Read Te Tusi Tapu I Te Gana Tuvalu Lomiga Lua KENESE 46 Bible Online

KENESE 46 - Te Tusi Tapu I Te Gana Tuvalu Lomiga Lua bible

KENESE 46

¹Ne fakatoka katoa a kope o Iakopo, te mea eiloa ko malaga atu ki Pelesepa o ofo atu tena taulaga ki te Atua o tena tamana ko Isaako.

²Ne fakaasi atu ki a ia a te Atua i te po, kae kalaga atu penei, “Iakopo, Iakopo!” Ne tali atu Iakopo, “Io, au tenei.”

³Muna a te Atua, “Au ko te Atua, te Atua o tou tamana. Sa mataku o fano ki Aikupito; ka fai ne au tou gafa mo malo lasi i kona.

⁴Ka fanatu au o olo tasi mo koutou ki Aikupito, kae ka toe fakafoki mai ne au tou gafa ki te fenua tenei. A Iosefa ka nofo i ou tafa mafai e mate koe.”

⁵Tena, ne tiakina ei ne Iakopo te fa'kai tena o Pelesepa. Ne fakasopo atu ne ana tamaliki a ia, fakatasi mo olotou tamaliki foliki mo olotou avaga ki luga i ka kola ne aumai ne te tupu o Aikupito.

⁶Ne ave katoa ne latou ki Aikupito a olotou manu mo kope katoa o latou kola ne maua i te fenua o Kanana. Ne ave katoa ne Iakopo a tino katoa o tena gafa:

⁷ko ana tama tagata, ko ana mokopuna tagata, ko ana tama fafine pela foki ana mokopuna fafine.

⁸Konei a igoa o tino o te kaiga o Iakopo ne olo mo ia ki Aikupito: ko Leupena tena ulumatua mo tamaliki a Leupena:

⁹ko Hanoka, ko Palu, ko Heselona, mo Kami.

¹⁰Ko Simeona mo ana tamaliki: ko Iemuelu, ko Iamina, ko Ohata, ko Iakini, ko Soala mo Saula, te tama a te fafine Kanana.

¹¹Ko Levi mo ana tama tagata: ko Kelesona, ko Koate, mo Melali.

¹²Ko Iuta mo ana tama tagata: ko Seela, ko Pelesa, mo Selau. A nisi tamaliki a Iuta kola ko Elu mo Onanu ko oti ne mate i Kanana. A tama tagata a Pelesa: ko Heselona mo Hamola.

¹³Ko Isakala mo ana tama tagata: ko Toula, ko Pua, ko Iasupa mo Similona.

¹⁴Ko Sepulona mo ana tama tagata: ko Seleti, ko Eloni, mo Ialeli.

¹⁵Kona a tama tagata a Iakopo i a Lea i Mesopotamia, mo Tina ei te tamaliki fafine. A te katoaga o te gafa o Iakopo i tena avaga ko Lea e tusa mo te tino tolu mo te tokotolu.

¹⁶Ko Kato mo ana tama tagata: ko Sefono, ko Haki, ko Suni, ko Esepono, ko Eli, ko Alota, mo Aleli.

¹⁷Ko Asela mo ana tama tagata: ko Imina, ko Isiva, ko Isivi, ko Pelia mo te lotou tuagaene ko Selau. A tamaliki a Pelia ko Hepela mo Malakielu.

¹⁸A te tinogafulu mo te tokoono konei ko te gafa o Iakopo i a Selepa, te tavini fafine ne tuku ne Lapana ki tena tama fafine ko Lea.

¹⁹E tokolua tamaliki a Iakopo i a Lasela: ko Iosefa mo Peniamina.

²⁰E tokolua tama tagata a Iosefa ne fai i Aikupito, ko Manase mo Efalaima; ne fai i a Asenati, te tama fafine a Potifele te faitaulaga i Heliopolisi.

²¹A tamaliki a Peniamina, ko Pela, ko Pekali, ko Asepelu, ko Kela, ko Naamanu, ko Ei, ko Lose, ko Mepimu, ko Hupima mo Alata.

²²A te tinogafulu mo te tokofa konei, ko te gafa o Iakopo i a Lasela.

²³Ko Tanu mo tena tama tagata ko Husima.

²⁴Ko Nafatali mo ana tama tagata: ko Iaseeli, ko Kuni, ko Iesela mo Silema.

²⁵A te tokofitu konei ko te gafa o Iakopo i a Pila, te tavini fafine tela ne tuku ne Lapana ki tena tama fafine ko Lasela.

²⁶Te katoaga o tino o te gafa o Iakopo kola ne olo ki Aikupito e tusa mo te tinoono mo te tokoono, e se aofia ei a avaga a ana tama tagata.

²⁷E tokolua tama tagata a Iosefa i Aikupito, tela ko tusa ei mo te tino fitu te katoaga o tino o te gafa o Iakopo ne olo ki Aikupito.

²⁸Ne uga ne Iakopo a Iuta ke fano i olotou mua o fai ki a Iosefa ke fakafetaui atu ki a latou i Kosena. I te okoatuga o latou,

²⁹ne sopo Iosefa ki tena kaliota o fano ki Kosena o fakafetaui ki tena tamana. I te fetauiga a laua, ne sai atu a Iosefa ki te ua o tena tamana kae tagi, ne tai leva eiloa tena tagiga.

³⁰Muna a Iakopo ki a Iosefa, “Au ko toka o mate me ko oti ne matea ne au a koe, ka ko iloa foki ne au i a koe koi ola.”

³¹Tena ne fai atu ei a Iosefa ki ona taina mo te kaiga katoa o tena tamana penei, “Au ka fano o fakailoa ki te tupu i oku taina mo te kaiga katoa o toku tamana, kola ne nofo i Kanana, ko oti ne oko mai.

³²Ka fakailoa ne au ki a ia i a koutou ne tino tausi mamoe, kae tausi manu fagai foki; ka ko koutou ne o'mai mo otou lafu manu, mo mea katoa kola e a koutou.

³³Kafai e kalaga atu te tupu ki a koutou kae fesili atu me se a te galuega e fai sale ne koutou,

³⁴masaua o tali ki ei i a koutou ne tino tausi manu i otou olaga katoa, e pela eiloa mo otou tupuna. Kafai e tali koutou pena, ka fakanofo ne ia koutou i te kogā laukele o Kosena.” Ne fai a Iosefa ke fai pena me e iloa ne ia i tino Aikupito e se kosukosu sale ne latou a tino tausi manu.