne oko atu latou ki Halana, nofo eiloa i kona.

³²I kona eiloa ne mate ei a Tala, ka ko tusa mo te 205 tausaga o tena olaga.