Read Te Tusi Tapu I Te Gana Tuvalu Lomiga Lua KENESE 15 Bible Online

KENESE 15 - Te Tusi Tapu I Te Gana Tuvalu Lomiga Lua bible

KENESE 15

¹I te otiga o mea kona, ne oko mai te fakaasiga mai i te Aliki ki a Apelamo, muna a ia penei, “Apelamo, sa mataku. Ka puipui ne au a koe mai fakalavelave, kae fakamanuia ne au a koe.”

²Ne tali atu Apelamo penei, “Te Aliki Maluga, se a te aoga o au fakamanuiaga ki a au me e seai ne aku tamaliki? Te tino tokotasi e maua ne ia aku mea mafai e mate au ko Eliesa o Tamaseko.

³E seai ne aku tamaliki ne aumai ne koe; ko taku tavini fua ka puke ma ia aku mea mafai e mate au.”

⁴Ne toe lagona ne ia a te Aliki e faipati atu ki a ia penei: “E se maua ne tau tavini ko Eliesa au mea; ko tau tama tonu eiloa ka maua ne ia au mea mafai e mate koe.”

⁵Ne taki a Apelamo ne te Aliki ki tua kae fai mai ki a ia penei, “Kilo ki te lagi, kae taumafai o lau a fetu kona i ei; ka pena te tokouke o tou gafa.”

⁶Ne talitonu Apelamo ki te Aliki, tela ne fiafia ei te Aliki ki a Apelamo kae talia ne ia.

⁷Tena ne muna mai ei te Aliki ki a ia penei, “Au ko te Aliki; ne taki mai ne au a koe mai Ulo i Papelonia, o tuku atu te fenua tenei ke fai mo ou tofi.”

⁸Kae ne fesili atu a Apelamo penei, “Te Aliki Maluga, e iloa pefea ne au me ka fai mo oku tofi a te laukele tenei?”

⁹Ne tali mai te Aliki penei, “Aumai ki a au se pulumakau, se kouti, mo se mamoe tagata e tau katoa o taki tolu olotou tausaga. Aumai foki se lupe mo se tamā lupe.”

¹⁰Ne aumai ne Apelamo ki te Atua a manu vae fa o katikati i laina e lua; ka ko manu eva e seki 'kati ne ia.

¹¹Ne olo ifo a manu eva fakamataku e igoa ki valatua, o kai a foitino o manu kona, kae ne atuli ne Apelamo keatea.

¹²I te toga o te la, ne to te moe o Apelamo, te mea eiloa ko oko atu ki a ia a te mataku.

¹³Muna a te Aliki ki a ia, “A au fanau ka nofo i se fenua fakaatea; ka fai latou mo pologa i te fenua tena, kae ka fakafi'tagina olotou olaga e tusa mo te fa selau tausaga.

¹⁴Kae ka fakasala eiloa ne au a te malo tela e fakapologa ne ia latou. Kafai ko tiakina ne latou te fenua tena, kae ka olo latou mo te koloa lasi o te fenua tena.

¹⁵A koe ka ola ki tou toeaina kae ka mate koe mo te filemu.

¹⁶Ka mavae atu te fa o tupulaga ko 'foki mai ei koutou ki konei, me ka se afuli ne au a tino Amoli ke oko eiloa ki te taimi e lasi ei te olotou agasala ko fakasala ei latou.”

¹⁷I te toga o te la, ka ko pouli foki, ne sae aka se au mo te afi i va o manu vaefa kola ne kati vaelua.

¹⁸I kona ne fai ei te feagaiga a te Aliki mo Apelamo, fai atu ei te Aliki penei, Au e tauto ke tuku atu ki tou gafa a te fenua katoa tenei mai te gataga o Aikupito ki te vaitafe o te Eufilate,

¹⁹fakatasi ei mo fenua o tino Keni, tino Kinasa, tino Katemoni,

²⁰tino Heti, tino Pelise, tino Lefaima,

²¹tino Amoli, tino Kanana, tino Kilikase mo tino Iepuse.