Read Te Tusi Tapu I Te Gana Tuvalu Lomiga Lua KENESE 3 Bible Online

KENESE 3 - Te Tusi Tapu I Te Gana Tuvalu Lomiga Lua bible

KENESE 3

¹A te gata ko te toe manu faitogafiti eiloa i manu katoa ne faite ne te Aliki te Atua. Muna a te gata ki te fafine, “E tonu eiloa i te Atua ne fai atu ke sa kai koulua ki fuaga o so se lakau i te fatoaga?”

²Ne tali atu te fafine penei, “E mafai ne maua o kai ki fuaga o so se lakau i te fatoaga,

³kae tena fua ko te lakau tela i te kogaloto o te fatoaga. A te Atua ne fai mai ke tapu e 'kai maua ki fuaga o te lakau tena io me pa'tele ki ei; kafai e 'kai maua ki ei, ko maua ka 'mate.”

⁴Muna a te gata penei ki te fafine, “A te mea tena seai se mea tonu; a koulua e se 'mate.

⁵A te Atua ne fai atu pena, me e iloa ne ia me kafai e 'kai koulua ki fuaga o te lakau tena, ko koulua ka pau mo te Atua,[12] ka iloa foki ei ne koulua te mea lei mo te mea masei.”[13]

⁶Ne kilo atu te fafine ki te gali o te lakau, mo ona fuaga ko mata lei faka i te kai. Ne mafaufau aka a ia me kaati se mea sili i te lei ke maua te poto i a ia. Tela ne puke aka ne ia te fuaga lakau, kai ei ne ia. Ne tuku atu ne ia ne mu mea ki tena avaga, tela ne kai foki ki ei.

⁷Ko te otiga eiloa ne kai laua ki te fuaga lakau tena, te mea eiloa ko oko atu ki a laua te malamalama tela ko iloa foki ei ne laua i a laua e nofo fuafua, seai ne sulu. Tela, 'sui ei ne laua a lau o mati pela me ne titi mo ufi ei la foitino.

⁸I te afiafi, ne lagona ne laua te Aliki te Atua e sasale i loto i te fatoaga, tela ne 'muni ei laua mai i a ia i loto i vao lakau.

⁹Ka ko te Aliki te Atua ne kalaga atu ki te tagata penei, “Tefea koe?”

¹⁰Ne tali atu te tagata penei, “Ne lagona ne au a koe i te fatoaga; au ne mataku, tela ne muni ei au mai i a koe me i a au e nofo fuafua.”

¹¹Muna a te Atua, “Ko oi te tino ne fai atu ki a koe i a koe e nofo fuafua? E a, ko oti koe ne kai ki te fuaga o te lakau tela ne fakatapu ne au koulua ke kai ki ei?”

¹²Muna a te tagata penei, “Ko te fafine tenei ne aumai ne koe ke nofo maua, ne aumai ne ia te fuaga o te lakau ki a au, tela ne kai ei au ki ei.”

¹³Muna a te Aliki te Atua ki te fafine penei, “Ai a ne fai ei ne koe te mea tenei?” Ne tali atu te fafine penei, “Ko te gata ne fakaloiloi ne ia a au ke kai au ki ei.”

¹⁴Tena, fai atu ei te Aliki te Atua ki te gata penei, “A koe ka fakasala e tusa mo te mea tenei ne fai ne koe; ko koe ake eiloa mai manu katoa ka nofo mo te fakasalaga tenei: Mai te taimi tenei, a koe ka 'solo ki tou tinae, ka ko te pefu ka fai mo au meakai ke oko ki tou mate.

¹⁵Ka fai ne au a koulua mo te fafine ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine a tou ulu, kae ka u ne koe olotou[14] mulivae.”

¹⁶Kae ne fai atu a te Atua penei ki te fafine, “Ka fakafita ne au a koe i aso e faitama ei koe, kae ka mae malosi koe i te taimi e fanau ei koe. Kae e ui eiloa i te mea tena, ka ko koe e fiafia eiloa ki tau avaga, e nofo eiloa koe mai lalo o tena pulega.”

¹⁷Kae ne fai atu te Aliki te Atua ki te tagata penei, “A koe ne fakalogo ki tau avaga o kai te fuaga lakau tela ne fakatapu ne au a koulua ke sa kai ki ei. Ona ko te mea tena ne fai ne koe, a te laukele ka malaia. A koe ka galue fita i tou olaga katoa ko te mea ke fua mai ne meakai ma koe i te laukele.

¹⁸Ka 'tupu ake a mouku mo lakau talatala, kae ka kai koe ki ei.

¹⁹A koe ka galue malosi kae tauta, kae fatoa maua ne au meakai mai te laukele, ke oko eiloa ki te taimi e toe foki ei koe ki te laukele tela ne mafua mai ei koe. A koe ne faite mai te laukele kae ka toe foki eiloa koe ki te laukele.”

²⁰Ne fakaigoa ne Atamu[15] tena avaga ko Eva,[16] me ko ia ko te matua o tino ola katoa.

²¹Ne faite ne te Aliki te Atua a gatu mai pakili o manu mo Atamu mo tena avaga, fakapei atu eiloa ne ia ki a laua.

²²Muna a te Aliki te Atua, “A te tagata ko pau mo tatou, ko iloa ne ia te mea lei mo te mea masei.[17] E se tau o fakasaoloto a ia ke kai ki fuaga o te lakau o te ola, kae ke ola ki te se gata mai.”

²³Tena, uga ei ne te Aliki te Atua te tagata ke fano keatea mai te Fatoaga o Etena, ke fano o galue te laukele tela ne mafua mai ei a ia.

²⁴Oti aka, tuku ei ne ia a kelupi i te feitu ki te saegala o te fatoaga, mo te pelu afi tela e fulifuli faeloa ki feitu katoa. A te mea tena e leoleo ei a te lakau o te ola ke mo a se tino e fakapilipili ki ei.