Read Te Tusi Tapu I Te Gana Tuvalu Lomiga Lua KENESE 26 Bible Online

KENESE 26 - Te Tusi Tapu I Te Gana Tuvalu Lomiga Lua bible

KENESE 26

¹Ne toe poko te oge i te fenua, mai tua o te oge tela ne poko i aso o Apelaamo. Ne fano a Isaako ki a Apimeleko, te tupu o tino Filisitia, i Kela.

²A te Aliki ne fakasae atu ki a Isaako kae ne fai atu ki a ia penei, “Sa fano ki Aikupito; nofo i te fenua tenei, te koga e manako au ke nofo koe i ei.

³Nofo i konei, kae ka fakatasi atu au ki a koe kae fakamanuia foki koe. Ka tuku atu ne au ki a koe mo tou gafa te kogā fenua katoa tenei. Ka masaua faeloa ne au taku feagaiga ne fai ki tou tamana ko Apelaamo.

⁴Ka fakatokouke ne au tou gafa ke pela mo te uke o fetu i te lagi, kae ka avatu ne au ki a latou te fenua katoa tenei. Ka 'mai a malo katoa ki a au ke fakamanuia atu latou e pela mo te fakamanuiaga ne au tou gafa.

⁵Ka fakamanuia ne au a koutou i a Apelaamo ne fakalogo kae tausi ki aku tulafono mo fakatonuga katoa.”

⁶Tena, nofo eiloa Isaako i Kela.

⁷Ne fesili atu a tino i kona e uiga ki a Lepeka, tena avaga; kae tali atu a ia me ko tena tuagaene. Ne seki taku ne ia a Lepeka ko tena avaga, me e mataku i a ia ma tamate ne tagata i kona kae o'mai o puke Lepeka me ko ia eiloa ko tinogali.

⁸Ko tai leva eiloa te nofoga a Isaako i kona, kae i te sua aso fua nei, a te Tupu ko Apimeleko ne kilokilo ifo mai tena famalama lavea ei ne ia a Isaako mo Lepeka e moe tasi.

⁹Ne uga te fekau a Apimeleko ki a Isaako ke fanatu, fai atu ei a ia penei, “A te fafine tena ko tau avaga. Ai a ne fai ei koe pela me ko tou tuagaene?” Muna a Isaako, “Au ne taofi pela me kafai e taku tonu ne au me ko taku avaga ko au ka tamate.”

¹⁰Muna a Apimeleko, “Se a te mea tenei ko fai mai ne koe ki a matou? Moi ne moe se tino i oku tino mo tau avaga penei ko maua matou ne te agasala, e pogai mai i a koe.”

¹¹Ne fai te folafolaga a Apimeleko ki tino katoa penei, “So se tino e fai fakamasei ki te tagata tenei io me ko tena avaga e tamate.”

¹²Ne toki fatoaga Isaako i te fenua tena, kae i te tausaga tena, i te taimi o te taukai, te mea ne maua ne ia e fakaselau taimi te uke i mea ne toki ne ia, me i a ia ne fakamanuia ne te Aliki.

¹³Ne tumau eiloa tena manuia, tela ko oko eiloa i tena maumea.

¹⁴Ko oko foki eiloa i te uke o ana lafu mamoe mo lafu pulumakau, mo tavini, tela la, ko kai 'sano faka eiloa a tino Filisitia ki a ia.

¹⁵Tela ne tanu ei ne latou a vaikeli katoa kola ne keli ne tavini a Apelaamo i aso koi ola ei Apelaamo.

¹⁶Ne fai atu a Apimeleko ki a Isaako penei, “Vau o fano keatea mai te motou fenua. A koe ko gasolo eiloa o malosi atu i a matou.”

¹⁷Tela ne tiakina ei ne Isaako te koga tena, kae fano o fakatu ana faleie i te Vanu o Kela, te koga tela ne nofo ei a ia i se taimi toetoe.

¹⁸Ne toe keli aka ne ia a vaikeli kola ne keli i aso o Apelaamo, kola ne tanu ne tino Filisitia i te matega o Apelaamo. Ne toe fakaigoa foki eiloa ne Isaako a vaikeli kona ki igoa kola ne fakaigoa ei ki ei ne tena tamana.

¹⁹Ne keli ne tavini a Isaako se vaikeli i te vanu, maua ei ne latou te vai.

²⁰Ne finau a tausi mamoe o Kela mo tausi mamoe a Isaako, kae fai aka penei, “A te vai tenei e o matou.” Tela ne fakaigoa ei ne Isaako te vaikeli tena ko “Finauga.”

²¹Ne toe keli ne tavini a Isaako te sua vaikeli, kae ne tupu foki te finauga i te vaikeli tena, tela ne fakaigoa ei ne Isaako ko “Fai fili.”

²²Ne tiakina ne ia te koga tena o fano o toe keli te sua vaikeli. E seki ai se kinauga i te vaikeli tena, tela ne fakaigoa ei ne ia ko “Saolotoga.” Muna a Isaako, “Ko tuku mai nei ne te Aliki te saolotoga ki a tatou o nofo i te fenua tenei, kae ka manuia tatou i konei.”

²³Ne tiakina ne Isaako te koga tena o fano ki Pelesepa.

²⁴I te po tena, ne fakasae atu te Aliki kae fai atu penei, “Au ko te Atua o tou tamana ko Apelaamo. Sa mataku; au e fakatasi atu ki a koe. Ka fakamanuia ne au a koe kae fakatokouke tou gafa e pela eiloa mo taku feagaiga ki taku tavini ko Apelaamo.”

²⁵Ne faite ne Isaako se fata-fai-taulaga i kona kae tapuaki atu ki te Aliki. Ne fakatu ona faleie i kona, kae ne toe keli ne ana tavini se vaikeli i kona.

²⁶Ne malaga mai a Apimeleko mo tena tagata poto ko Ausata, mo Pikolo te takitaki o tena kautau mai Kela o olo atu ki a Isaako.

²⁷Ne fesili atu a Isaako penei, “Ai a ko o'mai ei koutou ki a au i te taimi nei, kae tela ko oti ei ne afuli ne koutou au mai te otou fenua?”

²⁸Ne tali atu latou penei, “Ko iloa nei ne matou i te Aliki e fakatasi mo koe, tela ne mafaufau aka ei matou ke fai se feagaiga malu i te va o tatou.

²⁹Tauto mai ke mo a e fai taua mai koe ki a matou, e penei mo matou e seki fai taua atu eiloa ki a koe. Matou ne alofa atu ki a koe, ne tuku atu koe ke fano mo te filemu. Ko iloa tonu nei i a koe ne fakamanuia ne te Aliki.”

³⁰Ne fakatoka ne Isaako se kaiga, tela ne kai kae inu fakatasi ei latou.

³¹I te taeao o te sua aso, ne fakasolosolo ei latou o fai olotou tautoga, e fakamautakitaki ei te olotou feagaiga. Ne fakatofa atu a Isaako ki a latou, tela ne mavae ei latou mo te fealofani.

³²I te aso tena, ne o'mai a tavini a Isaako o fai atu ki a ia i te vaikeli ko oti ne keli ne latou. Muna a latou, “Ko maua ne matou te vai.”

³³Ne fakaigoa ei ne Isaako te vaikeli ko “Tauto.” A te fa'kai ko Pelesepa[54] ne fakaigoa ki te igoa o te vaikeli tena.

³⁴E tusa mo te fasefulu tausaga o Esau, kae avaga ki tamafine Heti e tokolua, ko Iutiti te tama fafine a Peeli, mo Pasemeta te tama fafine a Eloni.

³⁵Ne puapuaga te olaga o Isaako mo Lepeka i te tokolua kona.