Read Te Tusi Tapu I Te Gana Tuvalu Lomiga Lua KENESE 31 Bible Online

KENESE 31 - Te Tusi Tapu I Te Gana Tuvalu Lomiga Lua bible

KENESE 31

¹Ne lagona ne Iakopo a pati a tamaliki tagata a Lapana e fai penei, “Ko puke ne Iakopo a koloa a te tou tamana. Ana mea ne maua mai fua i mea a te tou tamana.”

²Ne matea foki ne Iakopo i a Lapana pela me ko se matafiafia atu ki a ia e pela mo aso mua.

³Tena ne faipati atu ei te Aliki ki a Iakopo penei, “Foki nei ki te fenua o ou tupuga, ki ou kaiga; au e fakatasi atu eiloa ki a koe.”

⁴Tela, ne uga ei te fekau a Iakopo ki a Lasela mo Lea ke fakafetaui atu ki a ia i te koga tela e tu ei ana lafu mamoe mo kouti.

⁵Ne fai atu a ia ki a laua penei, “Ko lavea nei ne au i te lua tamana ko se matafiafia mai ki a au e pela mo taimi mua; ka ko te Atua o toku tamana e fakatasi mai faeloa ki a au.

⁶E iloa lei ne koulua i a au ne galue mo toku malosi katoa mo te tamana o koulua;

⁷kae nei ko oti ne fakatogafiti ne ia au. Ko fakasefulu taimi ne fakatogafiti ei ne ia toku togi; kae ne seki talia ne te Atua ke oko mai ana lima ki a au.

⁸Kafai e fai aka pela Lapana, ‘A kouti pulepule katoa e puke ma koe,’ kae fanau aka nei a lafu kouti katoa, e pule'pule olotou tama. Kafai foki e fai aka pela, ‘A kouti sele'sele katoa e puke ma koe,’ kae fanau aka a lafu kouti katoa e sele'sele olotou tama.

⁹Ko oti ne ave keatea ne te Atua a lafu mai te tamana o koulua kae tuku mai ki a au.

¹⁰“I te taimi ne fanau ei a mamoe mo kouti, ne fai taku miti, kae matea ne au a kouti tagata kola e olo ki kouti fafine, me e sele'sele kae pule'pule, kae tu'tutu.

¹¹Ne faipati mai te agelu a te Atua ki a au i te miti penei, ‘Iakopo!’ Kae ne tali atu au penei, ‘Io’.

¹²Muna a te agelu penei, ‘A kouti tagata katoa kona e olo ki kouti fafine e sele'sele, pule'pule, kae tu'tutu. Ko fai ne au te mea tena me ko lavea ne au a faiga katoa a Lapana ki a koe.

¹³Au ko te Atua tela ne fakasae atu ki a koe i Peteli, te koga tela ne fakatapu ei ne koe te fatu i te ligiga ne koe a te sinu olive ki ei, mo fai te mea fakamanatu, te koga foki tena ne tauto mai ei koe ki a au. Fakatoka nei o foki atu ki te fenua ne fanau ei koe.’ ”

¹⁴Ne tali atu Lasela mo Lea penei, “Ko seai nei se mea a te ma tamana e 'toe ke puke ma maua.

¹⁵E fai ne ia maua e pela me ne tino fakaalofa. Ne fakatau atu ne ia maua, kae nei ko oti foki ne fakaaoga katoa ne ia a tupe kola ne togi ei maua.

¹⁶A te koloa katoa tenei ne aumai keatea ne te Atua mai te ma tamana e a tatou mo 'tou tamaliki. Ke fai eiloa ne koe te mea tela ko oti ne fakailoa atu ne te Atua.”

¹⁷Tela ne fakatoka ei a Iakopo o foki atu ki tena tamana i Kanana. Ne faka'sopo ne ia ana tamaliki mo ana avaga ki luga i kamela, kae tuku tena lafu ke olo i ona mua, fakatasi mo mea katoa kola ne maua ne ia i Mesopotamia.

¹⁸

¹⁹A Lapana ne fano o vele a fulufulu o ana mamoe, kae i tena galoga, ne ulu atu a Lasela, kaisoa ne ia a atua faite a tena tamana.

²⁰Ne fano te malaga a Iakopo, seki fakailoa ne ia ki a Lapana.

²¹Ne puke ne ia ana mea katoa, te mea eiloa ko fano fakavave tena malaga. Ne ulu atu a ia i loto i te Vaitafe ko te Eufilate o fano ki te fenua mauga o Kileata.

²²E tolu aso mai tua ifo kae iloa ne Lapana i a Iakopo ko oti ne sola.

²³Ne fakatoka tena kau, afuli ei ne ia Iakopo i aso e fitu, maua atu eiloa i te fenua mauga o Kileata.

²⁴Ne moemiti a Lapana i te Atua ne fanatu ki a ia kae fai atu penei, “Faeteete ke mo a e fai ne au pati se lei ki a Iakopo.”

²⁵Ne fakatu a faleie a Iakopo i luga i te mauga, ka ko Lapana mo ana tagata ne fakatu olotou faleie i te fenua mauga ko Kileata.

²⁶Ne fai atu a Lapana ki a Iakopo penei, “Ai a ne tele ei koe mo aku tama fafine, kae seki fakailoa mai; e pela eiloa me ne fafine ne puke fakapagota i se taua?

²⁷Ai a ne sola ei koe se fakailoa mai? Moi ne fakailoa mai ne koe, penei e tuku atu eiloa ne au koutou ke olo mo te fiafia lasi, kae pese ki te tagi o samupelini mo kitala.

²⁸E seki aumai foki ne koe oku mokopuna mo aku tama fafine ke sogi fakamavae mai ki a au. Ko oko eiloa i te mataga o tau mea tena ne fai!

²⁹E mafai faeloa ne au o ta a koe, kae fakafetai eiloa me ne faipati mai te Atua o tou tamana ke mo a e fakamatakutaku ne au a koe.

³⁰E iloa ne au i a koe ne tele, me i a koe ko oko eiloa tou fia foki ki tou fenua, kae ai a la ne kaisoa ei ne koe aku atua faite?”

³¹Ne tali atu a Iakopo ki a Lapana penei, “Au ne tai mataku i a au e leake nei me ka fao ne koe au tama fafine.

³²Kafai la e isi se tino i konei e maua ne koe i a ia ou atua faite, ka tamate. Kiloke, a otou tino katoa konei ko molimau. Onoono fakalei ki omotou mea, kafai e isi ne au mea i a matou nei, puke atu la.” E seiloa eiloa ne Iakopo me ko Lasela ne puke ne ia a atua faite a Lapana.

³³Ne ulu atu a Lapana ki te faleie o Iakopo, oti i ei, fano ei ki te faleie o Lea mo te faleie o tavini fafine kola e tokolua, kae e seki maua eiloa ne ia ana atua faite i ei. Oti aka i kona, fano ei ki loto i te faleie o Lasela.

³⁴I te taimi tena ka ko oti ei ne puke ne Lasela a atua faite kona o fao ki loto i te taga i te tua o te kamela, kae sagasaga i luga i ei. Ne vakisa ne Lapana koga katoa i loto i te faleie kae se maua eiloa ne ia.

³⁵Muna a Lasela ki tena tamana, “Tou malu, sa ita mai ki a au i au e se tu ki luga i ou mua, i au nei e maua ne te masaki o fafine.” Ko fiu eiloa Lapana i te 'salaaga o ana atua faite kae se maua eiloa ne ia.

³⁶Ne kaitaua a Iakopo kae fai atu penei, “Se a taku agasala ne fai? Se a te tulafono ko oti ne soli ne au tenei ko vau ei koe o afuli au pela me se tino agasala?

³⁷Ko oti nei koe ne vakisa i aku mea katoa, ne a mea ne maua ne koe i oku fale e a koe? Tuku mai ki tua ke lavea ne otou tino, ke filifili latou me ko oi e tonu i a taua.

³⁸E luasefulu tausaga ne nofo ei au i a koe; au mamoe mo au kouti e fanafanau faeloa, kae seki kai eiloa ne au se mamoe tagata mai tau lafu.

³⁹Kafai e isi se mamoe ne kai ne manu fekai, a te se e paku eiloa ki luga i a au. E se fanatu foki au mo te mamoe o fakaasi atu pela me se oku te 'se. E manako eiloa koe ke taumafai eiloa au o sui te mamoe ne galo i te ao me i te po.

⁴⁰E uke taimi ne puapuaga ei au i te vela i te ao mo te moko i te po. E se ti moe fakalei sale au.

⁴¹E pena toku olaga i te luasefulu tausaga ne nofo ei au i a koe. E sefulu fa tausaga ne galue ei au ke maua au tamaliki fafine kona e tokolua, kae ono tausaga ke maua te lafu mamoe mo kouti konei. Kae ui eiloa i tena, ne kati ifo eiloa ne koe toku togi e sefulu taimi.

⁴²Moi se kau mai ki a au a te Atua o oku tupuga ko Apelaamo mo Isaako, e penei ko leva eiloa ne uga ne koe au keatea seai se mea e maua ne au. Kae ne lavea eiloa ne te Atua toku puapuaga mo te galuega ne fai ne au, tela la, i te po ne iku ei tena tonu.”

⁴³Ne tali atu a Lapana ki a Iakopo penei, “A tamaliki fafine konei ko aku tamaliki; a la tama ko aku tama, mo lafu mamoe mo kouti konei e aku foki. Kae ona ko se mafai ne au o taofi aku tama fafine kona mo olotou tamaliki,

⁴⁴ko toka nei au o fai se feagaiga mo koe. Vau ke fakatu aka ne taua a fatu konei e fakamanatu ei te feagaiga tenei a taua.”

⁴⁵Tela ne puke aka ei a Iakopo ki te fatu e tasi kae fakatu mo fai te fatu fakamanatu.

⁴⁶Ne fai atu a ia ki ana tagata ke laku fakatasi mai a fatu ke tai maluga. Tena ne kai fakatasi ei latou i tafa o te fakatuga fatu tena.

⁴⁷Ne fakaigoa ne Lapana te fakatuga fatu tena ko Ika Situta,[75] kae ne fakaigoa ne Iakopo ko Kaleta.[76]

⁴⁸Muna a Lapana ki a Iakopo, “A te fakatuga fatu tenei ka fai mo mea e fakamasaua ei te feagaiga a taua tenei ne fai.” Tena te mea e fakaigoa ei te koga tena ko Kaleta.

⁴⁹Ne fai aka foki a Lapana penei, “Ke tumau te onoono mai o te Aliki ki a taua i taimi e mavae ei taua.” Tena ne fakaigoa foki ei te koga tena ko Mesepa.[77]

⁵⁰Ne faipati eiloa a Lapana, muna a ia, “Kafai e se fai fakalei koe ki aku tama fafine, io me avaga koe ki nisi fafine, e ui eiloa e seiloa ne au kae masaua i te Atua tena eiloa e kilokilo mai ki a taua.

⁵¹Konei a fatu kola ko oti ne tuku fakatasi ne au i te va o taua, kae tenei te fatu fakamanatu.

⁵²A te lukuga fatu tenei, mo te fatu fakamanatu tenei, ne mea fakamanatu ki a taua. Ka tapu au ma to atu ki te feitu tena o fatu konei, o faitaua ki a koe, e pena foki koe, e se tau o oso mai ki te feitu tenei o fatu konei, o faitaua mai ki a au.

⁵³Ko te Atua o Apelaamo mo te Atua o Nakoli[78] ka fakamasino i te va o taua.” Tena, ne tauto fakamaoni ei a Iakopo i te igoa o te Atua tela e tapuaki ki ei a Isaako, me ka tausi fakalei eiloa ne ia te feagaiga tena.

⁵⁴Ne ta ne ia te manu, tela ne ofo atu ne ia mo fai te taulaga i luga i te mauga, kae ami mai ne ia ana tagata ki te 'kaiga. I te otiga o latou ne kai, moe atu eiloa i luga i te mauga i te po tena.

⁵⁵I te tafataeao, ne sogi fakamavae atu a Lapana ki ana mokopuna mo ana tamaliki fafine, te mea eiloa ko foki atu mo tena kau ki te lotou fa'kai.