Read Te Tusi Tapu I Te Gana Tuvalu Lomiga Lua KENESE 25 Bible Online

KENESE 25 - Te Tusi Tapu I Te Gana Tuvalu Lomiga Lua bible

KENESE 25

¹A Apelaamo ne toe avaga ki te fafine e igoa ki a Kitula,

²konei a tamaliki a ia i te fafine tena: ko Semelana, ko lokasana, ko Metana, ko Mitiana, ko Isepaka, mo Suaa.

³A lokasana ko te tamana o Seepa mo Titana, ka ko tino ne tupu mai i a Titana ko tino Asulimo, tino Letusimo mo tino Leumemo.

⁴A tamaliki a Mitiana ko Efa, ko Efala, ko Hanoka, ko Apitu mo Eleta. A latou katoa konei ko te gafa o Kitula.

⁵Ne tuku ne Apelaamo ana mea totino katoa ki a Isaako;

⁶kae i te taimi tenei koi ola ei a ia, e isi ne meaalofa ne tuku ne ia ki nisi tamaliki a ia ne fai i nisi avaga a ia. Tena ne uga ei ne ia ana tamaliki tagata konei ki te fenua i tena tama tagata ko Isaako.

⁷A Apelaamo ne mate ka ko tusa mo 175 tausaga o tena olaga.

⁹Ne tanu a ia ne ana tama tagata ko Isaako mo Isamaeli i te ana o Makapelu i te laumanafa i te feitu ki te saegala o Mamele tela ko te laumanafa mua o Efelona, te tama tagata a Soala te tagata Heti.

¹⁰Te laumanafa tena ko te laumanafa ne togi ne Apelaamo mai tino Heti; a Apelaamo mo tena avaga ko Sala ne tanu fakatasi i te koga tena.

¹¹I te matega o Apelaamo, ne fakamanuia atu ne te Atua tena tama ko Isaako, tela e nofo pili ki “Te vaikeli o te Atua Ola tela e Matea ne la a Au.”

¹²Konei a igoa o tamaliki tagata a Isamaeli, te tama tagata a Apelaamo ne fai i te tavini fafine a Sala e igoa ki a Hakala. E fakasolo eiloa mai te ulumatua o fano ki lalo:

¹³Ko Nepaiota, ko Ketala, ko Atapeelu, ko Mepesama,

¹⁴ko Mesema, ko Tuma, ko Mase

¹⁵ko Hatata, ko Tema, ko letula, ko Nafiso, mo Katema.

¹⁶A latou ko tupuga o te sefulu lua matakaiga, ka ko olotou igoa e fakaigoa ki ei olotou fa'kai mo olotou koga e fakamanava saale ei latou.

¹⁷Ne mate Isamaeli ka ko tusa mo te 137 tausaga o tena olaga.

¹⁸A te gafa o Isamaeli ne nofo i te fa'kai i te va o Havila mo Sula, i te feitu ki te saegala o Aikupito, i te auala ki Asulia. Ne nofo mao eiloa latou mai nisi o te fanauga a Apelaamo.

¹⁹Tenei te tala o Isaako, te tamaliki tagata a Apelaamo.

²⁰A Isaako ne avaga ki a Lepeka, te tama fafine a Petueli tela se tino Alamea mai Mesopotamia, ka ko tusa mo te fa sefulu ona tausaga. A Lepeka ko te tuagaene foki o Lapana.

²¹A Lepeka e seki faitama eiloa, tela ne talo ei a Isaako ki te Aliki mo Lepeka. Ne talia ne te Aliki tena talo, tela ne faitama ei a Lepeka.

²²I te tinae o Lepeka se masaga, kae koi tuai o fanau a ia ne taua te ava tamaliki kona i loto i tena tinae. Muna a Lepeka penei, “Ai a e tupu ei te mea tenei ki a au?” Tela ne fesili atu ei a ia ki te Aliki ki se tali.

²³Muna a te Aliki ki a ia, “E lua malo kona i loto i tou tinae; Ka fanau mai ne koe ne tamaliki e tokolua kola ka fai fili. A tino e tupu mai i a laua ka fai fili foki! Ka malosi atu a te sua tamaliki i te sua tamaliki. Te tama matua ka tavini atu ki te tamaliki foliki.”

²⁴Tela, i te fanau maiga o Lepeka, se masaga.

²⁵Te tamaliki muamua e kulakula kae fulufulua, tela ne fakaigoa ei ko Esau.[51]

²⁶Te sua tamaliki ne fanau mai kae piki mau eiloa ki te mulivae o Esau, tela ne fakaigoa ei a ia ko Iakopo.[52] I taimi tena ne fanau ei tokolua kona, ka ko Isaako ei ko ono sefulu ona tausaga.

²⁷Ne 'tupu ake tamaliki tagata kona, a Esau se tagata poto i te atuli manu, kae fiafia foki ki te olaga i fafo, ka ko Iakopo se tino filemu kae e nofo sale eiloa i te fale.

²⁸A Isaako e fiafia ki a Esau me e fia kai saale ki manu vae fa kola e ta saale ne Esau, ka ko Lepeka e fiafia ki a Iakopo.

²⁹I te aso e tasi, a Iakopo e tunu te supu pini, kae ulu mai a Esau, fatoa foki mai eiloa i te afuliga o manu. A Esau ko likiliki faka eiloa,

³⁰tela ne fai atu ei ki a Iakopo penei, “Au ko likiliki faka eiloa; asu mai aka ne aku mea mai tau supu kula tena.” Tena te mea e fakaigoa ei a ia ko Etoma.[53]

³¹Ne tali atu a Iakopo penei, “Ke tuku mai muamua ne koe tou tofi toekimua ki a au ko fatoa avatu ei ne au ne mu mea ma koe.”

³²Muna a Esau, “Ko 'lei! Au ka mate i te fiakai, au se ola i toku tulaga ko te toekimua.”

³³Ne tali atu a Iakopo, “Tauto muamua me ka tuku mai tou tofi toekimua ki a au.” Tela ne tauto ei Esau kae tuku atu tena tofi toekimua ki a Iakopo.

³⁴Tuku atu ei ne Iakopo ki a ia ne falaoa mo ne supu mo ona kai. I tena otiga ne kai kae inu, te mea eiloa ko fano. E pena eiloa te manatu mama o Esau ki tena tofi toekimua.