Read Te Tusi Tapu I Te Gana Tuvalu Lomiga Lua KENESE 27 Bible Online

KENESE 27 - Te Tusi Tapu I Te Gana Tuvalu Lomiga Lua bible

KENESE 27

¹A Isaako nei ko toeaina kae ko kivi foki. Ne uga tena fekau ki tena tama matua ko Esau ke fanatu kae fai atu ki a ia penei, “Taku tama!” Ne tali atu Esau penei, “lo.”

²Muna a Isaako, “Au nei ko matua kae ko pili foki o mate.

³Puke tau kausana mo au matasana, kae fano ki te vao o ta mai se manu mo oku kai.

⁴Ka oti ko tunu mai ei ne koe te meakai 'lei tela e fiafia au ki ei, ko aumai ei ki a au. Ka oti au ne kai i ei ko tuku atu ei taku toe fakamanuiaga ki a koe ka koi tuai au o mate.”

⁵A Lepeka ne fakalogologo i te faipatiga a Isaako ki a Esau. Tela la, i te fanoga a Esau o sala te manu ma Isaako,

⁶ne fai atu a Lepeka ki a Iakopo penei, “Au nei ne fakalogologo ki pati a tou tamana ki a Esau, e penei ana pati,

⁷‘Sala mai se manu vaefa lei i te kai, tunu ko aumai ei ki a au. Ka oti au ne kai ki ei ko tuku atu ei taku fakamanuiaga ki a koe i mua o te Aliki, ka koi tuai au o mate.’

⁸Muna a Lepeka, “Kiloke taku tama, fakalogo mai o fai te mea e fai atu ne au.”

⁹Fano o puke mai e lua tamā kouti putaputa mai te lafu, ke tunu ne au te vaega meakai tela e fiafia malosi ki ei tou tamana.

¹⁰Ka ave ne koe te meakai tena ki a ia ke kai ki ei, ko tuku atu ei tena fakamanuiaga ki a koe ka koi tuai a ia o mate.”

¹¹Muna a Iakopo ki tena matua, “E iloa ne koe i a Esau se tagata fulufulua ka ko au e mole fua toku pakili.

¹²Kafai e puke mai toku tamana ki a au ka iloa ei ne ia i a au e fanatu o fakaloiloi a ia. Ka maua fua ei ne au se fakamalaiaga i lo se fakamanuiaga.”

¹³Ne tali atu tena matua, “Taku tama, so se fakamalaiaga e fai atu ki a koe e paku ki luga i a au,

¹⁴kae fano koe o fai te mea e fai atu ne au.” Tena, ne fano ei a Iakopo o aumai a te ava kouti ki a Lepeka, tunu ei ne Lepeka te vaega meakai tela e fiafia sale ki ei a Isaako.

¹⁵Oti aka, puke atu Lepeka ki gatu gali o Esau kola e tausi ne ia i te fale, o fakapei atu ki a Iakopo.

¹⁶Ne ufi foki ne ia a lima o Iakopo ki fulufulu o kouti, pela foki tena ua.

¹⁷Ne tuku atu ne ia te meakai gali ki a ia ke fano mo ia ki a Isaako, fakatasi mo falaoa kola ne tao ne ia.

¹⁸Ne fanatu a Iakopo ki tena tamana kae fai atu penei, “Toku tamana!” Ne tali atu a Isaako, “Io, ko oi koe na?”

¹⁹Ne tali atu a Iakopo, “Au ko Esau, tau tama matua; ko oti ne fai ne au te mea e manako koe ki ei. Nofo ake o kai tau manu tenei ne aumai ne au, ko te mea ke tuku mai tau fakamanuiaga.”

²⁰Muna a Isaako, “Taku tama, ne vave maua pefea ne koe te manu?” Ne tali atu a Iakopo, “Te Aliki tou Atua ne fesoasoani mai ki a au.”

²¹Muna a Isaako ki a Iakopo, “Fakamolemole, mumea mai ke puke atu au ki a koe. Koe na ko Esau eiloa?”

²²Ne mumea atu Iakopo ki a Isaako, tela ne pukepuke mai ki a ia kae fai mai penei, “A tou leo e pela mo te leo o Iakopo, ka ko ou lima e pela mo lima o Esau.”

²³Ne seki iloa eiloa ne Isaako me ko Iakopo, me i lima o Iakopo ko fulufuluā pela mo lima o Esau. I te taimi ka tuku atu ei ne ia te fakamanuiaga,

²⁴ne toe fesili atu a Isaako penei, “A koe na ko Esau eiloa?” Ne tali atu a Iakopo, “Te Aliki, au ko Esau eiloa.”

²⁵Muna a Isaako, “Aumai ne mu kano manu. Ka oti au ne kai ko tuku atu ei taku fakamanuiaga.” Ne avatu ne Iakopo ne mu manu, ne avatu foki ne ia ne uaina mo ona inu.

²⁶Muna a tena tamana ki a ia, “Taku tama, soloki mai o sogi mai ki a au.”

²⁷I te soloki maiga o Iakopo o sogi ki a Isaako, ne 'sogi ei ne Isaako te manogi o ona gatu, tela ne tuku atu ei ne ia tena fakamanuiaga. Muna a ia penei, “A te manogi gali o taku tama e pela mo te manogi o te kogā laukele tela ko oti ne fakamanuia ne te Aliki.

²⁸Ke avatu ne te Atua ne vaiua e uke mai te lagi, kae fai foki ou fatoaga ke ola! Ke fakamaumea ne ia koe i saito mo uaina!

²⁹A malo ke fai mo au tavini, ka ko tino katoa ke ifo atu ki a koe, ke fai koe mo pule i ou kaiga katoa, ka ko te gafa o tou matua ke ifo atu katoa ki a koe. Ke fakamalaiagina a latou kola e fakamalaia atu, kae ke fakamanuiagina a latou kola e fakamanuia atu ki a koe.”

³⁰I te otiga o te fakamanuiaga ne Isaako a Iakopo, ko Iakopo eiloa ko fano, ka ko Esau ko fatoa oko mai i tena fanoga o sala manu.

³¹Ne tunu foki ne ia ne meakai gali, ave ei ne ia ki tena tamana. Ne fai atu a ia ki tena tamana penei, “Toku tamana, na tu mai ki luga o kai aka ki te manu tenei ne fano au o sala mai, ko te mea ke na fakamanuia mai au ne koe.”

³²Muna a Isaako, “Ko oi koe?” Kae tali atu a Esau, “Ko tau tama tagata matua ko Esau.”

³³Ne polepole te foitino o Isaako, kae fesili atu ki a Esau penei, “Ko oi la te tino ne vau mo kano manu ko oti ne tunu fakalei, kae ne kai au ki ei ka koi tuai o ulu mai koe ki loto? Ne tuku ne au ki te tino tena taku toe fakamanuiaga, tela la e o ia eiloa ki te se gata mai.”

³⁴I te lagonaga ne Esau te mea tena, ne tagi pakalaga kae fai atu ki a Isaako penei, “Toku tamana, tuku mai aka foki la tau fakamanuiaga ki a au!”

³⁵Ne tali atu a Isaako, “Ko tou taina ne vau o fakaloiloi au. Ko oti ne fano mo te fakamanuiaga tela ne tau o maua ne koe.”

³⁶Muna a Esau, “Tenei te lua o taimi ne fakatogafiti ei ne ia au. Setioa eiloa me ko tena igoa ko Iakopo.[55] Ne puke ne ia toku tofi i toku tulaga ko te toekimua, kae nei ko kaisoa aka foki ne ia toku fakamanuiaga. E a, ko seai eiloa se fakamanuiaga koi toe mo oku?”

³⁷Ne tali atu a Isaako, “Ko oti ne tuku atu ne au a ia ke pule i a koe e pena foki mo ana kaiga katoa ke tavini atu ki a ia. Kae ne tuku ne au ki a ia a saito mo uaina. Taku tama, ko seai nei se mea e mafai ne au o fai mo koe.”

³⁸Ne fakamolemole atu eiloa a Esau ki a Isaako, muna a ia, “Toku tamana, e a, e tasi eiloa tau fakamanuiaga? Fakamanuia mai foki au!” Tena ne tagi ei a ia.

³⁹Ne fai atu ei a Isaako ki a ia penei, “Ka seai ne vaiua mai te lagi mo koe. Ka se ola lei ou fatoaga.

⁴⁰ A koe e ola i te pelu. Ka ko koe e fai mo tavini a tou taina. Kafai e 'teke koe ki a ia, [56] Ko sao ei koe mai i tena pulega.

⁴¹Ne fai fili a Esau ki a Iakopo me ne maua ne ia te fakamanuia a Isaako. Ne fai a mafaufauga o Esau penei, “Ko pili nei kae galo atu toku tamana, ko tamate ei ne au a Iakopo.”

⁴²I te logoga o Lepeka i te togafiti a Esau, ne uga tena fekau ki a Iakopo kae fai atu ki a ia penei, “Kiloke, a tou taina ko Esau ko lamalama o tamate koe.

⁴³Taku tama, fai nei ne koe te mea ka fai atu ne au. Fano nei ki toku tuagane ko Lapana i Halana,

⁴⁴o 'nofo mo ia ke oko ki te taimi e gata ei te kaitaua o Esau,

⁴⁵kae puli foki i a ia a te mea ne fai ne koe ki a ia. Ka oti ko uga atu ei ne au se tino ke puke mai koe. Ai a ka sona galo fua ei aku tama e tokolua i te aso e tasi?”

⁴⁶Muna a Lepeka ki a Isaako, “Au ko fiu kae fita i avaga a Esau konei, ne fafine fakaatea. Kafai foki la e avaga a Iakopo ki tamafine Heti konei, kaati la e tau mo au o na mate.”