Read Te Tusi Tapu I Te Gana Tuvalu Lomiga Lua KENESE 30 Bible Online

KENESE 30 - Te Tusi Tapu I Te Gana Tuvalu Lomiga Lua bible

KENESE 30

¹Ka ko Lasela, e seki ai eiloa sena tamaliki, tela la, ko loto masei faka eiloa a ia i tena taina, fai atu ei ki a Iakopo penei, “Fai aka ke maua ne aku tama, i a au ma fakamata.”

²Ne kaitaua Iakopo ki a Lasela kae fai atu penei, “Au se ko te Atua, ko ia tena e fai ne ia koe ke se fanau.”

³Muna a Lasela, “Tenei taku tavini fafine ko Pila, ke moe mo koe ke fanau ne ia se tamaliki ma aku. I te faiga tena e fai ei au mo matua e auala i a ia.”

⁴Tela ne tuku atu ei ne ia tena tavini fafine ko Pila ki a Iakopo, moe eiloa mo ia.

⁵Ne faitama Pila i a Iakopo, fanau mai nei se tamaliki tagata.

⁶Muna a Lasela, “A te Atua ko saga mai ki a au, ko oti ne lagona ne ia taku talo tela ko aumai ei ne ia se tamaliki tagata ma aku”; tela ne fakaigoa ei ne ia ko Tanu.[66]

⁷Ne toe faitama Pila i a Iakopo, toe fanau mai foki ne ia se tamaliki tagata.

⁸Muna a Lasela, “Maua ne taua ma'sei mo toku taina, kae ne manumalo au” tela la, ne fakaigoa ei ne ia te tamaliki tagata ko Nafatali.[67]

⁹I te iloaga ne Lea me i a ia ko se toe faitama, ne tuku ei ne ia tena tavini fafine ko Selepa ke avaga mo Iakopo.

¹⁰Ne fai te tama a Iakopo i a Selepa, se tamaliki tagata.

¹¹Muna a Lea, “Au ne manuia”; tela ne fakaigoa ei ne ia ko Kato.[68]

¹²Ne toe fai te tama a Iakopo i a Selepa,

¹³tela ne fai aka ei a Lea, “Ko oko eiloa i toku fiafia! Nei ka taku au ne fafine me se fafine fiafia”; tela ne fakaigoa ei ne ia ko Asela.[69]

¹⁴I te taimi o te 'katiga o te saito, ne fanatu a Leupena ki koga e tu ei fatoaga, maua ei ne ia a lakau e igoa ki manutalake,[70] aumai ei ne ia ki a Lea, tena matua. Ne muna atu a Lasela ki a Lea penei, “Aumai aka ne aku manutalake mai mea a tau tama kona ne aumai.”

¹⁵Ne tali atu a Lea, “Ea, e se malie eiloa koe i taku avaga tena ko fano mo koe? Nei, ko manako foki koe o puke a manutalake a taku tama.” Muna a Lasela, “Kafai e aumai ne koe a manutalake a tau tama ki a au, ko moe ei koulua mo Iakopo ma po nei.”

¹⁶I te fokimaiga o Iakopo mai ana galuega i te afiafi, ne fakafetaui atu a Lea ki a ia kae fai atu penei, “Taua e moe ma po nei me ne togi ne au koe ki manutalake a taku tama.” Tela ne moe ei laua i te po tena.

¹⁷Ne talia ne te Atua te talo a Lea, tela ne faitama ei Lea i a Iakopo, kae fanau mai se tamaliki tagata, te tokolima o ana tama tena.

¹⁸Muna a Lea, “Ko aumai ne te Aliki toku taui, me ne tuku ne au taku tavini fafine ki taku avaga”; tela ne fakaigoa ei ne ia tena tama tagata ko Isakala.[71]

¹⁹Ne toe faitama a Lea i a Iakopo, fanau mai nei se tamaliki tagata, ko te tokoono o ana tama tena.

²⁰Muna a ia, “Ko oti ne aumai ne te Atua se meaalofa gali. Nei ka talia au ne taku avaga me ko tokoono ana tama i a au”; tela ne fakaigoa ei ne ia ko Sepulona.[72]

²¹Fakamuli ifo, ne fanau foki a ia se tamaliki fafine tela ne fakaigoa ne ia ko Tina.

²²Tena, kae masaua aka ne te Atua a Lasela; ne tali ne ia tena talo fai ei ne ia Lasela ke fanafanau.

²³Ne faitama Lasela fanau mai se tamaliki tagata. Muna a ia, “Ko oti ne ave keatea ne te Aliki toku masiasi me tenei ko aumai ne ia saku tama,

²⁴A te Aliki ke toetuku mai saku tamaliki tagata”; tela ne fakaigoa ei ne ia ko Iosefa.[73]

²⁵I te otiga ne fanau o Iosefa, ne fai atu ei a Iakopo ki a Lapana penei, “Tuku mai au ke foki ki te koga ne vau ei au.

²⁶Tuku mai aku avaga mo aku tamaliki kola ko toku togi i taku galuega mo koe, ke na olo matou. E iloa ne koe te lei o aku galuega ne fai mo koe.”

²⁷Muna a Lapana, “Fakalogo mai, ko oti ne iloa ne au i auala fakaatua me i a au ne fakamanuia ne te Aliki ona ko koe.

²⁸Taku mai te togi e manako koe ki ei ke tuku atu ne au.”

²⁹Ne tali atu a Iakopo penei, “Ko oti ne iloa ne koe te lei o aku galuega mo te ola lei o au lafu i te tausiga ne au.

³⁰Ko lavea ne koe te lasi o te fakaopoopoga ki au mea talu mai taku nofoga i a koe. Ne fakamanuia koe ne te Aliki ona ko au. Nei ko oko ki te taimi ka saga ifo au o sala te mea tela e fiafia au ki ei.”

³¹Ne fesili atu a Lapana, “Se a tou togi e manako koe ke tuku atu ne au?” Muna a Iakopo, “Au se manako ki se togi. Ka tumau eiloa o tausi ne au au lafu manu manafai e loto koe ke puke ne au ma aku,

³²Tuku mai au ke matea ake ne au au lafu manu katoa i te aso nei kae ke puke katoa ne au a mamoe uli[74] io me tututu mai au lafu mamoe mo kouti. Tena fua te 'togi e manako au ki ei.

³³E mafai o iloa ne koe fakamuli me ko au ne amiotonu me ikai; me kafai e vau koe o onoono fakalei ki au manu kola ne puke ne au, kola ko toku togi, e iloa gofie eiloa ne koe me kafai e isi ne kouti se pulepule io me tu'tutu, io me ne mamoe e se uli, ko tena uiga ne kaisoa ne au.”

³⁴Ne tali atu a Lapana, “Ko lei. Ka fai eiloa taua i te mea tena e fai mai ei koe.”

³⁵Kae i te aso tena, ne ave keatea ne Lapana a kouti tagata katoa kola e isi ne pule i ei, io me sele'sele, mo kouti fafine katoa kola e tu'tutu io me pule'pule io me isi ne pule kena i ei. Ne ave keatea foki ne ia a mamoe uli katoa. Ne tuku ne ia ana tamaliki ke onoono ki ei,

³⁶taki ei ne ia te lafu tena keatea mai te koga e nofo ei a Iakopo e tusa mo aso e tolu. Ka ko Iakopo ne nofo eiloa o tausi a nisi lafu a Lapana.

³⁷Ne sala mai ne Iakopo a kaula 'mata mai lakau konei: ko te popula, ko te alamoni mo nisi lakau. Ne fole ne ia a nisi pakili kae tuku nisi pakili, tela la, ko pulepule kena a kaula kona, kae tuku ei ne ia i mua o manu kona, i loto i olotou kema vai.

³⁸Ne tuku ne ia i kona me e iloa ne ia i mamoe mo kouti kona e fakatasi saale mafai e mai o inu.

³⁹Tela la, ka fanau aka a kouti kona i tafa o kaula kona, a olotou tama e pule'pule, io me tu'tutu io me sele'sele.

⁴⁰Ne tuku fakakese ne Iakopo a mamoe mai kouti, kae fakasaga ne ia ki te koga tela ne ave ki ei a kouti pule'pule mo mamoe uli a Lapana. I te faiga tena ne gasolo ake eiloa o uke a manu a Iakopo, kae tuku faka'kese eiloa ne ia mo manu a Lapana.

⁴¹Kafai e fakatasi a manu foitino malosi, e tuku ne Iakopo a kaula kona ne fakatoka ne ia i mua o manu kona i loto i kema vai a latou, ko te mea ke fanau i luga i kaula kona.

⁴²Kae e se tuku ne ia ne kaula i mua o manu kola e foitino vaivai. Tela la, e seki leva, ko uke ei a manu foitino malosi a Iakopo, ka ko Lapana ko uke ki manu foitino vaivai.

⁴³I te faiga tena ne lasi ei te maumea o Iakopo, ko uke ei ana lafu mamoe mo kouti, ana tavini, kamela mo asini.