Read Te Tusi Tapu I Te Gana Tuvalu Lomiga Lua KENESE 24 Bible Online

KENESE 24 - Te Tusi Tapu I Te Gana Tuvalu Lomiga Lua bible

KENESE 24

¹A Apelaamo ko matua eiloa, kae ne fakamanuia eiloa a ia ne te Atua i ana mea katoa ne fai.

²Ne fai atu a ia ki tena toe tavini matua eiloa, tela e pule i ana mea katoa, “Tuku mai tou lima ki te va o oku kauaga kae tauto.[49]

³Au e manako ke tauto koe i te igoa o te Aliki, te Atua o te lagi mo te lalolagi, ke mo a e sala ne koe se avaga ma taku tama tagata tenei mai fafine o te fenua tenei ko Kanana.

⁴E tau eiloa mo koe o foki ki te fenua ne fanau ei au, o sala se avaga ma taku tama ko Isaako mai oku kaiga.”

⁵Ne fesili atu te tavini tena ki a ia penei, “Kae kafai la e se fia vau te fafine tela e fai ke avaga mo Isaako ki te fenua tenei? E lei ma uga ne au a Isaako ke fano ki te fenua ne vau ei koe?”

⁶Ne tali atu Apelaamo, “Onoono fakalei ke mo a e uga ne koe Isaako ke foki ki toku fenua tonu!

⁷Au ne taki mai ne te Aliki, te Atua o te lagi, mai te fale o toku tamana, mai te fenua o oku kaiga 'tonu, kae tauto fakalei mai ki a au me ka tuku mai ne ia te fenua tenei ki au mo toku gafa. Ka uga ne ia tena agelu i ou mua, ko te mea ke maua ne koe se fafine i kona mo fai te avaga a taku tama.

⁸Kafai e se talia ne te tamafine tena ke o'mai koulua ki konei, ko saoloto ei koe i tau tautoga. Kae e tapu eiloa e fakafoki ne koe taku tama ki toku fenua tonu.”

⁹Tela ne tuku atu ei te lima o te tavini tena ki te va o vae o Apelaamo, tena pule, kae fai tena tautoga o fai te mea tela ne fakamolemole atu ei a Apelaamo.

¹⁰Te tavini tena, tela e pule i mea katoa a Apelaamo, ne puke ne ia e sefulu kamela a tena pule, malaga atu eiloa a ia ki te fa'kai tela ne nofo ei a Nakoli i Mesopotamia ki matu.

¹¹I tena okoatuga, ne fakatotuli ei ne ia a kamela kona i tafa o te vaikeli i tua o te fa'kai. A te taimi tena ko te fakaafiafi, te taimi tela e solo mai sale ei a fafine o asu vai.

¹²Ne 'talo te tavini tena penei, “Te Aliki, te Atua o toku pule ko Apelaamo, tuku mai te manuia ki a au i te aso nei kae tausi tau feagaiga ki toku pule.

¹³Tenei au ko nofo atu i te vaikeli tela e solo mai ki ei a tamafine o te fa'kai o asu vai.

¹⁴Kafai e fai au ki se tamafine penei, ‘Fakamolemole tuku ifo tau tia ke inu au.’ Kafai e fai mai penei, ‘Inu, ke fainu foki ne au au kamela,’ ke fai te fafine tena mo ia tela ne filifili ne koe mo fai te avaga a Isaako. Kafai e fai pena, ko iloa ei ne au me e tausi eiloa ne koe tau feagaiga ki toku pule.”

¹⁵Kae koi tuai o fakaoti tena talo, ne oko mai a Lepeka mo tena tia vai e amo i tena tuauma. A ia ko te tama fafine a Petueli, tela ko te tama a te taina o Apelaamo, tela ko Nakoli mo tena avaga ko Milika.

¹⁶A Lepeka se tamafine matagali kae se taupou. Ne fanatu ki te vaikeli, fakafonu tena tia, te mea eiloa ko foki.

¹⁷Ne tele atu te tavini a Apelaamo o fakafetaui ki a ia kae fai atu penei, “Fakamolemole, ke inu aka au i tau tia.”

¹⁸Muna a Lepeka penei, “Tou malu, inu,” kae tuku ifo fakavave ne ia tena tia mai tena tuauma o taofi ne ia ke inu te tavini a Apelaamo tena.

¹⁹I te otiga ne inu, ne fai atu a Lepeka penei, “Ke asu mai foki ne au ne vai mo fainu au kamela ke makona.”

²⁰Ne 'ligi fakavave ne Lepeka tena tia vai ke masa ki loto i te tapu fainu manu, mo fainu a kamela a te tavini a Apelaamo. Ne fokifoki eiloa a ia o asu mai a vai i te vaikeli, fainu katoa eiloa ne ia a kamela a te tavini a Apelaamo ke makona.

²¹Ne kilokilo atu eiloa te tavini tena ki a Lepeka, o onoono me kaati ko fakamanuia tena malaga ne te Aliki.

²²I te otiga o te galuega a Lepeka, ne puke aka ne te tavini tenei se ligi aulo taua o fakamau atu ki te isu o Lepeka, kae fakamau atu foki a taulima aulo lasi e lua ki ona lima.

²³Ne fai atu te tavini tena ki a Lepeka penei, “Fakamolemole, taku mai me ko oi tou tamana. E a, e isi ne potu avanoa i tena fale mo 'moe matou mo oku tagata konei i te po nei?”

²⁴Muna a Lepeka, “A toku tamana ko Petueli, te tama a Nakoli mo Milika.”

²⁵“E uke a kau saito mo mea fagai manu i te motou fale, kae e isi foki se koga mo otou 'nofo.”

²⁶Tena ne totuli ifo te tavini tena a Apelaamo o tapuaki atu ki te Aliki.

²⁷Muna a ia penei, “Ke vikia te Aliki, te Atua o toku pule ko Apelaamo, me ne tausi eiloa ki tena tautoga ki a Apelaamo. Au ne takitaki mai eiloa ne te Aliki ki kaiga o toku pule.”

²⁸Ne tele atu Lepeka ki te fale o tena matua, fakamatala atu eiloa ne ia tena fetauiga mo te tagata i te vaikeli.

²⁹E isi se tuagaene o Lepeka e igoa ki a Lapana, tela ne tele atu ki te vaikeli, te koga tela e nofo mai ei a te tavini a Apelaamo.

³⁰Ne lavea ne Lapana te ligi i te isu o tena tuagaene mo taulima i ona lima, kae ne lagona ne ia te tala a Lepeka e uiga ki pati a te tavini tela ki a ia. Ne fanatu Lapana ki te tavini a Apelaamo, tela e tu i tafa o ana kamela,

³¹kae fai atu, “Vau ke olo taua ki toku fale. A koe se tagata ko oti ne fakamanuia ne te Aliki. Ai a e tu ei koe i tua nei? E isi se potu mo koutou i toku fale, e isi foki se koga mo au kamela.”

³²Tela ne ulu atu ei te tavini tena a Apelaamo ki loto i te fale, ka ko Lapana ne nofo o tuku ki lalo a uta a kamela, kae fagai foki. Oti aka, aumai ei ne ia ne vai ke fulu a vae o te tavini a Apelaamo mo ana tagata.

³³I te aumaiga o meakai, ne faipati aka te tavini a Apelaamo penei, “Au se mafai o kai, vagana ke oti mua ne faipati ne au te fekau ne vau ei au.” Muna a Lapana, “Ko 'lei, fai mai tau fekau.”

³⁴Muna a te tavini a Apelaamo, “Au ko te tavini a Apelaamo.”

³⁵Ne fakamanuia ne te Aliki a toku pule kae fai foki a ia ke maumea. Ne tuku mai ne ia a lafu mamoe mo kouti, ko pulumakau, ko siliva mo aulo, ko tavini tagata mo tavini fafine, ko kamela mo asini.

³⁶Ne fanau mai Sala i te la tamaliki tagata e tokotasi ka ko matua eiloa a ia. Ne tuku katoa ne Apelaamo ana mea katoa ma tena tama tena.

³⁷Au ne fakatauto ne toku pule ke fai tena fakatonuga. Muna a ia penei, ‘Sa sala ne koe se avaga ma taku tama i tamafine o te fenua o Kanana.

³⁸Fano ki te fenua o toku tamana o sala se fafine mai oku kaiga mo fai te avaga a Isaako.’

³⁹Ne fesili ei au ki toku pule ko Apelaamo penei, ‘Kae kafai la e se fia vau i au te fafine tena ki te fenua tenei e nofo koe i ei?’

⁴⁰Ne tali mai a ia penei, ‘A te Aliki, tela e fakalogo faeloa au ki ei, ka uga ne ia tena agelu ke olo mo koe ke iku manuia te mea e fano koe o fai. Ka sala ne koe se avaga ma taku tama tagata i te kaiga o toku tamana.

⁴¹Tenei te feitu e mafai ei ne koe o saoloto mai tau tautoga — mafai e se talia koe ne oku kaiga.’

⁴²“I taku oko maiga ki te vaikeli tenei i te aso nei, ne talo au penei, ‘Te Aliki, te Atua o toku pule ko Apelaamo, fakamanuia mai au i taku mea tenei e taumafai o fai.

⁴³A au tenei e nofo i te vaikeli. Kafai e vau se tamafine o asu vai, kae fakamolemole au ki ei ke inu aka au i tena tia.

⁴⁴Kafai e talia ne ia, kae ofo mai foki ke fainu ne ia aku kamela, ke fai a ia tena mo te tamafine ko oti ne filifili ne koe mo fai te avaga a Isaako.’

⁴⁵E seki oti taku talo ka ko sae mai Lepeka mo tena tia vai i tena tuauma, o fano ki te vaikeli o asu vai. Ne fai atu au ki a ia penei, ‘Fakamolemole, ke inu aka au.’

⁴⁶Ne tuku fakavave ifo ne ia tena tia mai tena tuauma kae fai mai ke inu au, ka oti ko fainu foki ei ne ia aku kamela. Tela inu ei au, kae fano a ia o fainu aku kamela.

⁴⁷Ne fesili atu au ki a ia me ko oi tena tamana, kae ne tali mai me ko Petueli te tama tagata a Nakoli mo Milika. Tena, fakamau atu ei ne au te ligi i tena isu mo taulima ki ona lima.

⁴⁸Ne totuli au ki lalo o tapuaki atu ki te Aliki. E tavae ne au te Aliki, te Atua o toku pule ko Apelaamo me ne takitaki mai eiloa ne ia a au ki te kaiga o toku matai, tela ko maua ei ne au tena tama fafine mo fai te avaga a Isaako.

⁴⁹Fai mai se tali, me talia me ikai. Fai mai se tali ko iloa ei ne au te mea e tau o fai ne au.”

⁵⁰Ne tali atu Lapana mo Petueli penei, “E seai se tali e fai ne maua me i te mea nei se faiga a te Aliki.

⁵¹Tenei Lepeka, puke ke olo koulua, ke fai a ia mo fai te avaga a te tama tagata a tou pule, e pela eiloa mo te fuafuaga a te Aliki.”

⁵²I te lagonaga ne te tavini a Apelaamo te tali tena, ne punou ifo tena ulu kae tapuaki atu ki te Aliki.

⁵³Tena, tapale aka ne ia a gatu, siliva, mo taulima aulo, tuku atu ei ne ia ki a Lepeka. Ne tuku atu foki ne ia meaalofa tau gata ki te tuagaene mo te matua o Lepeka.

⁵⁴Tena ne 'kai kae inu ei a te tavini tena a Apelaamo mo ana tagata i te fale tena, moe atu foki eiloa i ei i te po tena. I te ala akega o latou i te taeao ne fai atu te tavini a Apelaamo ki a Lapana mo Petueli penei, “Tuku mai au ke foki ki toku pule.”

⁵⁵Kae ne tali atu te tuagaene mo te matua o Lepeka penei, “Tuku mai Lepeka ke nofo aka mua mo matou i se vaiaso e tasi, io me i ne aso e sefulu, ka oti ko mafai ei a ia o fano.”

⁵⁶Kae ne tali atu te tavini a Apelaamo penei, “Sa faka'lavegina matou i konei me ko oti ne fakamanuia ne te Aliki taku malaga; tuku mai au ke foki atu ki toku pule.”

⁵⁷Ne toe fai mai te tuagaene mo te matua o Lepeka penei, “Ke kalaga ake mua tatou ki a Lepeka ke vau me se a tena tali.”

⁵⁸Tena ne kalaga ei latou ki a Lepeka kae fesili atu ki a ia penei, “Koe e manako o olo mo te tagata tenei?” Ne tali atu Lepeka, “Ao.”

⁵⁹Tena ne tuku atu ei ne latou Lepeka mo tena tavini matua ke olo mo te tavini a Apelaamo mo ana tagata kola ne o'mai mo ia.

⁶⁰Ne fakamanuia atu ne latou a Lepeka i pati konei, “Tuagaene, ke fai koe mo matua o tino e tokouke! A tou gafa ke manumalo i olotou fili!”

⁶¹Tena, ne fakatoka ei Lepeka mo ana tamafine, sopo atu ki luga i kamela te mea eiloa ko fano te malaga a latou fakatasi mo te tavini a Apelaamo mo ana tagata.

⁶²I te taimi tena, a Isaako ne vau ki te vao tela e tu ei [50] “Te vaikeli o te Atua Ola tela e matea ne ia a Au,” kae ne nofo i te feitu ki saute o Kanana.

⁶³Ne fanatu a ia i te afiafi o sasale i malae fatoaga, matea ei ne ia a kamela e 'mai.

⁶⁴I te mateaga ne Lepeka a Isaako, ne sopo ifo a ia mai tena kamela

⁶⁵kae fesili atu ki te tavini a Apelaamo penei, “Ko oi te tino tena e sasale tonu mai ki a tatou i loto i malae fatoaga?” Ne tali atu te tavini penei, “Ko toku pule.” Tela ne puke ifo ei Lepeka ki tena solosolo o pono ona mata.

⁶⁶Ne fakamatala atu ne te tavini ki a Isaako a mea katoa kola ne fai ne ia.

⁶⁷Tena ne puke mai ei ne Isaako a Lepeka ki loto i te faleie tela ne nofo sale ei a Sala, tena matua, ko te mea eiloa ko fai mo fai tena avaga. Ne alofa Isaako ki a Lepeka tela ne fakamafanafanagina ei tena loto i te galo o tena matua.