Read Te Tusi Tapu I Te Gana Tuvalu Lomiga Lua KENESE 40 Bible Online

KENESE 40 - Te Tusi Tapu I Te Gana Tuvalu Lomiga Lua bible

KENESE 40

¹I te aso e tasi, ne fai te mea 'se a te tagata fakatoka uaina a te tupu o Aikupito, e pela foki mo tena tino pule i te fakafete falaoa.

²Ne kaitaua te tupu ki te tokolua konei,

³tela ne pei ei ne ia laua ki te falepuipui tela e tu i loto i te fale o Potifala, te kapeni o te kau tiute; te koga foki tela e pei ei a Iosefa.

⁴E leva eiloa o la aso i te falepuipui, tela ne tuku atu ei ne Potifala a Iosefa ke tavini atu ki a laua.

⁵I te po e tasi, ne fai a miti a te tokolua kona, te tagata fakatoka uaina mo te tino pule i te fakafete, kae e kesekese eiloa a uiga o la miti.

⁶I te vauga a Iosefa ki a laua i te taeao, ne matea ne ia te mata fanoanoa i te tokolua kona.

⁷Ne fesili atu ei a ia penei, “Ai a e mata fanoanoa ei koulua i te aso nei?”

⁸Ne tali mai laua penei, “E isi ne ma miti ne fai, kae seai la se tino ke fakamatala aka ne ia a uiga o ma miti.” Muna a Iosefa, “Ko te Atua e tuku mai ne ia te poto i fakamatalaga o miti. Fakamatala mai a lua miti.”

⁹Muna te tagata fakatoka uaina, “I taku miti, ne matea ne au a te lakau ko te vine e tu i oku mua,

¹⁰mo ana kaula e tolu. I te taimi eiloa ne sae aka ei ona lau, ko ana pula foki eiloa ko sae ake, mo ana fuaga foki eiloa ko sulu.

¹¹I te taimi tena, a te ipu a te tupu e puke i oku lima, tela ne puke atu ei au ki fuagavine, o 'tau ki loto i te ipu, tuku ei ne au te ipu ki te tupu.”

¹²Muna Iosefa, “Tenei te uiga o tau miti: a kaula kona e tolu ko aso e tolu.

¹³Toe tolu mai nei aso kae ka fakasaoloto koe ne te tupu. Ka fakamagalo ne ia koe kae toe fakafoki koe ki tou tulaga. Ka toetuku sale eiloa ne koe a tena ipu uaina e pela eiloa mo aso ne galue sale ei koe o fakatoka ana uaina.

¹⁴Kae fakamolemole, masaua mai au mafai ko fanofano lei tou olaga i tau galuega, kae masaua o taku atu toku igoa ki te tupu kae fesoasoani mai ke tala au ki tua mo te falepuipui tenei.

¹⁵Au nei se tino ne puke muni mai i te fenua o tino Epelu, kae e seai foki eiloa se mea 'se a aku ne fai i te fenua tenei ko Aikupito, e 'tau ei au o pei ki te falepuipui.”

¹⁶I te lagonaga ne te tagata pule i te fakafete falaoa me e 'lei te uiga o te miti a te tagata fakatoka uaina, ne fai atu foki ei a ia ki a Iosefa penei, “E isi foki saku miti ne fai; au e miti atu me e amo ne au a kete falaoa e tolu i luga i toku ulu.

¹⁷A te kete tafa ki luga e fonu i vaega meakai e faite ki falaoa ma te tupu, kae ne kai ne manu eva.”

¹⁸Muna Iosefa, “Tenei te uiga o tau miti: a kete kona e tolu ko aso e tolu.

¹⁹Toe tolu mai nei aso kae ka tala koe ne te tupu, kae ave o kati tou ua! Ka fakatautau ne ia tou foitino i se lakau kae ka mai a manu eva o kai ou kano.”

²⁰E tolu aso mai tua ifo kae fai te aso fanau o te tupu, tela ne fai ei ne ia se kaiga lasi ki ana ofisa katoa. Ne tala mai ne ia a tena tagata fakatoka uaina, mo te tagata pule i fakafetega o falaoa, kae aumai ne ia ki mua o ana ofisa.

²¹Ne toe fakafoki ne ia te tagata fakatoka uaina ki tena tulaga mua,

²²kae kati ne ia te ua o te tagata pule i fakafetega o falaoa, e pela eiloa mo te fakamatalaga a Iosefa.

²³Ka ko te tagata fakatoka uaina, ne seki toe masaua eiloa ne ia a Iosefa.