Read Te Tusi Tapu I Te Gana Tuvalu Lomiga Lua KENESE 20 Bible Online

KENESE 20 - Te Tusi Tapu I Te Gana Tuvalu Lomiga Lua bible

KENESE 20

¹Ne malaga atu a Apelaamo mai Mamele o fano ki te feitu ki saute o Kanana, nofo tumau ei a ia i te va o Katesa mo Sula. Fakamuli ifo, i tena nofoga i Kela,

²ne taku ne ia a Sala ko tena tuagane. Tela, ne uga mai ei te fekau a Apimeleko, te Tupu o Kela, ke avatu a Sala ki a ia.

³I te po e tasi, ne fakasae atu te Atua ki a Apimeleko i te moemiti, kae fai atu ki a ia penei: “Ko se 'mao nei ko mate koe, me ne puke mai ne koe te fafine tenei; a ia se fafine ko oti ne avaga.”

⁴Ka ko Apimeleko e seki fakapilipili atu ki tafa o te fafine, kae fai aka mo ana pati penei, “Te Aliki, au e seki 'se! Mata e ta ne koe a au mo oku tino?

⁵Ko Apelaamo eiloa ne fai mai me ko tena tuagaene, e pena foki a muna a Sala ki a au. Ne fai ne au te mea tena mo te loto 'ma. E seai se mea 'se ko oti ne fai ne au.”

⁶Ne tali atu a te Atua i te moemiti penei, “E tonu, e iloa ne au me ne fai ne koe mo te loto 'ma. Tela ne fakamao eiloa ne au a koe ke mo a e agasala mai ki a au.

⁷I te taimi tenei, tuku atu te fafine tena ki tena avaga. A ia se pelofeta, kae kaati ka talo foki mo koe, ke mo a koe e mate. Kafai e se tuku atu ne koe, ko koe ka mate, fakatasi mo ou tino.”

⁸I te tafataeao o te sua aso, ne kalaga atu a Apimeleko ki ana ofisa katoa kae fakamatala atu ki a latou te mea ne tupu, tela ne mataku katoa ei latou.

⁹Ne kalaga atu a Apimeleko ki a Apelaamo kae fai atu ki a ia penei, “Se a te mea ko fai nei ne koe ki a matou? Se a te mea se ne fai atu ki a koe ko ala ei o aumai ne koe te puapuaga ki a au mo toku malo? E seai se tino ne 'tau o fai se vaega mea pena ki a au.

¹⁰Ai a ne fai ei ne koe?”

¹¹Ne tali atu Apelaamo penei, “Au ne manatu aka pela me seai se tino i konei e mataku ki te Atua, kae ka tamate ne latou a au o puke taku avaga.

¹²A te fafine tena ko toku tuagaene eiloa. E tamana tasi maua, kae e kese ma matua, tela ne avaga ei au ki ei.

¹³Tela la, i te kalaga maiga a te Atua ke tiakina ne au te fale o toku tamana o fano ki fenua fakaatea, ne faipati atu au ki a Sala penei, ‘Fakaasi mai tou fakamaoni ki a au o fai atu ki tino katoa i a au ko tou tuagaene.’ ”

¹⁴Tena, tuku atu ei ne Apimeleko a Sala ki a Apelaamo, fakatasi mo mamoe, pulumakau mo tavini.

¹⁵Ne fai atu Apimeleko ki a Apelaamo penei, “Mea nei ko toku fenua katoa; fili so se koga i ei mo ou nofo.”

¹⁶Muna a ia foki ki a Sala, “Ko tuku atu nei ne au ki tou tuagaene e afe tupe siliva e fakaasi ki tino katoa kona e fakatasi mo koe i a koe e 'ma faeloa; ka iloa ei ne tino me seki ai eiloa se mea 'se ne fai ne koe.”

¹⁷Mai te mea tena ne tupu ki a Sala, te avaga a Apelaamo, ko fai ei ne te Aliki ke mo a e toe fanau ne tamaliki ma fafine i te palesi o Apimeleko. Tela la, talo ei a Apelaamo ki te Atua mō Apimeleko, tela ne faka'lei ei a ia ne te Atua, e pela foki mo tena avaga mo ana tavini fa'fine, ko te mea ke toe fanafanau.