Read Te Tusi Tapu I Te Gana Tuvalu Lomiga Lua KENESE 48 Bible Online

KENESE 48 - Te Tusi Tapu I Te Gana Tuvalu Lomiga Lua bible

KENESE 48

¹I se taimi fakamuli, ne oko atu te fakailoaga ki a Iosefa i tena tamana ko masaki. Tena ne puke aka ei ne Iosefa ana tamaliki tagata e tokolua, ko Manase mo Efalaima, olo atu ei o asi ki a Iakopo.

²I te logoga a Iakopo i tena tama ko Iosefa ko vau o asi a ia, tela ne fakamalosi aka eiloa a ia o sagasaga ki luga, i tena moega.

³Muna Iakopo ki a Iosefa, “A te Atua Malosi ne fakaasi mai ki a au i Lusa, i te fenua o Kanana, kae fakamanuia ne ia a au.

⁴Muna a ia ki a au penei, ‘Ka fakatokouke ne au tau fanau, ko te mea ko tou gafa ke tupu mai i ei a malo e uke; ka tuku atu ne au te fenua tenei ki tino o tou gafa ke fai mo tofi o latou ki te se gata mai.”’

⁵Ne faipati eiloa a Iakopo, muna ia, “Iosefa, a au tama tagata e tokolua kola ne fanau i Aikupito kae seki oko mai a au, e a aku; a Efalaima mo Manase e pau eiloa mo aku tama, e pela eiloa mo Leupena mo Simeona.

⁶Kafai e toe isi aka foki ne au tamaliki, ka se taku pela me ne aku tama. A te mea e maua ne latou e auala mai i a Efalaima mo Manase.

⁷Ko fai ne au a te mea tenei, ona eiloa ko tou matua ko Lasela. Ne mate atu a ia mo toku fanoanoa lasi, i te fenua o Kanana, tela e pili ki Efalata, i te taimi ne foki mai ei au mai Mesopotamia. Ne tanu ne au a ia i kona, i tafa o te auala ki Efalata.” A Efalata i aso nei ko Peteleema.

⁸I te mateaga ne Iakopo a tama a Iosefa, ne fesili atu a ia penei, “Ko oi tamaliki konei?”

⁹Ne tali atu a Iosefa, “Ko aku tamaliki kona, ne aumai ne te Atua i te fenua o Aikupito.” Muna Iakopo, “Aumai ki oku mua, ke fakamanuia atu ne au.”

¹⁰A mata o Iakopo ko se lei malosi ona eiloa ko te matua, tela ko se lei ei tena kilokilo. Ne tuku atu ne Iosefa ana tama kia a Iakopo tela ne sai atu ki a laua kae sogi atu ki a laua.

¹¹Muna Iakopo ki a Iosefa, “Au ne seki toe mafaufau eiloa me e toe lavea ne au a koe, kae nei ona ko faiga a te Atua, tenei ko lavea ei ne au, se ko koe fua, ka ko au tama foki.”

¹²Tena ne puke mai ei ne Iosefa ana tama mai vae o Iakopo o fakaifo atu ki a Iakopo.

¹³Ne tuku atu ne Iosefa a Efalaima ki te feitu fakamaui o Iakopo, ka ko Manase ki te feitu fakaatamai.

¹⁴Ka ko Iakopo ne fepeiaki ona lima, tela la, ko tena lima fakaatamai e tuku ki te ulu o Efalaima tela ko te tama foliki, ka ko tena lima fakamaui e tuku ki luga i te ulu o Manase, te tama matua.

¹⁵Tena, ne fakamanuia ne ia a Iosefa[98] “Ke fakamanuia a tamaliki tagata kona ne te Atua tela e tavini ki ei toku tamana ko Isaako mo toku tupuna ko Apelaamo. Ko te Atua tela ne takitaki mai ne ia a au ke oko mai eiloa ki te aso nei ke fakamanuia atu ki a laua!

¹⁶Ke fakamanuia atu ki a laua a te agelu tela ne fakasao ne ia a au mai fakalavelave katoa! A toku igoa mo te igoa o toku tamana ko Isaako, Mo te igoa o toku tupuna ko Apelaamo ke manatua faeloa e auala i tamaliki tagata konei! Ke tokouke a la fanau, ke lasi te la gafa!”

¹⁷Ne tai se fiafia a Iosefa i te mateaga ne ia a tena tamana e tuku tena lima fakaatamai ki te ulu o Efalaima; tela ne puke aka a ia ki te lima fakaatamai o tena tamana o tuku ki te ulu o Manase.

¹⁸Muna Iosefa ki tena tamana, “Toku tamana, e 'se te tukuga o ou lima. Tenei loa te tama matua; tuku mai tou lima fakaatamai ki tena ulu.”

¹⁹Ne ita tena tamana, muna ia, “Taku tama, e iloa ne au taku mea e fai. A te gafa o Manase se gafa ka takutakua foki. Ka ko tena taina foliki ka sili atu i a ia, ka ko tena gafa ka fai mo malo takutakua.”

²⁰Tela, ne fakamanuia ne ia laua i te aso tena, muna a ia, “Ka fakaaoga ne tino Isalaelu o lua igoa i taimi e faipati ei latou ki fakamanuiaga. Ka fai olotou pati penei, ‘Ke fai koutou ne te Atua e pela mo Efalaima mo Manase.’ ” I te faiga tena, ne fakatomua ei ne Iakopo te igoa o Efalaima i te igoa o Manase.

²¹Tena ne fai atu ei a Iakopo ki a Iosefa penei, “Ko lavea mai ne koe i a au ko pili o mate, ka ko te Atua ka fakatasi atu eiloa ki a koe, kae ka fakafoki ne ia a koe ki te fenua o ou tupuga.

²²A Sekema e tuku atu ne au ki a koe, kae se ki ou taina. Te koga tena se koga laukele ola tela ne fao ne au mai tino Amoli ki taku pelu mo taku kausana.”