Read Te Tusi Tapu I Te Gana Tuvalu Lomiga Lua KENESE 41 Bible Online

KENESE 41 - Te Tusi Tapu I Te Gana Tuvalu Lomiga Lua bible

KENESE 41

¹E lua tausaga mai tua ifo kae fai te miti a te tupu, i a ia e tu i tafa o te Vaitafe ko te Naila,

²kae olo ake mo pulumakau putaputa e fitu mai loto i te vaitafe o kaikai i mouku i tafa o te vaitafe.

³Ne toe olo ake a nisi pulumakau, ne pulumakau pa'ka e fitu, o tu i tafa o pulumakau putaputa i kaugutu o te vaitafe,

⁴te mea eiloa ko kai ne latou a pulumakau putaputa. I kona eiloa ko te tupu eiloa ko ala.

⁵Ne toe moe ifo te tupu, toe fai foki sua moemiti a ia. I tena moemiti tenei, ne lavea ne ia a fuaga saito e fitu kola ko lasi, kae sulu gali faka eiloa, kae somo katoa mai i te kau saito e tasi.

⁶Ne toe olo aka a nisi fuaga saito e fitu, kola e pa'ka kae se sulu fakalei me e pela me 'paku, e fai ne te matagi mai te koga lavaki.

⁷Ne folo ne fuaga saito pa'ka a fuaga saito puta. Ne pula aka te tupu, iloa ake ei ne ia i a ia ne moemiti.

⁸I te taeaoakega, ne mafaufau mafa te tupu ki tena miti, tela ne kami ei ne ia a tino fakataulaitu katoa mo tino poto katoa i luga i Aikupito. Ne fakamatala atu ne ia ana miti ki a latou, kae e seai eiloa se tino ne maua ne ia o fakamatala tena uiga.

⁹Tena, ne fai atu ei a te tagata fakatoka uaina ki te tupu penei, “E isi se mea se lei ko oti ne fai ne au.

¹⁰I te taimi ne ita ei koe ki a maua mo te pule fakafete falaoa, ne pei ne koe maua ki te falepuipui i te fale o te kapeni o sotia tiute.

¹¹I te po e tasi, ne fai ma miti, kae e kesekese eiloa o la uiga.

¹²E isi se tagata Epelu ne nofo tasi matou, se pologa a te kapeni o sotia tiute. Ne fakamatala a ma miti ki a ia, kae ne fakaasi mai ne ia a uiga.

¹³Ne taunu eiloa a uiga o ma miti, e pela eiloa mo tena fakamatalaga. Ne fakafoki mai ne koe a au ki toku tulaga kae tamate ne koe te pule fakafete falaoa.”

¹⁴Ne uga te fekau a te tupu ke aumai a Iosefa mai te falepuipui, tela ne aumai ei ki te tupu. I te otiga o Iosefa ne vele kae sui ona gatu, tela fano ei ki mua o te tupu.

¹⁵Muna te tupu ki a ia penei, “E isi saku miti ne fai kae seai se tino e mafai ne ia o fakamatala tena uiga. Au e logo i a koe e poto i te fakamatalaga o uiga o miti.”

¹⁶Muna Iosefa, “Tou malu, e seai se mea e mafai ne au, ko te Atua e fakaasi mai ne ia.”

¹⁷Muna te tupu, “Au ne miti i a au ne tutu i kaugutu o te Vaitafe ko te Naila,

¹⁸kae olo ake mo pulumakau putaputa e fitu mai loto i te vaitafe o kaikai i mouku.

¹⁹Fakamuli ifo toe olo aka foki a pulumakau pa'ka e fitu, ko toe pulumakau fakaalofa eiloa ne kau laveagina i luga i Aikupito.

²⁰Ne kai ne pulumakau pa'ka a pulumakau putaputa,

²¹kae e seai eiloa se tino e mafai o iloa ne ia, me e tumau eiloa te pa'ka o pulumakau kona. Tena, ko au eiloa ko pula.

²²Ne toe moe au, toe fai foki taku miti me e matea ne au a fuaga saito e fitu, ko lasi kae sulu gali faka eiloa, kae somo aka i te kau saito e tasi.

²³Ne toe olo ake e fitu fuaga saito pa'ka kae mage'mage e fai ne te matagi mai te koga lavaki;

²⁴ne folo ne latou a fuaga saito lasi kae sulu lei. Ne fakamatala ne au aku miti ki tino fakataulaitu, kae e seiloa ne latou a uiga.

²⁵Muna Iosefa ki te tupu, “A miti kona e lua e tasi te la uiga; ko oti ne fakaasi atu ne te Atua te mea ka fai ne ia.

²⁶A pulumakau putaputa kona e fitu ko tausaga e fitu, e pena foki a fuaga saito kona e fitu. E tasi te uiga o mea kona.

²⁷A pulumakau pa'ka kola ne fatoa olo aka mo fuaga saito pa'ka, ko te fitu tausaga o te oge.

²⁸E pena eiloa mo taku faiatuga, ko oti ne fakaasi atu ne te Atua te mea ka fai ne ia.

²⁹E fitu tausaga o te manuia mo te maumea i luga i te fenua katoa o Aikupito.

³⁰Ka tao mai ei ko te fitu tausaga o te oge. I te taimi tena, ka se toe masaua eiloa ne tino a tausaga o te maumea ne teka, me ka masei valevale te fenua i te oge.

³¹Ka se toe manatua eiloa a aso o te maumea, me i tausaga o te oge tela ka tao mai, ka se fakatau eiloa i te masei.

³²A te pogai ne moemiti fakalua ei koe ki te mea e tasi, e fakaasi ei me ko oti ne fakamoe ne te Aliki te mea tena ka tupu i se taimi pili mai.

³³“E tau o fili ne koe se tino poto ke pule i te fenua.

³⁴E tau foki o fili ne koe a nisi ofisa kae ke vae keatea ne latou te tasi vae lima o fuaga lakau i tausaga e fitu o te maumea.

³⁵Fakatonu atu ki a latou ke olo o tae meakai i tausaga o te maumea, ke teu fakalei, kae tuku atu foki ki a latou te pule ke teu a saito i te fa'kai kae ke leoleogina foki.

³⁶A meakai kona ka tausi ne ia a tino i tausaga e fitu o te oge tenei ka poko i luga i Aikupito. I te faiga tena ka se fiakai ei a tino.”

³⁷Ne 'loto a te tupu mo ana ofisa ki te fuafuaga a Iosefa,

³⁸tela fai atu ei te tupu ki ana ofisa penei, “Kaati la ko Iosefa eiloa te tino e tau ki te tofi tena, me se tagata e i a ia te agaga o te Atua.”

³⁹Muna te tupu ki a Iosefa, “Ko oti ne fakaasi atu ne te Atua ki a koe a mea katoa konei ne faipati mai ne koe, tela la, kaati e seai eiloa se tino e sili atu tena malamalama mo tena kilo mao i lo koe.

⁴⁰Ka fai koe ne au ke pule i luga i toku fenua, kae ka fakalogo atu foki ki a koe a tino katoa o toku fenua. E seai eiloa se pule e maluga atu i tau pule, na ko au fua eiloa.

⁴¹Ko fakasopo atu nei ne au a koe ke fai mo kovana i luga i Aikupito katoa.”

⁴²Ne tata aka ne te tupu te mama mai tena lima, tela e ta ei te fakailoga fakatupu, faulu atu ei ne ia ki te lima o Iosefa. Ne tuku atu foki ne te tupu se gatu loa, e faite ki lino, ki luga i a Iosefa, kae fakamau atu foki ki tena ua a te malele aulo, se malele fakatupu.

⁴³Ne tuku atu foki ki a ia a te lua o kaliota fakatupu ke teletele sale a ia i ei. E isi ne sotia e olo i ona mua e kalaga penei, “Fakaavanoa te auala! Fakaavanoa te auala!” Tena, ne fakasopo ei a Iosefa ke fai mo kovana i luga i Aikupito katoa.

⁴⁴Muna te tupu ki a Iosefa, “Au ko te tupu. A tau fakatonuga e fakalogo ki ei a tino katoa i luga i Aikupito.”

⁴⁵Ne fakaigoa ne te tupu a Iosefa ki a Sapena Paenea, se igoa Aikupito, kae ne tuku atu ke fai mo ana avaga, a Asenati, te tama fafine a Potifele, tela ko te faitaulaga i te fa'kai o Heliopolisi. I te taimi ne kamata ei a Iosefa o galue mō te tupu o Aikupito, ka ko tusa ei mo te tolu sefulu ona tausaga. Ne tiakina ne ia te palesi o te tupu o fanatu o asiasi te fenua katoa o Aikupito.

⁴⁶

⁴⁷I te fitu tausaga o te maumea, ne fua malosi a fatoaga,

⁴⁸kae ne tae katoa ne Iosefa o teu i fa'kai takitasi. I te fa'kai e tasi, ne teu ne ia i ei a fuaga o fatoaga kola e pili ki ei.

⁴⁹Ko oko eiloa i te uke o saito, tela la, ko se toe maua o fua, ko pela eiloa mo te uke o one o te tai.

⁵⁰E tokolua a tamaliki tagata a Iosefa i a Asenati, kae seki oko ki tausaga o te oge.

⁵¹Muna a Iosefa, “Ko oti ne fai ne te Atua ke puli i au oku logo'mae katoa, pela foki mo kaiga katoa o toku tamana”; ne fakaigoa ne ia tena tama tagata muamua ko Manase,[94]

⁵²Ne fai aka foki ana muna penei, “Ne aumai ne te Atua aku tamaliki konei i te fenua o oku fakalavelave”; ne fakaigoa ne ia tena tama tagata i te tokolua ko Efalaima.[95]

⁵³Ia, ko oti atu a tausaga o te maumea i luga o Aikupito,

⁵⁴kae ko kamata nei te fitu tausaga o te oge, e pela eiloa mo muna a Iosefa ne fai. Ne oge a fenua katoa i meakai, ka ko te fenua katoa o Aikupito e toka faeloa i meakai.

⁵⁵Kafai ko fiakai a tino Aikupito, e fakatagi atu latou ki te tupu ki ne meakai, kae e fakatonu atu ne ia ke olo ki a Iosefa, kae ke fakalogo ki so se mea e fai atu ne ia ki a latou.

⁵⁶Ne gasolo eiloa o fai masei te oge, tela ko salalau atu i luga i Aikupito katoa, tela ne tala ei ne Iosefa a fale teu meakai katoa o fakatau atu a saito ki tino Aikupito.

⁵⁷Ne o'mai a tino mai i nisi fenua o togi saito i a Iosefa, me i te oge ko oko eiloa i te fai masei i fenua katoa.