Read Te Tusi Tapu I Te Gana Tuvalu Lomiga Lua KENESE 45 Bible Online

KENESE 45 - Te Tusi Tapu I Te Gana Tuvalu Lomiga Lua bible

KENESE 45

¹Ne seki toe maua eiloa ne Iosefa o toe fa'ki atu tena alofa ki ona taina, tela ne fakatonu atu ei a ia ki ana tavini katoa ke olo ki tua mo te potu tela e nofo ei latou. E seai eiloa se tino fakaatea i te fale, i te taimi ne fakaasi atu ei ne Iosefa ki ona taina i a ia ko Iosefa.

²Ne tagi malosi ki luga a Iosefa tela ko lagona mai ne tino Aikupito, ko te tala foki eiloa ko oko ki te palesi o te tupu.

³Muna Iosefa ki ona taina, “Au nei ko Iosefa. E a, koi ola toku tamana?” I te lagonaga ne taina o Iosefa te mea tenei, ne polepole latou i te mataku tela ko se maua ei ne latou o tali atu ki a Iosefa.

⁴Tena ne fai atu ei a Iosefa ki a latou penei, “Fakamolemole soloki mai.” Ne mumea atu latou ki a Iosefa, kae fai mai Iosefa penei, “Au nei ko te otou taina ko Iosefa, tela ne fakatau atu ne koutou ki Aikupito.

⁵Kiloke, sa mafaufau pela me ko oko eiloa i te masei o te otou mea ne fai, i te fakatau atuga ne koutou a au ki konei. Ko te Atua eiloa ne uga mai ne ia a au i otou mua ke fakasao ne au a ola o tino.

⁶Fatoa lua nei tausaga o te oge i te fenua; kae toe lima mai tausaga tela ka seai ne tino e fakamalu laukele io me ne tino e kati saito.

⁷Ne uga mai au ne te Atua i otou mua o fakasao koutou i se vaega auala fakaofoofogina penei, ko te mea foki ke ola koutou mo otou gafa.

⁸Tela la, e se ko koutou ne aumai ne koutou a au ki konei, kae ko te Atua. Ne fai ne ia a au mo ofisa maluga eiloa a te tupu. Au e pule i tena fenua katoa; au ko te takitaki o Aikupito katoa.

⁹“O'mai nei o foki fakavave ki toku tamana kae fai atu ki a ia me konei a pati a tena tama ko Iosefa: ‘Ko oti ne fai ne te Atua a au ke fai mo takitaki o te fenua katoa o Aikupito; vau fakavave ki a au i konei.

¹⁰Ka fakanofo ne au a koe i te kogā laukele o Kosena, ke pili mai koe ki a au; ko koe mo au tamaliki, ou mokopuna, au mamoe, au pulumakau mo au kouti, fakatasi mo mea katoa a koe.

¹¹Kafai e nofo koe i Kosena, ka mafai ei ne au o tausi a koe. E toe lima nei tausaga o te oge; tela la, e se manako au ke mate koe i te fiakai, e pena foki tou kaiga, mo au manu.”’

¹²Ne faipati atu eiloa a Iosefa, muna ia, “Ko matea nei ne koutou katoa, e pena foki koe e Peniamina, i a au ko Iosefa eiloa.

¹³Fai atu ki toku tamana i au ko maluga eiloa i konei, i Aikupito, kae fakamatala atu foki ki a ia a mea katoa ko oti ne matea ne koutou. Ka oti, ko na fakavavave eiloa o aumai a ia ki konei.”

¹⁴Tena, ne sai atu a ia ki tena taina ko Peniamina kae tagi, ne tagi foki a Peniamina i te saiatuga ki a Iosefa.

¹⁵Ne sai fakatalofa atu foki a ia ki ona taina, kae sogi atu ki a latou, kae e tagi faeloa. Oti atu ei, ko ia eiloa ko sautala mo ana taina.

¹⁶I te okoatuga o te tala ki te palesi, i taina o Iosefa ko oti ne oko mai, ne fiafia malosi te tupu mo ana ofisa.

¹⁷Muna te tupu ki a Iosefa, “Fai ki ou taina ke fakauta olotou asini kae foki atu ki te fenua o Kanana.

¹⁸Fai ki ei ke puke mai te lotou tamana kae foki mai ki konei. Ka tuku ne au ki a latou te kogā laukele tafasili i te lei i Aikupito, kae ka uke a mea e maua ne latou.

¹⁹Fai atu foki ki a latou ke ave ne ka mai Aikupito mo fakasopo mai olotou avaga mo olotou tamaliki foliki, kae ke o'mai foki mo te lotou tamana.

²⁰Ke mo a e manavase latou mafai e tiakina olotou kopekopega i Kanana; ka tuku atu ne au ki a latou a mea lei katoa e maua i te fenua o Aikupito.”

²¹Ne fai eiloa ne tama a Iakopo te mea ne fai atu ki a latou. Ne tuku atu ne Iosefa ki a latou a ka, e pela eiloa mo te fakatonuga a te tupu, fakatasi mo meakai e kai ei latou i te lotou malaga.

²²Ne tuku atu foki ne Iosefa a gatu fou mo sui olotou gatu, ka ko Peniamina ne tuku ne ia ki ei e selau siliva, kae lima gatu fou.

²³Ne ave ne ia ki tena tamana, e sefulu asini e fakauta ki koloa faka Aikupito, kae sefulu asini e fakauta ki saito, falaoa mo nisi meakai mo te malaga.

²⁴Ne tuku atu ne ia ona taina ke olo kae fai atu mo tena muna penei, “Sa fakakinau i te ala.”

²⁵Tena, ne tiakina ei ne latou a Aikupito o foki atu ki te lotou tamana ko Iakopo i Kanana.

²⁶I te okoatuga o latou, ne fai atu latou ki a Iakopo penei, “A Iosefa koi ola! Ko ia ko te takitaki o Aikupito katoa!” Ne poko malo Iakopo i te tala tena, tela ne seki talitonu ei a ia ki a latou.

²⁷Kae i te fakamatala atuga ne latou a pati a Iosefa, kae matea aka foki ne ia a ka kola ne aumai ne Iosefa mo avatu a ia ki Aikupito, ne noga ifo ei tena poi.

²⁸Muna ia, “A taku tama ko Iosefa koi ola! Tenei eiloa te mea e tasi e manako au o fai. E tau mo au o fano o asi ki ei koi tuai au o mate.”