Read Te Tusi Tapu I Te Gana Tuvalu Lomiga Lua KENESE 47 Bible Online

KENESE 47 - Te Tusi Tapu I Te Gana Tuvalu Lomiga Lua bible

KENESE 47

¹Tena ne puke ei ne Iosefa e tokolima mai ona taina, ke olo mo ia ki te tupu. Muna ia ki te tupu, “Ko oti ne oko mai toku tamana mo oku taina mai Kanana, fakatasi mo olotou lafu manu mo olotou mea katoa. Konei la e nofo nei i te fa'kai o Kosena.”

²Tena, ne fakaasi atu ei ne ia ona taina ki te tupu.

³Ne fesili atu te tupu ki taina o Iosefa penei, “Se a te galuega e fai sale ne koutou?” Ne tali mai latou penei, “Tou malu, a matou ne tino tausi mamoe, e pela eiloa mo omotou tupuna.

⁴A matou nei ne o'mai o nofo i te fenua tenei, me i te oge i te fenua o Kanana ko oko eiloa i te fai malosi, tela la, ko seai eiloa ne mouku ke kaikai ei motou manu. Fakamolemole, talia mai ke nofo aka matou i te kogā laukele o Kosena.”

⁵Muna te tupu ki a Iosefa penei, “ia, ko oko mai nei a tou tamana mo ou taina,

⁶a te fenua o Aikupito e o latou. Tuku atu latou ke nofo i te kogā laukele o Kosena, te koga tafasili i te lei i te fenua. Kae kafai e isi ne tino malosi i a latou, ko tuku mai ke tausi ne latou aku lafu manu.”

⁷Oti aka, puke mai ei ne Iosefa a tena tamana ko Iakopo o fakaasi atu ki te tupu. Ne fakamanuia atu ne Iakopo a te tupu,

⁸kae ne fesili mai a te tupu ki a Iakopo penei, “Ko fia nei ou tausaga?”

⁹Ne tali atu a Iakopo penei, “Ko tusa nei mo te selau tolusefulu tausaga o toku olaga, se olaga e lasi eiloa ki te maumausolo. E se uke malosi oku tausaga e pela mo tausaga o oku tupuga, kae ne tausaga faigata.”

¹⁰Tena, kae toe fakamanuia atu ei ne Iakopo a te tupu.

¹¹Ne fakanofo ei ne Iosefa a tena tamana mo ana taina i Aikupito, kae tuku atu foki ki a latou ne manafa, i koga lei eiloa o te fenua, koga pili ki te fa'kai o Lamese, e pela eiloa mo te fakatonuga a te tupu.

¹²Ne fakatoka ne Iosefa a meakai mo tena tamana, ona taina mo tino katoa i te kaiga o tena tamana, ke oko eiloa ki te toe tamaliki foliki eiloa.

¹³Ne fai masei eiloa te oge, ko seai eiloa se meakai e maua i so se koga, tela la, a tino Kanana mo tino Aikupito ko vaivai eiloa i te fiakai.

¹⁴A tupe a latou, kola e togi sale ei olotou saito e puke ne Iosefa o ave ki te palesi.

¹⁵I te palelega o tupe a tino katoa i luga i Aikupito mo Kanana, ne o'mai a tino Aikupito ki a Iosefa kae fai atu penei, “Aumai ne motou meakai. Sa tukugina matou ke mate. Fai aka sau faiga ki a matou. A omotou tupe ko palele katoa.”

¹⁶Ne tali atu a Iosefa penei, “Aumai otou manu fagai, mo togi otou meakai mafai ko seai ne otou tupe.”

¹⁷Tela, ne aumai ei ne latou olotou manu, ko solofanua, mamoe, kouti, pulumakau mo asini, ki a Iosefa, e togi ki ei olotou meakai. I te tausaga tena, ne tuku ne Iosefa a meakai ki a latou kae togi ki manu fagai.

¹⁸I te tausaga mai tua ifo, ne toe o'mai latou ki a Iosefa kae fai ki a ia penei, “Tou malu, ko fakaasi tonu atu ne matou ki a koe, i motou tupe ko seai eiloa ka ko omotou manu kona katoa ko nofo mo koe. Ko seai eiloa se mea e toe ke tuku atu ki a koe, na ko omotou foitino eiloa mo omotou manafa.

¹⁹Sa tukugina matou ke mate. Fai aka sau faiga! Fai aka ke mo a e mate matou, i omotou manafa ma tuku tiaki fua pela. Tuku mai ne meakai kae ke togi atu ki omotou foitino mo omotou manafa. Ka fai matou mo pologa a te tupu, kae ka fai foki mo ia motou manafa. Tuku mai ne saito ke ola matou, mo ne fuaga ke toki i omotou laukele.”

²⁰Tena, ne togi ei ne Iosefa a manafa katoa i luga i Aikupito ma te tupu. A tino Aikupito katoa ne fakatau atu katoa olotou manafa, ona eiloa ko te fai malosi o te oge; tela la a manafa katoa ko puke katoa ma te tupu.

²¹Ne fakapologa ne Iosefa a tino katoa, mai sua mata o Aikupito ki te sua mata.

²²E tasi eiloa te kogā laukele e seki togi ne ia, ko te koga tela e nofo i ei a faitaulaga. Ne seki fakatau atu te lotou kogā fenua, me e isi eiloa se tupe e tuku sale ne te tupu ki a latou mo olotou kai.

²³Muna Iosefa ki tino, “Ko lavea nei ne koutou me ko oti ne togi ne au a koutou mo otou manafa mo te tupu. Konei la a fuaga ke toki ne koutou i otou fatoaga.

²⁴I te taimi e kati ei otou fatoaga me ko 'lei i te kai, e tau mo koutou o tuku ki te tupu e tusa mo te tasi vae lima i otou mea e maua. A te toega e fakaaoga eiloa ne koutou mo otou kaiga.”

²⁵Ne tali atu latou penei, “Tou malu, a matou ko ola i a koe, a koe ne fai fakalei mai ki a matou, ka ko talia nei ne matou ke fai matou mo pologa a te tupu.”

²⁶Tela, ne fai ei ne Iosefa te tulafono tenei ke tausi ne tino katoa; i te taimi e kati ei a saito a so se tino, e tau o tuku ne ia e tasi vae lima ma te tupu. A te tulafono tena e mautakitaki eiloa ke oko mai ki aso nei. Ko te koga fua tela e nofo ei a faitaulaga e seki fakatau atu ki te tupu.

²⁷A te kau Isalaelu ne nofo i Aikupito, i te kogā laukele o Kosena, kae ne gasolo ake eiloa o uke olotou mea, kae tokouke foki olotou tamaliki.

²⁸Ne nofo Iakopo i Aikupito e tusa mo te sefulu fitu tausaga, tela ko tusa ei mo te selau fasefulu fitu ona tausaga.

²⁹I te taimi ko pili ei a ia o mate, ne kalaga atu a ia ki a Iosefa kae fai atu penei, “Faulu mai tou lima ki lalo i oku vasia kauaga[97] kae fai se tautōga tumau me ka se tanu ne koe a au i Aikupito.

³⁰Au e manako ke tanu au i te koga e tanu ei toku tamana mo oku tupuga; ave eiloa au keatea mo Aikupito, o tanu i te koga e tanu ei latou.” Ne tali atu a Iosefa, “Ka fai eiloa ne au a te mea e manako koe ki ei.”

³¹Muna Iakopo, “Tauto mai me e fai eiloa ne koe.” Tena ne tauto ei a Iosefa, ko Iakopo eiloa ko fai tena fakafetai i luga i tena moega.