Read Te Tusi Tapu I Te Gana Tuvalu Lomiga Lua KENESE 43 Bible Online

KENESE 43 - Te Tusi Tapu I Te Gana Tuvalu Lomiga Lua bible

KENESE 43

¹Ne gasolo eiloa o fai masei te oge i Kanana,

²tela la, i te palelega o saito a te kaiga o Iakopo, kola ne aumai mai Aikupito, ne fai atu ei a Iakopo ki ana tama penei, “Toe olo o togi mai ne mu meakai ma tatou.”

³Muna a Iuta ki a Iakopo, “A te kovana o Aikupito ne faipati malosi mai eiloa ki a matou me e se mafai eiloa matou o olo atu ki ona mua kae galo Peniamina.

⁴Kafai e talia ne koe ke olo matou mo Peniamina, ko olo ei matou o togi mai ne meakai.

⁵Kafai e se talia ne koe, e se olo foki matou, me i te tagata tela ne fai mai ke mo a eiloa matou e sae atu i ona mua kae galo Peniamina.”

⁶Muna Iakopo, “Ai a ne fakapuapuaga ei ne koutou au, o taku atu ki te tagata tena me e isi aka foki se otou taina?”

⁷Ne tali mai latou penei, “I te mea la e fesilisili faeloa ki te tou kaiga; muna ia, ‘E a koi ola te otou tamana? E isi aka foki se otou taina aka?’ E tau la mo matou o tali a fesili kona. E iloa foki la pefea ne matou me ka fai mai ke olo atu matou mo te motou taina?”

⁸Muna a Iuta ki tena tamana, “Tuku mai Peniamina ke olo matou, ke na olo matou; ke mo a e mate tatou i te fiakai.

⁹Ka tausi fakalei ne au a ia, ka ko au foki ka fakasala mafai e isi se mea e tupu ki a ia. Kafai e isi se mea e tupu ki a ia, a te sala e paku eiloa ki a au.

¹⁰Moi ne seki faka'lave matou ne te mea tena, penei ko leva eiloa matou ne foki fakalua mai Aikupito.”

¹¹Muna te lotou tamana, “Kafai se mea e tau ke fai pena, ke ave la ne koutou ne mea taua eiloa o te tou fenua mo fai meaalofa ki te kovana, ne mu pulukau, mu hani, mu mea fakamanogi, mu fuaga o te niu piu mo ne alamoni.

¹²Ave ke uke otou tupe, me e tau o toe fakafoki ne koutou a tupe kola ne maua ne koutou i loto i otou taga. E se taumate kaati se mea 'se mai i a latou.

¹³Puke te otou taina kae na olo.

¹⁴A te Atua Malosi ke fai ne ia te tagata tena ke alofa atu ki a koutou, ko te mea ke tuku atu ne ia ki a koutou a Peniamina mo Simeona. Ka ko au, kafai se mea eiloa ko fai ke galo aku tama, seai foki la se mea e mafai ne tatou o fai.”

¹⁵Tena, puke aka ne tautaina a meaalofa mo tupe e faluaina i te uke, kamata ei te malaga a latou ki Aikupito, fakatasi mo Peniamina. I kona, ne olo atu ei latou ki mua o Iosefa.

¹⁶I te mateaga ne Iosefa i a Peniamina e o'mai mo latou, tela ne fai atu ei a ia ki te tavini pule i tena fale penei, “Taki atu a tagata konei ki toku fale, me ka kai fakatasi mo au i te tutonu nei; tela la, ta mai se manu kae fakatoka fakalei.”

¹⁷Ne fai eiloa ne te tavini te fakatonuga a Iosefa, tela ave ei ne ia a tautaina kona ki te fale o Iosefa.

¹⁸I te taimi ne ave ei latou ki te fale, ne mataku latou kae mafaufau aka penei. “A tatou ko aumai ki konei ona ko tupe kola ne fakafoki mai i tou taga i te taimi muamua. E iku o puke ne latou a tatou, fao tou asini kae fai tatou mo ana pologa.”

¹⁹Tena, i te okoatuga o latou ki te mataloa o te fale, ne fai atu ei latou ki te tavini pule penei,

²⁰“Tou malu eiloa, a matou nei ne o'mai foki ki konei muamua o togi meakai.

²¹I te motou auala o foki, ne manava matou i se koga e tasi o moe i ei i te po, kae i te talaga o motou taga saito, ne maua atu ne matou a motou tupe e tuku mai i omotou taga ko te katoaga eiloa o omotou tupe takitokotasi. Tenei la ko toe aumai ne matou o toetuku atu ki a koe.

²²E isi aka foki ne tupe ne au'mai mo matou ke toe togi aka ne omotou meakai. E seiloa ne matou me ko oi te tino ne toetuku ne ia a omotou tupe ki omotou taga.”

²³Muna a te tavini tena penei, “Sa manavase. Sa mataku. E se taumate, ko te otou Atua, te Atua o te otou tamana ne fakafoki atu ne ia otou tupe ki loto i otou taga. A te togi o otou meakai ne maua eiloa ne au.” Oti aka, aumai ei ne ia a Simeona ki a latou.

²⁴Ne taki atu ne te tavini tena a tautaina kona ki loto i te fale, tuku atu ne ia ne vai mo fulu olotou vae, kae fano ei a ia o fagai olotou asini.

²⁵Ne fakatoka olotou meaalofa, ke tuku ki a Iosefa mafai e oko mai i te tutonu, me ko oti ne iloa ne latou i a latou e kai mo Iosefa.

²⁶I te okomaiga o Iosefa, ne olo atu latou mo olotou meaalofa ki loto i te fale, o tuku atu ki a Iosefa. Tena, ne ifo atu ei latou i ona mua.

²⁷Ne fesili atu a Iosefa me e a latou, kae fai atu penei, “A koutou ne fai mai i te otou tamana ko matua, e a la nei a ia, koi ola mo te malosi me ikai?”

²⁸Ne tali atu latou penei, “A tau tavini tena ko te motou tamana, e malosi faeloa.” Tena ne totuli ei latou o ifo i ona mua.

²⁹I te mateaga ne Iosefa a Peniamina, ne fai atu ei a ia penei, “Io, tenei te otou taina tela ne fai mai ei koutou ki a au. Ke fakamanuia atu te Atua ki a koe, taku tama.”

³⁰Tena, ne fano fakavave a Iosefa keatea mo latou, me ko oko atu ki a ia te loto alofa ki tena taina. Toe itiiti eiloa kae tagi a Iosefa i olotou mua, tela ne fano ei ki tena potu o tagi i ei.

³¹I te otiga ne mulu fakalei o ona mata, ne ulu mai ei a ia ki tua ki ona taina. Ne taumafai eiloa a Iosefa o fa'ki tena tagi, kae fakatonu atu ki ana tavini ke na laulau aka a meakai.

³²A Iosefa e kai i te taipola e tasi, ka ko ana taina e kai i te isi taipola. A tino Aikupito i kona e kai foki i te taipola fakaatea, me i olotou mafaufauga, e se tau latou o kai fakatasi mo tino Epelu me ne tino se aoga fua.

³³A taina o Iosefa e sagasaga i te taipola tela e fakafesagai ki a Iosefa, kae e nofo eiloa latou, e fakasolo fakalei eiloa mai te tino matua ke oko ki te tino foliki. I te mateaga ne latou i a latou e fakanofo pena, ne fakatau kilokilo aka latou mo te ofo me ko oi ne fakanofo ne ia latou pena.

³⁴A meakai ne laulau mai ki a latou mai te taipola a Iosefa, ka ko Peniamina ne laulau ki ei e lima taimi te uke o meakai kola e laulau ki ona taina. Tena, ne kai kae inu ei latou mo Iosefa ko te mea eiloa ko konā.