Read Te Tusi Tapu I Te Gana Tuvalu Lomiga Lua KENESE 38 Bible Online

KENESE 38 - Te Tusi Tapu I Te Gana Tuvalu Lomiga Lua bible

KENESE 38

¹I vaitaimi kona, ne tiakina ne Iuta ona taina kae fano o nofo i te tagata e igoa ki a Hila, se tagata mai te fa'kai o Atulama.

²I kona, ne fetaui ei a ia mo te tamafine Kanana, te tamaliki a te tagata e igoa ki a Sua. Ne avaga a Iuta ki te tamafine tena;

³fai ei tena tama i ei, se tamaliki tagata, fakaigoa ei ne ia ko Elu,

⁴Ne toe faitama te avaga a Iuta, fanau mai se tamaliki tagata, fakaigoa ei ki a Onanu.

⁵Ne toe fanau te la tama, se tagata, fakaigoa ne laua ko Seela. Ne fanau te tamaliki tagata tena ka ko Iuta e nofo i Akasipa.

⁶Ne fakaavaga ne Iuta tena toekimua ko Elu ki te fafine e igoa ki a Tamala.

⁷A Elu se tagata amio masei, ne seki fiafia te Aliki ki a ia, tela ne tamate ei a ia ne te Aliki.

⁸Tena ne fai atu ei a Iuta ki a Onanu, te taina o Elu, penei, “Fano ke moe koulua mo te avaga a tou taina. Fai tou tiute ki te fafine tena, i a koe ko te taina o tena avaga, ko te mea ke ola te gafa o tou taina.”

⁹Ka ko Onanu e iloa eiloa ne ia me kafai e isi ne ana tamaliki mo te fafine tena, e se lau me e a ia, tela la, kafai e moe sale laua mo te fafine tena e taumafai eiloa a ia ke se faitama, ke seai ne tama ma tena taina.

¹⁰Ne seki fiafia te Aliki ki tena amioga tena, tela ne tamate foki ei a ia.

¹¹Ne fai atu ei a Iuta ki te avaga a tena tamaliki penei, “Foki ki te fale o tou tamana o fakatali i ei ke matua taku tamaliki tagata tenei ko Seela.” Ne fai a ia pena ki a Tamala i a ia e mataku i a Seela ma mate foki e pela mo ona taina. Tela ne foki ei a Tamala ki tena kaiga.

¹²E seki leva mai tua ifo kae mate mo te avaga a Iuta. I te otiga o aso ne tagi fanoanoa ei a ia, ne malaga atu ei laua mo tena taugasoa ko Hila, se tagata Atulama, ki te fenua o Timenata te koga tela e vele ei a fulufulu o ana mamoe.

¹³E isi se tino ne fai ki a Tamala i te tamana o tena avaga ko fano ki Timenata o vele a fulufulu o ana mamoe.

¹⁴Tela, ne tapale aka ei ne Tamala a gatu kola e masani o pei saale ki ei a fafine ko mate olotou avaga, kola ne pei ei a ia. Ne pono ana mata ki te veli, kae sagasaga i te mataloa o te fa'kai ko Enaima, e tu i te ala ki Timenata. E iloa lei eiloa ne Tamala i a Seela, te tamaliki tagata foliki eiloa a Iuta ko matua, kae seki tuku atu eiloa ke avaga laua.

¹⁵I te mateaga a Tamala ne Iuta, e leake nei a Iuta me se fafine tali tagata, me e pono ana mata ki te veli.

¹⁶Ne fanatu a Iuta ki a ia i tafa o te auala kae fai atu penei, “E fia tou togi?” E se iloa eiloa ne Iuta i te fafine tena ko te avaga a tena tamaliki. Muna a Tamala, “Se a te mea e aumai ne koe ki a au?”

¹⁷Muna a Iuta, “Ka avatu ne au se tamā kouti mai taku lafu.” Muna a Tamala, “Ko lei, kae tau o tuku mai ne koe se mea a koe ke tausi ne au ke oko ki te taimi e aumai ei ne koe te kouti.”

¹⁸Muna a Iuta, “Se a te mea e manako koe ke avatu ne au ke tausi ne koe ke oko ki te taimi e maua ei tau kouti?” Muna a Tamala, “Aumai tou pine fakailoga, mo tou tokotoko tena e pukepuke mai ne koe.” Tena ne tuku atu ei ne Iuta ki a ia a mea kona. Ne moe ei laua, ko Tamala eiloa ko faitama.

¹⁹Ne foki atu a Tamala, tapale tena veli kae toe pei ki ana gatu, ko gatu o te fafine ko mate tena avaga.

²⁰Ne uga ne Iuta tena taugasoa ko Hila ke fano o ave te kouti ki te fafine tela, kae fakafoki mai tena pine fakailoga mo tena tokotoko. Ne seki maua eiloa a te fafine tena ne Hila.

²¹Ne fesili atu a Hila ki tagata i Enaima penei, “Tefea te fafine tali tagata tela ne sagasaga i konei, i tafa o te auala?” Ne tali mai latou, “E seai eiloa se fafine tali tagata i koga konei.”

²²Ne foki atu a Hila ki a Iuta kae fai atu penei, “E seki maua ne au. A tagata i te koga tena e fai mai me e seai eiloa se fafine tali tagata i koga kona.”

²³Muna a Iuta, “Tuku ei ke puke ma ia a mea ne ave ne au ki ei. Au se manako ke kata mai a tino ki a taua. Au ne taumafai eiloa o togi a ia, kae ne seki maua ne koe a ia.”

²⁴E tusa mo te tolu o masina mai tua ifo kae lagona ne Iuta a te tala a te tino e tokotasi e fai atu ki a ia penei, “A Tamala, te avaga a tau tamaliki ne fano valevale ki tagata, kae nei tena ko faitama.” Ne fai te fakatonuga a Iuta, ke puke o ave o sunu.

²⁵I te taimi ne ave ei a Tamala ke sunu, ne uga tena fekau ki a Iuta mo ana pati penei, “Au ne faitama i te tagata tela e a ia a mea konei. Onoono ki ei kae 'mate aka me e a ai a mea kona, ko te pine fakamau mo tena uka, mo te tokotoko ei.”

²⁶Ne matea ne Iuta a mea kona me e a ia, tela ne fai aka ei a ia penei, “E tonu Tamala, ko oti ne se fai ne au te mea e tau, me seki tuku atu ne au a ia ke avaga mo taku tamaliki tagata ko Seela.” Tena seki toe moe eiloa a Iuta mo Tamala.

²⁷I te taimi ne fai ei ka fanau a Tamala, ne iloa ake me ka fanau mai ne ia se masaga.

²⁸I te taimi ne 'kono fita ei a ia, ne to mai ki tua te lima o te sua tamaliki, puke atu ei ki ei te fafine fakafanau o sai ki te laugatu kula kae fai aka penei, “Tenei te tamaliki e to muamua mai ki tua,”

²⁹kae ne fūti tena lima ki loto, kae to muamua mai tena taina. Muna a te fafine fakafanau, “Io, tena te auala ne to malō mai ei koe ki tua!” Tena ne fakaigoa ei a ia ko Pelesa.[92]

³⁰Oti aka, fanau mai tena taina mo te filo kula i tena lima, kae ne fakaigoa ko Sela.[93]