Read Te Tusi Tapu I Te Gana Tuvalu Lomiga Lua KENESE 21 Bible Online

KENESE 21 - Te Tusi Tapu I Te Gana Tuvalu Lomiga Lua bible

KENESE 21

¹Ne fakamanuia ne te Aliki a Sala, e pela eiloa mo tena tautoga,

²tela ne faitama ei kae fanau mai se tamaliki tagata. I te taimi tena, a Apelaamo ko matua eiloa. Te tamaliki tagata tena ne fanau eiloa i te taimi tela ne fakasino ne te Atua ke fanau i ei.

³Ne fakaigoa ne Apelaamo te tamaliki tena ko Isaako,

⁴kae i te valu o aso, ne pilitome ei a ia ne Apelaamo e pela eiloa mo te fakatonuga a te Atua.

⁵E tusa mo te selau tausaga o Apelaamo i te taimi ne fanau mai ei a Isaako.

⁶Muna a Sala, “Ko aumai ne te Aliki ki a au te fiafia lasi. So se tino e logo i te mea tenei ka kata[43] fakatasi mo au.”

⁷Kae toe faopoopo atu mo ana pati penei, “Ailoga eiloa e isi se tino e manatu aka pela me koi mafai ne au o maua se tamaliki. Kae tenei ko fanau ne au te tamaliki a Apelaamo ka ko toeaina eiloa a ia.”

⁸Ne tupu ake te tamaliki tena, kae i te taimi eiloa ne vae ei keatea mo te susu, ne fai ei te 'kaiga lasi a Apelaamo.

⁹I te aso e tasi, ne tafao a Isamaeli, te tama a Apelaamo i a Hakala, te Aikupito, mo Isaako, te tama a Apelaamo i a Sala.[44] [45]

¹⁰I te laveaga ne Sala, fai atu eiloa ki a Apelaamo penei, “Uga atu te tavini fafine tenei mo tena tama tagata ke olo keatea mai konei. E se tau o maua ne te tama a te fafine tenei se vaega mai au koloa, me e tau o maua katoa ne Isaako.”

¹¹Ne 'mafa foki eiloa mafaufauga o Apelaamo ki te mea tenei, me i a Isamaeli ko tena tama foki.

¹²Kae ne fai atu te Atua ki a Apelaamo penei, “Sa manavase ki a Isamaeli mo tau tavini ko Hakala. Fai so se mea e fai atu ne Sala, me e mafua mai i a Isaako te lasi o tou gafa tela ne tauto atu ei au.

¹³E tuku atu foki ne au ne fanau e tokouke ki te tama tagata a te tavini fafine ko Hakala, ko te mea ke fai mo malo. A ia se tama foki a koe.”

¹⁴I te tafataeao o te sua aso, ne tuku atu ne Apelaamo ki a Hakala ne meakai mo te taga vai e fonu i vai. Ne na atu ne ia te tamaliki ki te tua o Hakala, uga atu eiloa ne ia ke olo. Ne olo atu a Hakala mo tena tama, oloolo sale fua i te vao o Pelesepa.

¹⁵I te masaga o te la taga vai, ne tuku ne ia te tamaliki i lalo o te vao lakau,

¹⁶kae fanatu o sagasaga i se koga e tusa mo te selau iata te 'mao. Ne faipati ifo a ia ki a ia eiloa penei, “Tapa, ko se mafai ne au o kilo ki taku tama ma mate.[46]” Tena, tagi eiloa a ia i te koga tena e sagasaga a ia i ei.

¹⁷Ne lagona ne te Atua a te tamaliki tena e tagi, tela ne faipati ifo ei a te agelu a te Atua ki a Hakala penei, “Se a te mea e fanoanoa ei koe? Sa mataku, ko oti ne lagona ne te Atua te tagi o tau tamaliki.

¹⁸Tu ki luga o fano o puke aka tau tama o fakanana. Ka fakatokouke ne au a tino o tena gafa ke fai ma malo lasi.”

¹⁹Ne fakapula aka ne te Atua a mata o Hakala, tela ne lavea ei ne ia a te vaikeli. Ne fanatu a ia ki te vaikeli, fakafonu aka te la mea utu vai, fainu atu foki ei ne ia a tena tama.

²⁰Ne fakatasi eiloa te Atua ki a Isamaeli i aso ne tupu ake ei a ia. Ne nofo Isamaeli i te vao o Palana kae ne fai mo tagata atuli manu tafasili i te poto.

²¹Ne fakaavaga a ia ne tena matua ki te fafine Aikupito.

²²I te taimi tena, ne olo atu a Apimeleko mo te takitaki o tena kautau, ko Pikolo, ki a Apelaamo kae fai atu ki a ia penei, “A te Atua e fakatasi mo koe i au mea katoa e fai.

²³Tela la, fai se tautoga a koe i konei, i mua o te Atua, me ka se toe fakaloiloi ne koe au mo aku tamaliki io me se tino mai toku gafa. Au ne fai fakalei atu ki a koe, tela la, tauto mai i a koe ka fakamaoni mai ki a au e pena foki ki te fenua tenei e nofo ei koe.”

²⁴Ne fai atu ei a Apelaamo penei, “Au e tauto.”

²⁵Ne fakatagi atu a Apelaamo ki a Apimeleko i tena vaikeli e tasi ko oti ne 'fao malo ne ana tavini.

²⁶Ne fai atu a Apimeleko penei, “E seiloa ne au me ko oi te tino ne fai ne ia te mea tena. E seki fai mai ne koe muamua, kae tenei te taimi muamua ko logo atu au i te mea tena.”

²⁷Tena, ne tuku atu ei ne Apelaamo ne mamoe mo pulumakau ki a Apimeleko, tela ne fai ei te la feagaiga.

²⁸Ne 'vae keatea ne Apelaamo e fitu a tamā mamoe mai tena lafu,

²⁹kae ne fesili atu a Apimeleko me ai a e fai ei ne ia te mea tena.

³⁰Ne tali atu a Apelaamo penei, “Ke talia ne koe a tamā mamoe konei e fitu, me i te faiga tena, e talia foki ei ne koe me i te vaikeli tenei ne keli ne au.”

³¹Tela ne fakaigoa ei te koga tena ko Pelesepa,[47] me ko te koga tena ne fai ei te feagaiga a te tokolua kona.

³²I te otiga ne fai o te feagaiga tena i Pelesepa, ne 'foki atu ei a Apimeleko mo Pikolo ki Filisitia.

³³Ne 'toki ei ne Apelaamo te lakau ko te tamalisi i Pelesepa, fai ei tena tapuakiga ki te Aliki, te Atua Ola.

³⁴Ne nofo a Apelaamo i Filisitia i se taimi tai leva eiloa.