Read Te Tusi Tapu I Te Gana Tuvalu Lomiga Lua KENESE 35 Bible Online

KENESE 35 - Te Tusi Tapu I Te Gana Tuvalu Lomiga Lua bible

KENESE 35

¹Muna a te Atua ki a Iakopo, “Fano nei eiloa ki Peteli o nofo i ei. Faite se fata-fai-taulaga i kona ki a au, te Atua tela ne fakaasi atu ki a koe i te taimi ne tele ei koe keatea mai tou taina ko Esau.”

²Tela ne faipati atu ei a Iakopo ki tena kaiga mo tino katoa kola e nofo mo ia penei, “Pei keatea a atua faite katoa kona e tausi ne koutou; faka'ma otou loto kae pei ki gatu fou.

³Tatou ka olo keatea mai konei, o olo ki Peteli, te koga tela ka faite i ei ne au se fata-fai-taulaga ki te Atua tela ne fesoasoani sale ki a au i taimi e puapuaga ei au, kae fakatasi mai sale foki ki a au i so se koga e fano ei au.”

⁴Tena ne tuku atu ei ne latou ki a Iakopo a atua o fenua fakaatea kola e nofo mo latou, fakatasi mo ligi taliga kola e mau i olotou taliga. Ne tanu ne Iakopo a mea kona i te tafito o te lakau ko te oka e tu pili ki Sekema.

⁵I te kamataga o fano te malaga a Iakopo mo ana tamaliki tagata, ne oko ifo te mataku ki tino o fa'kai pili mai, tela seki olo ei o atuli latou.

⁶Ne oko atu a Iakopo mo tena kau malaga ki Lusa, tela e fakaigoa i aso nei ko Peteli, i te fenua o Kanana.

⁷Ne faite ne ia se fata-fai-taulaga i kona kae fakaigoa te koga tena ki te igoa o te Atua o Peteli, me e tena te koga ne fakasae atu ei te Atua ki a ia i tena telega keatea mai tena taina.

⁸Ne mate te nesi a Lepeka, ko Tepola, kae ne tanu i te tafito o te lakau ko te oka i te feitu ki saute o Peteli. Tena ne fakaigoa ei ko te “Oka o te tagi fanoanoa.”

⁹I te fokimaiga o Iakopo mai Mesopotamia, ne fakaasi atu te Atua ki a ia o fakamanuia atu a ia.

¹⁰Muna a te Atua, “A tou igoa ko Iakopo, kae nei ka sui ki a Isalaelu.” Tela ne fakaigoa ei ne te Atua a ia ko Isalaelu.

¹¹Muna a te Atua ki a ia, “Au ko te Atua Tafasili i te Malosi. Fakatokouke tau fanau; ka uke a malo e tupu mai i a koe, kae ka uke foki a tupu e 'mai i tou gafa.

¹²Ka tuku atu ne au te fenua tela ne tuku ne au ki a Apelaamo mo Isaako, kae e tuku foki ne au ki tino o tou fenua mafai ko galo atu a koe.”

¹³Tena, ne tiaki ei ne te Atua a Iakopo.

¹⁴Tena, ne fakatu ei ne Iakopo se fatu fakamanatu i te koga tena ne faipati mai ei te Atua, kae ligi atu ne ia ne uaina mo sinu olive e fakamalu ei te fatu tena.

¹⁵Ne fakaigoa ne ia te koga tena ko Peteli.

¹⁶Ne tiakina ne Iakopo mo tena kaiga te fa'kai o Peteli, kae i te pili atuga o latou ki Efalata, ne 'mae te tua o Lasela me ka fanau, kae ne fita malosi eiloa.

¹⁷Ne fai masei eiloa te fita o Lasela, tela ne fai atu ei te fafine fakafanau ki a ia penei, “Lasela, sa mataku, me se tamaliki tagata foki.”

¹⁸Ka ko Lasela ko tai mate faka eiloa, kae i te toe manavaga eiloa a ia ne fakaigoa ne ia te pepe ko Penani;[85] kae ne fakaigoa ne tena tamana ko Peniamina.[86]

¹⁹A Lasela ne tanu i tafatafa o te auala ki Efalata, e fakaigoa i aso nei ko Peteleema.

²⁰Ne fakatu aka ne Iakopo se fatu fakamanatu i kona, kae tenei eiloa koi tu mai ki aso nei.

²¹Ne malaga atu a Iakopo o fakatu ana faleie i te sua feitu o te taoa ko Eta.

²²Ka koi nofo Iakopo i te fenua tena, ne 'moe a Leupena mo Pila, te sua avaga fakasalasala a Iakopo; ne logo Iakopo i te mea tena tela ko oko eiloa i tena kaitaua. E tinogafulu mo te tokolua tamaliki tagata a Iakopo.

²³A tamaliki tagata a Iakopo i a Lea ko Leupena te toekimua, ko Simeona, ko Levi, ko luta, ko Isakala mo Sepulona.

²⁴A tamaliki a Iakopo i a Lasela ko losefa mo Peniamina.

²⁵A tamaliki tagata a Iakopo i a Pila, te tavini fafine a Lasela, ko Tanu mo Nafatali.

²⁶A tamaliki tagata a Iakopo i a Selepa, te tavini fafine a Lea, ko Kato mo Asela. A tamaliki tagata konei ne fanau i Mesopotamia.

²⁷Ne fano Iakopo ki tena tamana ko Isaako i Mamele, tela e pili ki Hepelona, te koga ne nofo ei Apelaamo mo Isaako.

²⁸Ne ola Isaako e tusa mo te selau valusefulu tausaga;

²⁹ne mate ka ko toeaina eiloa; kae ne tanu a ia ne ana tama ko Esau mo Iakopo.