Read Te Tusi Tapu I Te Gana Tuvalu Lomiga Lua KENESE 34 Bible Online

KENESE 34 - Te Tusi Tapu I Te Gana Tuvalu Lomiga Lua bible

KENESE 34

¹I te aso e tasi, ne fano a Tina, te tama fafine a Iakopo mo Lea, o asiasi atu ki nisi fafine Kanana.

²Ne matea a ia ne Sekema, te tama tagata a Hamola, te tagata Hivi, kae ko te aliki o te koga tena, tela ave ei ne ia o puke malo.

³Ne matea ne Sekema i te gali o Tina, tela ne fiafai ei a ia ki ei, taumafai ei a ia ke fiafai atu ki a ia.[84]

⁴Muna a Sekema ki tena tamana, “Au e manako ki te tamafine tenei mo fai taku avaga.”

⁵Ne logo Iakopo i tena tamaliki fafine ko oti ne fakamatagagia, kae ona ko ana tama tagata e galo i olotou galuega, ko te tausiga o ana pulumakau, tela seki ai ei sena mea ne fai ke oko eiloa ki te taimi ne 'foki mai ei latou.

⁶Ne fanatu te tamana o Sekema o faipati mo Iakopo,

⁷ka ko tama tagata a Iakopo ko fatoa foki mai eiloa i te koga ne tausi manu ei latou. I te 'logoga a tama tagata a Iakopo i te mea tena ne tupu, ne poi kae kaitaua ki a Sekema me ne fai ne ia se vaega mea pena, e faka'ita ki tino Isalaelu.

⁸Muna a Hamola ki a Iakopo, “A taku tama tagata ko fiafai ki tau tama fafine; fakamolemole talia mai ke avaga laua.

⁹Vau ke fai ne taua se feagaiga, ke avaga otou tino mo omotou tino.

¹⁰Ka mafai ei ne koutou o nofo i te motou fenua; e mafai ne koutou o nofo i so se koga e fia nofo koutou i ei, o fai manafa kae fai mea togi mo te saoloto.”

¹¹Ne fai atu Sekema ki te tamana o Tina mo ana tuagaene, “Fai te mea tenei e manako au ki ei, kae ka avatu ne au so se mea e manako koutou ki ei.

¹²Fai mai me ne a, a meaalofa e manako koutou ki ei; fai eiloa ke 'mafa te togi o Tina. E tuku atu ne au so se mea e manako koutou ki ei, mafai e talia ne koutou ke avaga maua.”

¹³Ona ko Sekema ko oti ne fakamasei ne ia te lotou tuagaene ko Tina, ne tali atu ei a tama tagata a Iakopo ki a Sekema mo tena tamana i se faiga fakatogafiti.

¹⁴Muna a latou, “E se mafai ne matou o talia te motou tuagaene ke avaga ki se tagata seki pilitome; te mea tena se mea mataga ki a matou.

¹⁵E mafai fua o loto matou mafai e talia ne koutou ke fai koutou penei mo matou o pilitome otou tagata katoa.

¹⁶Ka 'loto ei matou ki te fakatau avaga o'tou tino. Ka nofo tasi tatou ko fai ei tatou mo tino e tasi.

¹⁷Kae kafai e se talia ne koutou te motou faiga tena, ki te pilitome, ka puke ne matou te motou tuagaene o olo keatea mai konei.”

¹⁸Ne loto Hamola mo tena tama tagata ko Sekema ki te mea e manako ki ei Iakopo mo ana tama,

¹⁹tela ne seki fakatalave ei a Sekema o fai mea kola ne fai atu, me i a ia e fiafai ki te tama fafine a Iakopo. A ia ko te tino taua eiloa i te lotou kaiga.

²⁰Ne olo atu a Hamola mo Sekema ki te koga maopoopo i te mataloa o te fa'kai, o faipati atu ki tagata o te lotou fa'kai:

²¹“A tino konei e matafiafia; talia mai ke nofo tasi tatou i te fenua tenei kae ke saoloto foki o oloolo saale. E lava kae toe te fenua mo latou foki. A 'tou tama fafine ke avaga ki a latou, e pena foki olotou tama fafine, ke avaga ki 'tou tagata.

²²A tino konei e loto ma'lie fua o nofo tasi tatou mafai e pilitome a tou tagata katoa; e pela mo olotou tagata.

²³Ka fai foki ma tatou olotou manu fagai mo nisi mea aka foki a latou. Tela la, ke loto fakatasi tatou ke nofo tasi tatou.”

²⁴Ne loto katoa a tino o te fa'kai ki te mea tela ne fai atu ne Hamola mo Sekema, tela ne pilitome ei a olotou tagata katoa.

²⁵E tolu aso mai tua ifo, a tagata e seki mafu lei olotou pilitomega; tela ne olo atu ei a tama tagata a Iakopo e tokolua, ko Simeona mo Levi, ko tuagaene kona o Tina, puke la pelu kae olo atu ki loto i te fa'kai mo te se iloa, tamate ei ne laua a tagata katoa,

²⁶fakatasi mo Hamola mo tena tama ko Sekema. Tena puke aka ei ne laua a Tina mai te fale o Sekema ko te mea eiloa ko olo.

²⁷I te otiga o te taga o tino kona, ne toe olo atu a tama a Iakopo o ofa kae puke a mea i te fa'kai seai se fanoi me ko ita i te fakamatagaga o te lotou tuagaene.

²⁸Ne puke ne latou olotou lafu, ko pulumakau, ko asini, mo mea katoa i loto i te fa'kai mo fua katoa o olotou fatoaga.

²⁹Ne puke ne latou a mea taua katoa, puke fakapagota aka a fafine mo tamaliki, kae ave katoa a mea i fale.

³⁰Muna a Iakopo ki a Simeona mo Levi, “Ko aumai ne koulua te fakalavelave tena ki a au; nei ka takalialia mai ki a au a tino Kanana, tino Pelise fakatasi mo tino katoa i te fenua tenei. E se tokouke aku tagata; kafai eiloa e tuku fakatasi latou o faitaua mai ki a tatou, ko tena uiga ka malaia te tou kaiga.”

³¹Kae ne tali mai laua penei, “E se talia ne maua ke faivalevale te ma tuagaene e pela me se tamafine tali tagata.”