Read Te Tusi Tapu I Te Gana Tuvalu Lomiga Lua KENESE 18 Bible Online

KENESE 18 - Te Tusi Tapu I Te Gana Tuvalu Lomiga Lua bible

KENESE 18

¹Ne fakasae atu te Aliki ki a Apelaamo i te koga e 'tu ei a lakau tapu i Mamele. A Apelaamo ne sagasaga eiloa i te mataloa o tena faleie i te taimi 'vela eiloa o te aso,

²kae i te kiloakega o ona mata, ne matea ne ia a tino e tokotolu e tu i tua. I te mateaga ne ia, ko ia eiloa ko tele o fakafetaui ki a latou. Ne ifo atu a Apelaamo ki a latou,

³kae fai atu penei, “Te otou malu eiloa, fakamolemole, afe mai ki toku fale koi tuai koutou o olo; au ne vau o tali koutou.

⁴Ke fano au o aumai ne vai mo fulu otou vae, kae manava mua koutou i lalo o te lakau tenei.

⁵Ka aumai foki ne au ne meakai e fakamalosi ei koutou mo te otou malaga. Ko tāua faka au i a koutou ne afe mai ki toku fale, tela la, nofo mai ke tali atu ne au a koutou.” Ne tali mai latou penei, “Fakafetai, ko talia ne matou te mea tena e fai mai ei koe.”

⁶Ne fakavave atu Apelaamo ki loto i tena faleie, kae fai atu ki a Sala penei, “Onoono fakavave aka ki se sake falaoa tafasili i te 'lei o faite aka ne falaoa ke tao.”

⁷Tela, fano ei a Apelaamo ki te lafu pulumakau, puke aka ne ia te tama pulumakau lei kae putaputa, tuku ei ne ia ki te tavini ke fakatoka ne ia.

⁸Ne puke aka ne ia ne sua susu, mo mea fasi, tuku ei ne ia ki mua o tagata kola e tokotolu. Ne tali eiloa ne Apelaamo a tino kola e tokotolu i lalo o te lakau tena, tela kai ei latou.

⁹Ne fesili mai te tokotolu kola ki a Apelaamo penei, “Tefea tau avaga ko Sala?” Ne tali atu Apelaamo penei, “Tela i te faleie.”

¹⁰Ne fai aka te tino e tokotasi mai te tokotolu kola penei, “E iva masina mai te taimi nei[37] kae toe foki mai au, i te taimi tena ka fanau ei ne Sala se tamaliki tagata.” A Sala i te taimi tena e tu fua i tua o ia i te mataloa o te faleie, o fakalogologo.

¹¹A Apelaamo mo Sala ko to matua, ko se tau o maua ne laua se Tamaliki.

¹²Tela, kata ei a Sala, kae fai ifo i tena loto penei, “Au nei ko matua ka ko vaivai foki, koi mafai nei ne au o fiafia i te olaga fakatau avaga? A taku avaga foki la ko matua.”

¹³Tena faipati mai ei te Aliki ki a Apelaamo penei, “Ai a ne kata ei a Sala kae fai aka pela, ‘E tonu eiloa e mafai o maua saku tamaliki i a au ko matua?’

¹⁴E isi se mea e faigata i te Aliki? E pela mo aku muna, e iva masina mai te taimi nei kae toe foki mai au ka ko Sala ka maua tena tamaliki tagata.”

¹⁵Ne mataku a Sala, seki takutonu ei ne ia i a ia ne kata. Muna a te Aliki, “A koe ne kata eiloa.”

¹⁶Ne tiakina ne te tokotolu kona te koga ne kai ei, o olo ki se koga e mafai ei ne latou o matea Sotoma. A Apelaamo ne tautali atu foki i a latou ke tai mao ko tuku ei ke olo.

¹⁷Ne fai ifo te Aliki ki a ia eiloa penei, “Ka se funa ne au mai i a Apelaamo te mea ka fai ne au.

¹⁸A tena gafa ka fai mo malo takutakua, kae ka fakamanuia foki ne au a malo e auala i a ia.[38]

¹⁹Ko oti ne filifili ne au a ia ke fakatonu atu ki ana fanau mo tino o tena gafa ke fakalogo mai ki a au kae fai te mea tonu mo te fakamasinoga tonu. Kafai e fai latou pena, kae ka fakataunu ne au a mea katoa kola ne tauto ei au e uiga ki a ia.”

²⁰Tena, fai mai ei te Aliki ki a Apelaamo penei, “E uke molimau se 'lei e uiga ki a Sotoma mo Komolo, ka ko te lotou agasala ko oko eiloa i te lasi.

²¹E tau mo au o fanaifo o onoono fakalei me e tonu a molimau kona ne lagona ne au me ikai.”

²²Ne olo atu ei te tokolua kola ne mai mo te Aliki ki Sotoma, ka ko te Aliki e tu eiloa mo Apelaamo.

²³Ne fesili atu Apelaamo ki te Aliki penei, “Ea, ka ta fakapalele eiloa ne koe a tino amio tonu fakatasi mo tino agasala?

²⁴Kafai e tinolima tino amiotonu i te fa'kai, e fakamasei eiloa ne koe te fa'kai katoa? E a, e se fakasao eiloa ne koe ke sao te tinolima amiotonu i ei?

²⁵Ailoga eiloa e mafai ne koe o tamate a tino amiotonu fakatasi mo tino agasala; e se mafai eiloa! E se mafai eiloa ne koe o fai se mea pena. Kafai e fai ne koe, ko tena uiga ko fakasala tasi a tino amiotonu mo tino amio 'masei. E se mafai ne koe o fai te mea tena. A te famasino o te lalolagi katoa e tau o fai te fakamasinoga tonu.”

²⁶Ne tali atu te Aliki penei, “Kafai e maua ne au se tinolima tino amiotonu i Sotoma, ka se fakamasei ne au te fa'kai katoa ona ko latou.”

²⁷Ne toe faipati aka Apelaamo penei, “Fakamolemole a koe ke sa ita eiloa ki a au tenei e gutu faipati atu. Au se tino ola fua, e se tau o fai se pati.

²⁸Kae kafai la e tinofa mo te tokolima fua a tino amiotonu i te fa'kai, kae se tinolima. E a, e fakamasei eiloa ne koe te fa'kai mafai ko se katoa te tinolima tino amiotonu ka ko tinofa mo te tokolima fua?” Ne tali atu a te Aliki, “Ka se fakamasei ne au a te fa'kai mafai e maua atu ne au e tinofa mo te tokolima tino amiotonu i ei.”

²⁹Ne toe faipati aka Apelaamo penei “Kae kafai; e tinofa fua tino amiotonu i Sotoma?” Ne tali te Aliki penei, “Ka se fakamasei ne au te fa'kai mafai e maua ne au se tinofa tino amiotonu i ei.”

³⁰Muna a Apelaamo, “Te Aliki, fakamolemole eiloa, sa ita ke toe faipati atu au. Kafai la e tinotolu fua tino amiotonu i te fa'kai?” Muna a te Aliki, “Ka se fakamasei ne au a te fa'kai mafai e tinotolu tino amiotonu i ei.”

³¹Ne toe faipati atu Apelaamo penei, “Fakamolemole, sa ita eiloa ki toku fakamakeke o faipati atu. Kafai la e tinolua fua tino amiotonu e maua i te fa'kai?” Muna a te Aliki, “Ka se fakamasei ne au te fa'kai mafai e tinolua tino amiotonu e maua ne au i ei.”

³²Muna a Apelaamo, “Te Aliki, fakamolemole eiloa, sa ita ke toe faipati atu au, taku toe faipatiga eiloa. Kafai la e tinogafulu tino amiotonu i te fa'kai?” Muna a te Aliki penei, “Kafai e tinogafulu tino amiotonu i te fa'kai, ka se fakamasei ne au a te fa'kai.”

³³I te otiga ne faipati te Aliki mo Apelaamo, ko te Aliki eiloa ko fano ka ko Apelaamo ko foki ki tena fale.