Read Te Tusi Tapu I Te Gana Tuvalu Lomiga Lua KENESE 2 Bible Online

KENESE 2 - Te Tusi Tapu I Te Gana Tuvalu Lomiga Lua bible

KENESE 2

¹Tena, ko palele atu ei te faitega o te lagi mo te lalolagi mo mea katoa i ei.

² I te fitu o aso ne manava ei te Atua me ko palele ana galuega ne fai.

³Ne fakamanuia ne ia te fitu o aso kae fakatapu ke fai mo aso taua, me ko te aso tena ne manava ei a ia mai tena galuega ne fai [5]

⁴E pena te faitega o te lagi, te lalolagi mo mea katoa i ei. I te faitega ne te Aliki [6] te Atua te lagi mo te lalolagi,

⁵e seai ne lakau i luga i te laukele, kae e seai foki ne fuaga o lakau ko ola aka, me e seki fakato ifo ne ia a te vaiua, kae e seai foki se tino ke galue ne ia a te laukele;

⁶ko te vai mai lalo o te laukele tela ka fakasusu ei te laukele.

⁷Ne puke aka ne te Aliki te Atua ne mu one mai i te laukele, kae faite ne ia ki ei te tagata; ne manava atu a ia ki ona puisu, tela, ola ei te tagata.[7]

⁸Oti aka, toki ei ne te Aliki te Atua se fatoaga i Etena, i te feitu ki te saegala, tuku atu ei ne ia a te tagata tela ne faite ne ia ke nofo i ei.

⁹Ne fakatupu aka ne ia a vaega lakau gali katoa ke ola i kona, ka ke fua ki fuaga lei. I te kogaloto o te fatoaga e tu ei te lakau o te ola mo te lakau tela e iloa ei te mea lei mo te mea masei.[8]

¹⁰E isi se vai e tafe i loto i Etena, tela e fakasusu ei te fatoaga; i tua atu o Etena, te vai tena e maga ki vaitafe e fa.

¹¹A te vaitafe muamua ko Pisona, tela e tafe fakatamilo i te fa'kai o Havila.

¹²A te aulo e maua i kona, pela foki mo mea manogi mo fatu tāua.

¹³A te lua o vaitafe ko Kaiona e tafe fakatamilo i te fenua o Kusi.[9]

¹⁴A te tolu o vaitafe ko te Taikelise tela e tafe ki te saegala o Asulia, ka ko te fa o vaitafe ko te Eufilate.

¹⁵Tena, tuku ei ne te Aliki te Atua te tagata ke nofo i te Fatoaga o Etena, o galue te laukele i ei kae tausi fakalei.

¹⁶Muna a te Atua ki te tagata, “E mafai ne koe o kai a fuaga o so se lakau i loto i te fatoaga,

¹⁷kae tapu koe e kai ki fuaga o te lakau tela e fai ne ia te tino ke iloa te lei mo te masei.[10] E se tau eiloa mo koe o kai ki fuaga o te lakau tena, me kafai e kai koe ki ei, a koe e mate eiloa i te taimi tena.”

¹⁸Muna a te Aliki te Atua, “E se lei mafai e nofo tokotasi te tagata. Ka faite ne au se soa mo ia ke fesoasoani ki a ia.”

¹⁹Tena ne puke aka ne ia a one mai te laukele kae faite ne ia ki ei a manu katoa o te laukele pela foki mo manu eva katoa. Oti aka, aumai ei ne ia ki te tagata ke fakaigoa ne ia; e pena te fakaigoaga o manu.

²⁰Tena, fakaigoa ei ne te tagata a manu eva katoa mo manu katoa o te laukele; kae e seai eiloa se manu i a latou e tau ke fai mo soa o te tagata o fesoasoani ki a ia.

²¹Tena, fai ei ne te Aliki te Atua te tagata ke moe, kae i te taimi ko to ei te moe o te tagata, ne tata ne te Aliki te Atua tena ivi kasokaso e tasi, kae toe pono atu te kogā kano tela ne tata mai i ei.

²²Ne faite ne ia te fafine ki te ivi kasokaso tena, aumai ei ne ia ki te tagata.

²³Muna a te tagata penei. “Ko fatoa maua se tino e pau mo au— Ko ivi mai oku ivi, ko kano mai oku kano. E tau a ia o fakaigoa ko “Fafine” me ne faite ki ivi o te tagata.”[11]

²⁴Tena te pogai e tiakina ei ne te tagata tena tamana mo tena matua kae nofo fakatasi mo te fafine, tela ko tasi ei laua.

²⁵A te tagata mo te fafine e nofo fuafua kae e se ma sua tino ki sua tino.