Read Te Tusi Tapu I Te Gana Tuvalu Lomiga Lua KENESE 4 Bible Online

KENESE 4 - Te Tusi Tapu I Te Gana Tuvalu Lomiga Lua bible

KENESE 4

¹A Atamu ne 'moe mo tena avaga, tela ne faitama ei tena avaga. Ne fanau a Eva, se tamaliki tagata kae fai aka mo ana pati penei, “Mai te fesoasoani o te Aliki tenei ne maua ei taku tama tagata,” tena ne fakaigoa ei ne ia ko Kaino.[18]

²Fakamuli ifo, ne toe fanau mai a Eva, ko Apelu. A Apelu ne fai mo tausi mamoe, ka ko Kaino se faifatoaga.

³I se taimi fakamuli ifo, ne aumai ne Kaino a fua o ana fatoaga mo fai tena taulaga ki te Aliki.

⁴Ka ko Apelu ne aumai ne ia te tama toekimua a te mamoe e tasi mai ana mamoe, o tamate, kae ofo atu ki te Aliki te vaega taua o te tamā mamoe tena. Ne fiafia te Aliki ki a Apelu mo tena taulaga,

⁵kae ne seki talia ne ia a Kaino mo tena taulaga. Ne ita Kaino, kae faipati kaitaua.

⁶Kae fai mai te Aliki ki a Kaino penei, “Ai a e ita ei koe? Ai a e mata kaitaua ei koe?

⁷Moi ne fai ne koe te mea tonu, e penei a koe e mata katakata;[19] kae ne fai ne koe te mea se lei, tela la, a te agasala e pili fatu eiloa ki tou mataloa, e fia pule ne ia koe, kae tau mo koe o fakatakavale.”

⁸Tena ne fai atu ei a Kaino ki tena taina ko Apelu penei, “Vau ke olo taua ki koga kola e tu ei fatoaga.” I te okoga o laua ki fatoaga, ne mafuli atu a Kaino, tamate eiloa ne ia tena taina.

⁹Ne fesili atu te Aliki ki a Kaino penei, “Tefea Apelu tou taina?” Kae tali atu a Kaino, “E seiloa ne au. Ai a ko au nei se tino tausi o toku taina?”

¹⁰Muna a te Aliki, “Ai a ko fai ei ne koe se mea mataga penei? A te toto o tou taina ko kalaga mai ki a au mai te laukele, e pela me se leo e kalaga mai ke taui atu.

¹¹A koe nei ko malaia, kae ko se toe mafai ne koe o galue te laukele. Ko oti ne inu ne te laukele te toto o tou taina, e pela eiloa me ne fakamaga tena gutu o tali tena toto i te tamatega ne koe.

¹²Kafai e taumafai koe o toki ne lakau kaina, ka seai ne mea e fua mai ne te laukele; a koe ka takasese i te lalolagi, seai se koga e nofo tumau ei koe.”

¹³Kae fai atu a Kaino ki te Aliki, “A te fakasalaga tenei ko tō 'mafa ki a au.

¹⁴Ko afuli ne koe au keatea mai te fenua, ke 'mao mo koe. Au ka takasese i te lalolagi, seai se koga e nofo tumau ei au, kae kafai e maua au ne se tino ko au ka tamate ne ia.”

¹⁵Kae ne tali atu te Aliki penei, “Ikai, kafai e tamate koe ne se tino, ka taui fakafitu ne au ki a ia e tusa mo tena mea ne fai ki a koe.” Tela ne fakamailoga ei ne te Aliki a Kaino ke mo a e tamate ne se tino e fetaui mo ia.

¹⁶Tela ne fano keatea ei a Kaino mai mua o te Aliki o nofo i te fenua e igoa ko “Nota” i te feitu ki te Saegala o Etena.

¹⁷Ne maua te tamaliki tagata a Kaino mo tena avaga, fakaigoa ne laua ko Enoka. Tena ne faite ei ne Kaino se fa'kai kae fakaigoa ki te igoa o te la tama.

¹⁸Ne fai te tama a Enoka ko Ilata, tela ko te tamana o Mesuala. Ne fai te tama a Mesuala ko Metusaeli, tela ko te tamana o Lameko.

¹⁹E tokolua avaga a Lameko, ko Ata mo Selau.

²⁰Ne fanau a Ata ko Iapalu, tela ko te tupuga o tino kola e tausi pulumakau, solofanua, mo nisi manu lata aka foki, kae e nofo i faleie.

²¹A tena taina ko Iupalu te tupuga o tino tata i kitala mo faili kae fai pese foki.

²²A Selau ne fanau ne ia a Tupalu Kaino, tela ne faite ne ia a vaega mea faigaluega valevale,[20] ki palasi mo fiti. Te tuagaene o Tupalu Kaino ko Naama.

²³Muna a Lameko ki ana avaga, “Ata mo Selau, fakalogo mai ki a au: Ko oti ne tamate ne au se tamataene me ne pago ne ia au.

²⁴Kafai e fakafitu te taui ki te tino e ta ne ia a Kaino, E fakafitu sefulu fitu te taui ki te tino e tamate ne ia au.”

²⁵Ne toe fai te tama a Atamu mo tena avaga, se tama tagata. Muna a Eva penei, “Ko tuku mai ne te Atua se tama e sui ei a Apelu tela ne tamate ne Kaino.” Tela ne fakaigoa ei ne ia ko Setu.[21]

²⁶Ne fai te tama a Setu, ko Enosa. Mai te taimi tena, ko fatoa kamata ei a tino o fakaaoga te igoa tapu o te Aliki i taimi o tapuakiga.