Read Te Tusi Tapu I Te Gana Tuvalu Lomiga Lua KENESE 33 Bible Online

KENESE 33 - Te Tusi Tapu I Te Gana Tuvalu Lomiga Lua bible

KENESE 33

¹I te mateaga ne Iakopo a Esau mo tena kau e tokofa selau ko aumai, tela tufatufa ei ne ia ana tamaliki ki a Lea, Lasela mo ana avaga fakasalasala kola e tokolua.

²Ne tuku ne ia ana avaga fakasalasala mo la tamaliki i mua, tao atu ki ei ko Lea mo ana tama, kae fakamuli ko Lasela mo losefa.

³Ka ko Iakopo ne fanatu ki mua, kae punou ifo ki te laukele e fitu taimi, i te okoatuga a ia ki tena taina.

⁴Ka ko Esau ne tele atu o fakafetaui ki a ia, sai atu kae sogi atu ki a ia, 'tagi ei laua tokolua.

⁵Ne kilo ake Esau pela, lavea ne ia a fafine mo tamaliki, tela fesili atu ei penei, “Ko oi tino konei ne o'mai mo koe?” Ne tali atu a Iakopo, “Tou malu, tamaliki kona ko aku tama ne tuku mai ne te Atua i tena alofa.”

⁶Tena ne olo aka a avaga fakasalasala a Iakopo ki mua, ifo atu ki a Esau;

⁷tao atu ki ei ko Lea mo ana tamaliki kae fakamuli ko Lasela mo Iosefa.

⁸Ne fesili atu Esau, “Kae se a foki te potukau tela ne fetaui matou? Ko oi latou?” Ne tali atu a Iakopo, “Te kau kona ne olo atu ke fiafia mai koe.”

⁹Ne fai atu Esau, “Toku taina, au e lava kae toe; tausi au mea kona.”

¹⁰Muna a Iakopo, Fakamolemole, kafai ko se ita koe ki a au, talia mai aku meaalofa. A tou lavea ne au, e pela eiloa mo te lavea ne au a te Atua, i a koe ko oko eiloa i tou mata fiafia mai ki a au.

¹¹Fakamolemole talia mai a meaalofa konei ko oti ne fakatoka ne au ma koe; a te Atua ne alofa mai ki a au o tuku mai a mea katoa e manako au ki ei.” Ne finau atu eiloa a Iakopo tela talia ei ne Esau a meaalofa.

¹²Muna a Esau, “Tatou ka olo. Au ka mua i otou mua.”

¹³Muna a Iakopo, “Kaati e malamalama koe i tamaliki e vaivai, e tau foki o amanaia ne au a mamoe mo pulumakau mo olotou tama. Kafai e faka'vavave ne au a latou i se aso e tasi, ko te mea eiloa ko mate katoa a te lafu manu.

¹⁴Fakamolemole, na mua koe, kae tautali malie atu matou, o taumafai ki te vave e mafai ne au mo pulumakau mo tamaliki konei, ke oko ki te taimi e maua atu ei ne matou koutou i Etoma.”

¹⁵Muna a Esau, “Ke tuku atu ne au nisi o aku tagata ke fesoasoani atu ki a koutou.” Kae ne tali atu Iakopo, “E lei fua, ko lava eiloa i a matou.”[82]

¹⁶Tena, i te aso tena, ne foki atu ei a Esau mo tena kau ki Etoma.

¹⁷Ka ko Iakopo ne fano ki Sukota, tela ne faite ei ne ia tena fale mo ne fakamalumalu mo ana pulumakau. Tena te mea ne fakaigoa ei te koga tena ko Sukota.[83]

¹⁸I te fokimaiga o Iakopo mai Mesopotamia, ne oko atu eiloa a ia mo te manuia ki Sekema i te fenua o Kanana, fakatu ei mo ana faleie i te koga e pili ki te fa'kai.

¹⁹Ne togi ne ia te koga tena mai i tino o te gafa o Hamola te tamana o Sekema, ki te selau siliva.

²⁰Ne fakatu aka ne ia se fata-fai-taulaga i kona, fakaigoa ei ne ia ko Ele, te igoa o te Atua o Isalaelu.