Read Te Tusi Tapu I Te Gana Tuvalu Lomiga Lua KENESE 29 Bible Online

KENESE 29 - Te Tusi Tapu I Te Gana Tuvalu Lomiga Lua bible

KENESE 29

¹Ne toe malaga atu a Iakopo o fano ki te fenua i te saegala.

²Ne oko atu a ia ki te vaikeli i tua o te fa'kai, tela e takatokato mai i ona tafa e tolu lafu mamoe. A lafu kona e fainu sale mai i te vai tenei, tela e pono ki te fatu lasi.

³Kafai ko oko mai katoa a lafu mamoe, ko tule ei ne tausi mamoe te fatu lasi tela e pono i te gutu o te vaikeli, ko fainu ei a mamoe. Ka oti ko toe fakafoki ei ne latou te fatu o 'pono te vaikeli.

⁴Ne fesili atu Iakopo ki tausi mamoe kona penei, “Oku taugasoa, a koutou ne tino mai fea?” Ne tali mai latou penei, “Matou ne tino mai Halana.”

⁵Ne fesili atu Iakopo, “KE iloa ne koutou a te tagata e igoa ki a Lapana, te tama tagata a Nakoli?” Ne tali mai latou me e iloa ne latou.

⁶Ne fesili atu a Iakopo me ko Lapana e malosi me ikai. Kae tali mai latou penei, “A Lapana e malosi faeloa. Kiloke, tenei ko vau tena tama fafine ko Lasela mo tena lafu mamoe.”

⁷Muna a Iakopo, “Ai a se na fainu ei otou manu kae toe ave ke kaikai i malae mouku, i te mea koi maina faeloa, seki tau o ave o faka'moe?”

⁸Ne tali mai latou, “E se mafai ne matou o na fainu nei omotou manu. E fakatali eiloa ke palele mai a lafu, ko 'tule ei te mataloa fatu i te gutu o te vaikeli, ko fainu ei a lafu mamoe.”

⁹Ne oko mai Lasela mo tena lafu ka ko Iakopo koi faipati eiloa ki tausi mamoe kola.

¹⁰I te mateaga ne Iakopo i a Lasela ko oko atu mo te lafu a Lapana, te tuagaene o Lepeka, ne fanatu ei a ia ki te vaikeli, tule ne ia te fatu tela e pono i ei, kae fainu a mamoe kona a Lasela.

¹¹Tena ne sogi atu ei a ia ki a Lasela, kae tagi mo te fiafia.

¹²Muna a ia ki a Lasela, “Au se kaiga o tou tamana, au ko te tama a Lepeka.” Ne tele atu a Lasela o fakailoa ki tena tamana;

¹³kae i te logoga a Lapana i tena tuatina ko Iakopo, ne tele atu a ia o fakafetaui ki a ia, ne sai ne ia, sogi kae taki mai ne ia ki loto i tena fale. I te fakamatala atuga ne Iakopo a mea katoa kola ne tupu,

¹⁴ne fai atu ei a Lapana penei, “E tonu, a koe ko toku toto tonu.” Ne nofo i kona a Iakopo e tusa mo te masina e tasi.

¹⁵Muna a Lapana ki a Iakopo, “E se tau koe o mafaufau pela i a koe ko toku kaiga kae ka galue fua koe seai se togi. Se a te togi e manako koe ki ei?”

¹⁶A Lapana e isi ne ana tama fafine e tokolua; te tama matua ko Lea, ka ko te tama foliki ko Lasela.

¹⁷A Lea e gali[61] ona mata, ka ko Lasela e foitino gali kae matagali foki.

¹⁸A Iakopo e manako ki a Lasela, tela ne fai atu ei penei, “Ka galue au i a koe e tusa mo te fitu tausaga, mafai e talia ne koe ke avaga maua mo Lasela.”

¹⁹Ne tali atu Lapana, “E sili atu toku fiafia o tuku atu Lasela ki a koe i lo se tino ake; tatou ko nofo.”

²⁰Ne galue Iakopo i tausaga e fitu ke maua ne ia a Lasela, kae e pela fua me ne mu aso ki a ia me i a ia e alofa ki a Lasela.

²¹Tena ne fai atu ei a Iakopo ki a Lapana penei, “Ko katoa te fitu tausaga; tuku mai Lasela ke avaga maua.”

²²Tela ne fakatoka ei ne Lapana se kaiga lasi kae ami foki ne ia a tino e tokouke.

²³Kae i te po tena, ne tuku atu ne ia a Lea kae se ko Lasela ki a Iakopo, tela ne moe eiloa a Iakopo mo Lea i te po tena.

²⁴Ne tuku ne Lapana tena tavini fafine ko Selepa ki tena tama fafine ko Lea mo fai tena tavini.

²⁵E seki iloa eiloa ne Iakopo i te tino tela ne moe laua se ko Lasela ka ko Lea, tela fua ko te taeaoakega kae fatoa iloa ne ia. Ne fanatu a ia ki a Lapana kae fai atu penei, “Ai a ne fai ei ne koe se vaega mea penei ki a au? Au ne galue mo Lasela. Ai a ne fakatogafiti ei ne koe au?”

²⁶Ne tali atu a Lapana, “A te tu i konei, e tau o avaga mua a te tama matua i lo te tama foliki.

²⁷Fakatali ke oti a fakafiafiaga o te avaga, me e tasi te vaiaso, ko tuku atu ei ne au a Lasela mafai e toe galue koe i a au i se fitu tausaga.”

²⁸Ne talia ne Iakopo a te tali a Lapana, tela la, i te otiga te fakafiafiaga o te avaga i te vaiaso tena, ne tuku atu ei ne Lapana tena tama fafine ko Lasela ke avaga mo Iakopo.

²⁹Ne tuku atu ne Lapana a Pila mo fai te tavini fafine a Lasela.

³⁰Ne moe Iakopo mo Lasela, kae ne alofa malosi a Iakopo ki a Lasela i lo Lea. Tena ne toe galue atu foki ei a ia i a Lapana i te sua fitu tausaga.

³¹I te mateaga ne te Aliki i a Iakopo e alofa malosi ki a Lasela i lo Lea, ne fai ne ia Lea ke fanafanau, ka ko Lasela ke se fanau.

³²Ne faitama Lea, fanau mai ne ia se tamaliki tagata. Muna a Lea, “Ko lavea ne te Aliki toku puapuaga, kae nei ka alofa mai taku avaga ki a au”; tela ne fakaigoa ei ne ia tena tamaliki tagata tena ko Leupena.[62]

³³Ne toe faitama a Lea, fanau mai se tamaliki tagata foki. Muna a ia, “Ne au mai ne te Aliki te tamaliki tagata tenei, me e lavea ne ia i a au e seki alofagia eiloa ne Iakopo”; tela ne fakaigoa ei ne ia ko Simeona.[63]

³⁴Ne toe faitama foki a ia, toe fanau mai se tamaliki tagata foki. Muna a ia, “I te taimi tenei, a taku avaga ka saga tonu mai ki a au, me ko tokotolu ana tama i a au”; tela ne fakaigoa ei ne ia ko Levi.[64]

³⁵Ne toe faitama foki Lea, toe fanau mai se tamaliki tagata foki. Muna a ia, “I te taimi tenei ka vikia ne au te Aliki”; tela ne fakaigoa ei ne ia ko Iuta.[65] Tena, ne gata ei tena fanafanau.