Read Te Tusi Tapu I Te Gana Tuvalu Lomiga Lua KENESE 28 Bible Online

KENESE 28 - Te Tusi Tapu I Te Gana Tuvalu Lomiga Lua bible

KENESE 28

¹Ne kalaga atu a Isaako ki a Iakopo, fakamanuia atu ne ia kae fai atu kia ia penei, “Sa avaga ki se tamafine Kanana.

²Fano ki Mesopotamia o sala sau avaga i te kaiga o tou tupuna tagata ko Petueli, onoono ki se tama fafine a Lapana, te tuagane o tou matua.

³Ke fakamanuia ne te Atua Malosi tou kaiga, kae tuku atu ne fanau e tokouke. Ke fai koe mo tamana o malo e uke!

⁴Ke fakamanuia ne te Atua a koe mo tou gafa e pela mo te fakamanuiaga ne ia a Apelaamo, kae ke fai foki mo koe a te fenua tenei ne nofo koe i ei, te fenua tela ne tuku ne te Atua kia Apelaamo!”

⁵Ne uga atu ne Isaako a Iakopo ke fano ki Mesopotamia, ki a Lapana, tela ko te tama a Petueli te tino Alamea, ka ko te tuagane foki o Lepeka, te matua o Iakopo mo Esau.

⁶Ko iloa ne Esau i a Iakopo ne fakamanuia ne Isaako kae uga ke fano ki Mesopotamia o sala sena avaga i ei. E iloa foki ne ia me i te fakamanuiaga ne Isaako a Iakopo, ne fai te fakatonuga a Isaako ke mo a Iakopo e avaga ki se fafine Kanana.

⁷Ko iloa foki ne ia i a Iakopo ne fakalogo ki tena tamana mo tena matua o fano ki Mesopotamia.

⁸Tela ne iloa ake ne Esau i tena tamana ko Isaako e se fiafia ki fafine Kanana.

⁹Tela ne fano ei a ia ki a Isamaeli te tama tagata a Apelaamo, o avaga ki tena tamaliki fafine e igoa ki a Malata, te tuagaene o Nepaiota.

¹⁰Ne tiakina ne Iakopo te fa'kai ko Pelesepa o malaga atu ki Halana.

¹¹I te toga o te la, ne oko atu a ia ki te koga tapu,[57] manava ei a ia i kona. Ne takato ifo a ia o moe, kae aluga ki te fatu.

¹²Ne moemiti a ia me e lavea ne ia se kakega e tu i te lalolagi ka ko te sua mata e tu ki luga i te lagi, mo agelu e oloifo kae oloake i ei.

¹³Ka ko te Aliki e tu i ona tafa.[58] Muna a te Aliki, “Au ko te Aliki, te Atua o Apelaamo mo Isaako,” ana pati. “Ka tuku atu ne au mo koe mo tou gafa a te laukele tenei e moe koe i ei.

¹⁴A tou gafa ka tokouke e pela mo one i te lalolagi. Ka fakalasi ne latou te olotou fenua i ona feitu katoa, kae ka fakamanuia ne au a malo katoa e auala i a koe mo tou gafa.[59]

¹⁵Masaua me ia a au e fakatasi atu faeloa o puipui koe i so se koga e fano koe ki ei, kae ka toe fakafoki mai ne au a koe ki te fenua tenei. E se tiakina muamua ne au a koe ke taunu mua a mea katoa kola ne tauto atu ei au ke fai ne au.”

¹⁶Ne ala ake Iakopo kae fai ake pela, “A te Aliki e i konei! E nofo fua i te koga nei kae seiloa ne au!”

¹⁷Ne oko mai te mataku ki a ia kae fai aka mo ana muna penei, “Ko oko eiloa i te fakamataku o te koga tenei! Kaati ko te fale o te Atua, kaati ko te mataloa ki te lagi.”

¹⁸Ne pula ake Iakopo i te tafataeao tena, puke ki te fatu ne aluga ei a ia kae fakatu mo fai te fakamanatuga. Tena ne ligi ei ne ia ne sinu olive ki luga i te fatu o fakatapu ne ia mo te Atua.

¹⁹Ne fakaigoa ne ia te koga tena ko Peteli.[60] A te fa'kai i kona muamua e igoa ko Lusa.

²⁰Tena ne fai ei te tautoga a Iakopo ki te Aliki i kona penei, “Kafai e fakatasi mai koe o puipui au i taku malaga tenei, kae tuku mai foki a meakai mo gatu,

²¹kae kafai foki e oko au ki toku tamana mo te saogalemu, ka fai ei koe mo oku Atua.

²²A te fatu fakamanatu tenei ne fakatu aka ne au ka fai mo koga e tapuaki atu ei a tino ki a koe, kae ka tuku atu ne au te tasi vae sefulu mai mea katoa kola e aumai ne koe.”