Read Te Tusi Tapu I Te Gana Tuvalu Lomiga Lua KENESE 17 Bible Online

KENESE 17 - Te Tusi Tapu I Te Gana Tuvalu Lomiga Lua bible

KENESE 17

¹I te katoaga o te iva sefulu iva tausaga o Apelamo, ne fakaasi atu te Atua ki a ia kae fai atu penei, “Au ko te Atua Tafasili i te Malosi. Fakalogo mai ki a au, kae fai faeloa te mea tonu.

²Ka fai taku feagaiga mo koe kae fakatokouke ne au tou gafa.”

³Ne ifo Apelamo ki lalo i te laukele, kae fai atu te Aliki ki a ia penei,

⁴“Ko fai ne au te feagaiga tenei mo koe: au e tauto me ka fai koe mo tupuga o malo e uke.

⁵Ka se toe taku tou igoa ko Apelamo, ka ko Apelaamo,[34] me ka fai ne au a koe mo tupuga o malo e uke.

⁶Ka fakatokouke ne au tou gafa, ka ko nisi o latou ka fai mo tupu. Ka tokouke malosi tou gafa tela ka nofo i malo e uke.

⁷“Ka tausi fakalei taku tautoga ki a koe e pela foki ki tou gafa i kautupu fakamuli ke fai mo feagaiga ki te se gata mai. Ka fai au mo ou Atua e pela foki mo tino katoa e tupu mai i a koe.

⁸Ka tuku atu ne au ki a koe mo tou gafa a te fenua tenei e nofo ei koe. A te fenua katoa o Kanana ka fai mo tofi o tou gafa ki te se gata mai, ka ko au ka fai mo Atua o latou.”

⁹Muna a te Atua ki a Apelaamo penei, “E tau foki mo koe o tausi te feagaiga a taua tenei, e pena foki tou gafa i kautama fakamuli.

¹⁰ A koe mo tino o tou gafa e tau katoa o talia ne latou ke pilitome a tagata katoa o koutou.

¹¹Mai te taimi nei, e tau mo koe o pilitome, a tama tagata katoa kola ko tusa mo te valu o aso te ma'tua, e tau katoa o pilitome, e aofia ei a tamaliki a pologa ne fanau i tou fale e pela foki mo pologa kola ne togi mai ne koutou mai i tino o fenua fakaatea.

¹³E tau o pilitome a tagata katoa, ko te fakailoga faka te foitino tena e fakaasi ei i taku feagaiga mo koe e seai se gataga.

¹⁴So se tagata e seki pilitome ka se taku pela me se tino o toku fenua, me ko se tausi ne ia te feagaiga mo au.”

¹⁵Muna a te Atua ki a Apelaamo, “Sa toe fakaigoa tau avaga ki a Salai; mai te taimi nei a tena igoa ko Sala.[35]

¹⁶Ka fakamanuia ne au a ia, kae ka fanau mai ne ia se tamaliki ma koulua. Ka fakamanuia ne au a ia, kae ka fai a ia mo matua o malo e uke, kae ka isi foki ne tupu e 'tupu mai i a ia.”

¹⁷Ne ifo Apelaamo ki te laukele, kae kata i ana mafaufauga penei, “E mafai pefea ne te tagata o fai sena tamaliki mafai ko selau ona tausaga? E mafai pefea a Sala o faitama i te ivasefulu tausaga?”

¹⁸Ne fai atu ei a ia ki te Atua penei, “Ai a se tuku mai fua ei a Isamaeli ke sui ne ia au manafai e mate au?”

¹⁹Kae ne fai atu te Atua penei, “Ikai. Ka fanau mai ne tau avaga ko Sala se tamaliki tagata, kae ka fakaigoa ne koe ko Isaako.[36] Ka tausi ne au taku feagaiga mo ia e pela foki mo tena gafa ki te se gata mai. Se feagaiga e tumau ki te se gata mai.

²⁰Ko oti ne lagona ne au tau fakamolemole e uiga ki a Isamaeli, tela la, ka fakamanuia ne au a ia kae fakatokouke ana tamaliki mo tena gafa. Ka fai a ia mo tamana o te toko sefulu lua pelenise, kae ka fai ne au tena gafa mo malo takutakua.

²¹Kae ka tausi eiloa taku feagaiga mo tau tama ko Isaako, tela ka fanau ne Sala i te taimi penei i te sua tausaga.”

²²I te otiga ne faipati te Atua ki a Apelaamo, te mea eiloa ko fano.

²³I te aso eiloa tena, ne fakalogo a Apelaamo ki te Atua, tela pilitome eiloa ne ia a tena tama tagata ko Isamaeli fakatasi mo tagata katoa i tena fale, e pela foki mo pologa kola ne fanau i tena fale mo pologa kola ne togi ne ia.

²⁴A Apelaamo ne pilitome ka ko tusa mo te iva sefulu iva a tausaga o tena olaga,

²⁵ka ko tena tama tagata ko Isamaeli ko sefulu tolu ei ona tausaga.

²⁶Ne pilitome fakatasi eiloa laua i te aso e tasi,

²⁷fakatasi mo tavini katoa a Apelaamo.