Read Te Tusi Tapu I Te Gana Tuvalu Lomiga Lua KENESE 19 Bible Online

KENESE 19 - Te Tusi Tapu I Te Gana Tuvalu Lomiga Lua bible

KENESE 19

¹I te okomaiga o te tokolua agelu kola ki Sotoma i te afiafi tena, ka ko Lota e sagasaga i te mataloa o te fa'kai. I te mateaga ne Lota te tokolua agelu kona, tele atu eiloa a ia o fakafetaui ki a laua. Ne punou ifo a ia i la mua

²kae fai atu penei, “Te lua 'malu, au ne vau o tali koulua. Fakamolemole, o'mai ki toku fale. Fulu lua vae kae nofo o moe i konei i te po nei. I te aso taeao, ko ala ake ei koulua koi tai malu o olo i te lua malaga.” Kae ne tali atu laua penei, “Ikai, maua e nofo eiloa i te malae o te fa'kai i te po nei.”

³Ne finau atu eiloa a Lota ki te tokolua kola, te mea eiloa ko talia ne laua ke olo latou mo Lota ki tona fale. Ne fakatonu atu a Lota ki ana tavini ke tao ne falaoa kae fakatoka se kaiga gali ki malo konei. I te 'tokaga, te mea eiloa ko 'kai.

⁴Kae koi tuai o olo o moe a te toko lua konei, ne 'mai a tagata o Sotoma o fakatamilo te fale. A tagata katoa o te fa'kai, tino matua mo tino fo'niki, ne nofo katoa i kona.

⁵Ne kalaga atu ki a Lota penei, “Ko fea te tokolua kola ne 'mai o 'nofo mo koe i te po nei? Aumai ki tua!” A tino o Sotoma e manako o 'moe mo laua.

⁶Ne ulu atu a Lota ki tua, pono atu ei te mataloa i ona tua.

⁷Muna a ia ki te vaitino penei, “Oku taugasoa, au e fakamolemole atu ke mo a e fai se vaega mea masei penei!

⁸Kiloke, e isi ne aku tama fafine e tokolua, e seki iloa tagata. Ke avatu ne au ki tua, kae pule eiloa koutou ki te mea e fai ne koutou ki a laua. Kae mo a eiloa e fai ne koutou se mea se lei ki tagata tokolua konei; a laua ne malo i toku fale kae tau o puipui ne au.”

⁹Kae ne fai atu a tagata Sotoma ki a Lota penei, “A koe se tino fakaalofa, fakatafa keatea! Ko oi koe ke vau koe o fakatonu mai te mea e tau o fai ne matou? Keatea mai omotou mua, i a koe ma atili fakamasei atu ne matou i lo au malo kona.” Ne tule atu ne latou a Lota kae olo ake o ofa te mataloa.

¹⁰Ka ko te tokolua tagata kola i loto i te fale ne puke atu ki a Lota o futi ki loto i te fale kae pono te mataloa.

¹¹Tena fakakivi ei ne laua a mata o tino katoa i tua ke se lavea ne latou te mataloa.

¹²Muna a te tokolua tagata kola ki a Lota penei, “Kafai e isi ne ou tino i konei, ne tama tagata io me ne tama fafine, io me ko avaga a au tama fafine io me ne nisi kaiga o koe, e nofo i te fa'kai, ke olo keatea katoa mo te fa'kai,

¹³me ka fakamasei ne maua a te fa'kai tenei. Ko oti ne lagona ne te Aliki a molimau ki te se 'lei o tino o Sotoma, tela la, ne uga mai ne ia maua ke fakamasei te fa'kai tenei.”

¹⁴Tela, ne fano ei a Lota ki tagata kola e fai o avaga mo ana tama fafine, kae fai atu ki ei penei, “Fakavave o olo keatea mo te fa'kai nei i te mea ka fakamalaia ne te Aliki.” Kae ne taofi aka laua pela i a Lota e fai fa'kata.

¹⁵I te vaveao, ne fakavavave ne te tokolua agelu a Lota, kae fai atu, “Ke vave, puke tau avaga mo au tama fafine e tokolua o tele keatea ke 'sao koutou mafai ko fakamasei te fa'kai tenei.”

¹⁶Ne fakatalave a Lota, ka ko te Aliki ne alofa ki a ia, puke atu ei a te tokolua tagata ki a ia, mo tena avaga mo ana tama fafine e tokolua o taki atu keatea mo te fa'kai.

¹⁷Muna a te agelu e tokotasi, “Tele ke 'sao koutou! Sa 'kilo ki otou tua, sa 'tu foki i te vanu. Tele ki luga i mauga ke mo a e mate koutou.”

¹⁸Ne tali atu a Lota penei, “Ikai, fakamolemole, sa faigina matou ke fai te mea tena.

¹⁹Ko oti ne fakasao ne koulua toku ola. A mauga ko to mao; e iku au o puketu ne te fakalavelave, ko mate ei au seki oko ki te koga tena e 'tau o tele ki ei.

²⁰E matea ne koe te fa'kai foniki tela? Tuku mai au ke fano ki ei me e pili mai. E matea ne koe me se fa'kai foniki, kae e sao foki au i ei.”

²¹Ne tali atu te agelu ki a ia penei, “Ko lei, ko talia ne au. Ka se fakamalaia ne au te fa'kai foniki tena.

²²Fakavave! Tele! E seai se mea e mafai o fai ne au vagana ke oko koulua ki te fa'kai foniki tena.” Ne fakaigoa te fa'kai tena ko Soala, me ne taku sale ne Lota ko te fa'kai foniki.[39]

²³A te la ko kamata o fanake i te okoga o Lota ki Soala.

²⁴Ne fakato ifo ne te Aliki te afi ki luga i fa'kai o Sotoma mo Komolo,

²⁵tena, masei valevale eiloa a fa'kai kona, mo te vanu katoa fakatasi mo tino katoa i kona mo mea katoa e ola i te laukele.

²⁶Ka ko te avaga a Lota ne kilo ki ona tua, te mea eiloa ko liu pou masina.

²⁷I te tafataeao o te sua aso, ne fanatu Apelaamo ki te koga tela ne faipati ei laua mo te Aliki.

²⁸Ne kilo ifo ona mata ki Sotoma mo Komolo mo vanu katoa, lavea ei ne ia a te au e fanake mai te laukele, e pela me se au e fanake mai se afi lasi eiloa.

²⁹I te fakamaseiga ne te Atua a fa'kai i te vanu, te koga ne nofo ei a Lota, ne masaua ne ia a Apelaamo, tena talia ei ne ia a Lota ke sola mo te saogalemu.

³⁰Ne mataku a Lota ma nofo i Soala, tela ne olo ei a ia mo ana tama fafine e tokolua o nofo i ana i luga i mauga.

³¹Ne fai atu te tamaliki fafine matua ki tena taina penei, “A te tamana o taua ko gasolo o matua, kae e seai eiloa ne tagata i te lalolagi katoa[40] ke avaga mo taua ke maua ne tamaliki ma taua.

³²Vau ke fainu ne taua ta tamana ke kona, ke moe mo taua ke maua ne ta tamaliki i a ia.”

³³I te po tena, ne tuku atu ne laua a uaina ke inu ki ei a Lota, tela ne fanatu ei te tama fafine matua o moe mo ia. E seiloa eiloa ne Lota te mea ne tupu me i a ia ko to kona.

³⁴I te sua aso, ne fai atu te tama fafine matua ki tena taina, “A maua ne moe i te po anafi. Ka toe fainu nei ne taua ma po nei, ko moe ei mo koe. Tena, a maua ei ne ta tamaliki i ta tamana.”

³⁵Tena, i te po tena, ne fainu ne laua te la tamana, moe ei mo te tama fafine foniki. E seki iloa foki ne Lota te mea ne tupu me i a ia ko tō kona.

³⁶I te faiga tena, ne faitama ei a te tokolua tamafine kona i te la tamana eiloa.

³⁷Ne fanau mai te tama a te tamaliki fafine matua, se tagata, fakaigoa ei ne ia ko Moapi. A ia ko te tupuga o tino Moapi.[41]

³⁸Ne fanau foki a te tamaliki a te tama fafine foniki, se tagata foki, fakaigoa ei ne ia ko Penani.[42] A ia ko te tupuga o tino Amoni i aso nei.