Read Te Tusi Tapu I Te Gana Tuvalu Lomiga Lua KENESE 13 Bible Online

KENESE 13 - Te Tusi Tapu I Te Gana Tuvalu Lomiga Lua bible

KENESE 13

¹I te tiakinaga ne Apelamo a te fenua o Aikupito, ne malaga atu a ia ki matu o fano ki te feitu ki saute o Kanana, fakatasi mo tena avaga, mo Lota mo ana kope katoa.

²A Apelamo se tagata maumea i mamoe, i kouti, i pulumakau, ke oko foki eiloa ki aulo mo siliva.

³Ne tiakina ne ia te koga tena, malaga atu ei a ia mai sua koga ki te sua koga o fano ki Peteli. Ne oko atu a ia ki te koga tela ne manava ei a ia i te va o Peteli mo Ai,

⁴te koga tela ne faite ei ne ia a te fata-fai-taulaga. I kona ne tapuaki atu ei a ia ki te Aliki.

⁵A Lota e isi foki ne ana mamoe, kouti mo pulumakau. E isi foki sena kaiga mo ana tavini.

⁶Tela la, ko se ofi ei laua i te laukele tela e nofo ei laua, me ko to uke la manu.

⁷Tela, tupu ei mo te fakakinauga i tino tausi manu a Apelamo mo tino tausi manu a Lota. I te taimi la tena, a tino Kanana mo tino Pelise koi nofo eiloa i te fenua tena.

⁸Tena ne fai atu ei a Apelamo ki a Lota penei, “A taua e kaiga, e se tau mo 'tou tino o faka'kinau.

⁹Tela la, taua ka mavae. Fili nei se koga koga i te fenua tenei e fano koe ki ei. Kafai e fano koe ki te sua koga, ka ko au ki te sua koga.”

¹⁰Ne kilo ake mata o Lota, matea ne ia i te kogā laukele katoa i te Vanu o Iolitana, ke oko eiloa ki Soala, e uke te vai i ei, pela eiloa mo te Fatoaga o te Aliki[31] io me ko te fenua o Aikupito. I te taimi nei, a Sotoma mo Komolo e seki fakamasei ne te Aliki.

¹¹Tela, fili ei ne Lota te kogā laukele katoa i te Vanu o Iolitana mo ona nofo, tena malaga atu ei a ia ki te saegala. E pena te ma'vaega o te tokolua kona.

¹²Ne nofo eiloa Apelamo i te fenua o Kanana, ka ko Lota e nofo i fa'kai i te vanu kae 'tu ana faleie pili ki Sotoma.

¹³A tino Sotoma e amio ma'sei kae agasala ki te Aliki.

¹⁴I te galoatuga o Lota, ne faipati atu te Aliki ki a Apelamo penei, “Mai te koga tena e tu ei koe, kilokilo faka'lei ki ou feitu katoa.

¹⁵Ka tuku atu ne au ki a koe mo tino i tou gafa a te laukele tena e lavea ne koe, kae ka fai mo ou tofi ki te se gata mai.

¹⁶Ka fakatokouke ne au tou gafa ko te mea ke se maua o lau, e pela eiloa mo te pefu o te lalolagi e se maua o lau!

¹⁷Fano nei o kilokilo fakalei ki te kogā laukele katoa tena me ka avatu katoa ne au ki a koe.”

¹⁸Tena ne malaga atu ei a Apelamo o fakatu ana faleie i tafa o te lakau taua o Mamele i Hepelona. I kona ne faite ei ne ia se fata-fai-taulaga ki te Aliki.