Read Te Tusi Tapu I Te Gana Tuvalu Lomiga Lua KENESE 12 Bible Online

KENESE 12 - Te Tusi Tapu I Te Gana Tuvalu Lomiga Lua bible

KENESE 12

¹Muna te Aliki ki a Apelamo, " Tiakina a tou fenua, mo te fale o tou tamana, kae fano ki te fenua tela ka fakasino atu ne au kia a koe .

²Ka fakatokouke ne au tou gafa kae ka fai mo Malo lasi. Ka fakamanuia ne au a koe, ka ko tou igoa ka takutakua, kae ka manuia a tino i a koe.

³ Ka fakamanuia ne au a latou kola e fakamanuia atu ki a koe. Kae fakamalaia ne au a latou kola e fakamalaia atu ki a koe. Ka fakamanuia ne au a malo e auala i a koe.[30]”

⁴E tusa mo te 75 tausaga o Apelamo kae tiakina ne ia Halana e pela eiloa mo te fakatonuga a te Aliki ki a ia. A Lota ne olo tasi mo ia.

⁵Ne puke ne Apelamo tena avaga ko Salai, tena tuatina ko Lota, mo koloa, mo pologa katoa kola ne maua ne latou i Halana, kamata eiloa te lotou malaga ki te fenua o Kanana. I te okoatuga a latou ki Kanana,

⁶ne fano Apelamo i loto i te fa'kai, oko atu eiloa ki te lakau tapu i Mole, te koga tapu tena i Sekema. I te taimi tena, a tino Kanana e nofo eiloa i te fenua.

⁷Ne fanatu te Aliki ki a Apelamo kae fai atu penei, “Tenei te fenua ka avatu ne au ki tou gafa.” Tena ne faite ei ne Apelamo se fata-fai-taulaga i kona, me i te Aliki ne fakaasi atu ki a ia.

⁸Fakamuli ifo, ne toe malaga atu a ia ki saute ki te fenua mauga i te feitu ki te saega la o Peteli, Ne faka'tu ana faleie i kona, i te va o Peteli i te toga la mo Ai i te saega la. I kona foki ne faite ne ia te fata-fai-taulaga kae tapuaki atu ki te Aliki.

⁹Ne malaga a ia mai sua koga ki sua koga, i tena auala ki te feitu ki saute o Kanana.

¹⁰Ne poko te oge i Kanana, kae ko oko eiloa te fai malosi, tela ne malaga atu ei a Apelamo ki Aikupito i saute, o nofo i kona i se taimi toetoe.

¹¹Kae koi tuai o oko atu a ia ki te tuakoi o Aikupito, ne fai atu a ia ki a Salai tena avaga penei, “A koe se fafine taulekaleka.

¹²Kafai e matea koe ne tino Aikupito, ka manatu aka latou i a koe ko taku avaga, tena ka tamate ei ne latou a au kae fakaola koe.

¹³Fai ki a latou i a koe ko toku tuagaene, me kafai e fai ne koe pena, ko au ka fai faka'lei ne latou ona ko koe.”

¹⁴I te okoatuga a latou ki Aikupito, ne matea eiloa ne tino Aikupito i tena avaga se fafine gali.

¹⁵E isi ne ofisa a te tupu ne matea ne latou a te avaga a Apelamo tela olo ei latou o fai ki te tupu i te gali o Salai. Tena, ne ave eiloa ne latou a ia ki te palesi o te tupu.

¹⁶Ne fai faka'lei ne te tupu a Apelamo ona eiloa ko Salai; ne tuku ne ia ki ei a lafu mamoe, kouti, pulumakau, asini, tavini mo kamela.

¹⁷Ne tuku ifo ne te Aliki a famai fakama'taku ki te tupu mo tino o tena palesi, me ne puke ne ia Salai.

¹⁸Ne uga te fekau a te tupu ki a Apelamo kae fesili atu penei ki a ia, “Se a te mea tenei ko fai ne koe ki a au? Ai a seki fakaasi mai ei ne koe i te fafine tenei ko tau avaga?

¹⁹Ai a ne fai ei koe pela i a ia ko tou tuagaene? Tena te mea ne puke ei ne au mo fai taku avaga. Puke nei tau avaga tenei, kae fano keatea mai konei!”

²⁰Ne fakatonu atu te tupu ki tena kau ke puke Apelamo o ave ki tua mo te fenua, fakatasi mo tena avaga mo ana mea totino katoa.