Read Te Tusi Tapu I Te Gana Tuvalu Lomiga Lua KENESE 22 Bible Online

KENESE 22 - Te Tusi Tapu I Te Gana Tuvalu Lomiga Lua bible

KENESE 22

¹Fakamuli ifo, ne 'tofo ne te Atua a Apelaamo. Ne kalaga atu te Atua ki a Apelaamo kae ne tali atu Apelaamo penei, “Io, tenei au!”

²Muna a te Atua, “Puke tau tamaliki tagata tena, tau tama eiloa e tokotasi tena ko Isaako, tela e pele i tou loto, kae olo ki te fenua o Molia. Ka fakaasi atu ne au a te mauga i te fenua tena, tela ka fano koe ki luga i ei o ofo mai ne koe a Isaako mo fai tau taulaga ki a au.”

³I te tafataeao o te sua aso, ne fakatoka a fafie a Apelaamo mo fai te taulaga, fakauta aka ne ia a tena asini, te mea eiloa ko kamata te lotou malaga, ko ia, mo Isaako mo ana tavini e tokolua. Ne malaga atu latou ki te koga tela ne fakatonu atu ne te Atua ke olo ki ei.

⁴I te tolu o aso, ne matea 'mao atu ne Apelaamo te koga tena e olo latou ki ei,

⁵tela ne fai atu ei a ia ki ana tavini penei, “Nofo i konei mo te asini. Maua e olo mo Isaako ki te koga tena i mua o tapuaki i ei, ka oti ko foki mai ei maua.”

⁶Ne fakaamo ne Apelaamo a Isaako ki fafie mo fai te taulaga, ka ko ia ne pukepuke atu i te naifi mo fatu Kala mo fakaka te afi. I te taimi ne sasale tasi atu ei laua,

⁷ne fai atu ei a Isaako penei, “Toku tamana!” Ne tali atu Apelaamo, “Se a, taku tama?” Ne fesili atu Isaako penei, “A mea konei e pukepuke atu ne taua ko fafie fua mo fatu Kala, kae tefea la te tamā mamoe mo fai te taulaga?”

⁸Ne tali atu a Apelaamo, “Ko te Atua e aumai ne ia.” Tena, sasale fakatasi atu eiloa laua ki te koga tena e olo laua ki ei.

⁹I te okoatuga o laua ki te koga tela ne fakatonu atu ne te Atua ke olo laua ki ei, ne faite ne Apelaamo se fata-fai-taulaga, kae fakatoka a fafie i luga i ei. Ne saisai aka ne ia tena tama, kae fakatakato atu i luga i te fata-fai-taulaga, mai luga o fafie.

¹⁰Ne puke aka ne Apelaamo te naifi o suki tena tama,

¹¹Kae ne kalaga atu te agelu a te Aliki ki a ia mai te lagi penei, “Apelaamo, Apelaamo!” Ne tali atu a Apelaamo, “lo, au tenei.”

¹²Ne fai atu te agelu penei, “Sa fakaoko tou lima ki te tamaliki tena. Ko iloa nei ne au i a koe e mataku ki te Atua, i a koe seki ita ke ofo atu a Isaako mo fai te taulaga ki a ia.”

¹³Ne kilo ake mata o Apelaamo ki ona feitu, lavea ei ne ia te mamoe tagata e lave'lave ona sau i te vao lakau. Ne fanatu a Apelaamo, puke mai ei ne ia mo fai tena taulaga sunu, kae sao ei a Isaako.

¹⁴Ne fakaigoa ne Apelaamo te koga tena, “E fakatoka.”[48] “E aumai ne te Aliki.” Ke oko mai eiloa ki aso nei, a tino e fai'pati sale eiloa penei, “I luga i te mauga o te Aliki e fakatoka eiloa ne ia a mea e ma'nako tatou ki ei.”

¹⁵Ne toe kalaga ifo a te agelu a te Aliki mai i te lagi ki a Apelaamo i te fakalua penei,

¹⁶“Ko te Aliki tenei e faipati atu, ko tauto au i toku igoa eiloa, me ka fakamanuia ne au a koe. Ona ko koe ne fakalogo mai ki a au, kae seki ita ke ofo mai tau tama tokotasi ke fai mo taulaga ki a au,

¹⁷tela ko tauto ei au me ka fakatokouke ne au tou gafa ke pela mo te uke o fetu i te lagi io me ko one i te matafaga. Ka manumalo faeloa i taua a tino o tou gafa i olotou fili.

¹⁸Ka kalaga mai katoa a malo ki a au ke fakamanuia atu a latou e pela mo te fakamanuiaga ne au a tou gafa — e pogai mea katoa i tou fakalogo ki aku fakatonuga.”

¹⁹Ne foki atu a Apelaamo ki ana tavini, foki tasi atu ei latou ki Pelesepa, te koga e nofo ei a ia.

²⁰Fakamuli ifo, ne logo a Apelaamo me ko tokovalu a tamaliki a tena taina ko Nakoli i a Milika:

²¹a Usa ko te toekimua, Pusa tena taina, Kemuelu, te tamana o Alama,

²²Kiseta, Haso, Pilitaso, Itelafo, mo Petueli,

²³te tamana o Lepeka. Kona tamaliki e tokovalu a Nakoli, te taina o Apelaamo ne fai i a Milika.

²⁴A tamaliki a Nakoli ne fai i a Leuma, tena avaga fakasalasala, ko Tepa, Kaamo, Tasso mo Maaka.