Read Te Tusi Tapu I Te Gana Tuvalu Lomiga Lua KENESE 49 Bible Online

KENESE 49 - Te Tusi Tapu I Te Gana Tuvalu Lomiga Lua bible

KENESE 49

¹Ne kalaga atu a Iakopo ki ana tama tagata kae fai atu penei, “O'mai ki oku mua, ke fakamatala atu ne au a mea ka tupu ki a koutou i aso fakamuli:

²“Tama a Iakopo, maopoopo mai o fakalogo ki aku muna. Fakalogo mai ki te otou tamana ko Isalaelu.

³Taku toekimua ko Leupena, a koe ko toku malosi Ka ko taku tamaliki muamua foki eiloa ne fai. A koe ko toe tamaliki fakamatamata eiloa ka ko toe tamaliki malosi foki eiloa i taku fanau.

⁴A koe e pela me se lofiaga fakamataku, ka ko koe e se ko te tino tafasili i te tāua, Me i a koe ne fano ki taku avaga fakasalasala kae fakamatagā Ne koe te moega o tou tamana.

⁵“A Simeona mo Levi se tautaina. E fakaaoga la mea tau o fakasaua.

⁶Au e se fia kau i la faipatiga funa, E se kau foki a au i la maopoopoga. Me e tamate ne laua a tino i o la kaitaua Kae sona fakapa'kia foki ne laua a pulumakau tagata i la tafaoga.

⁷Ke malaia o la loto ita, me ko to fakamataku, Ke malaia foki o la loto kaitaua, me e seai se alofa i ei. Ka fakasalalau ne au a laua i te fenua katoa o Isalaelu. Ka fakasalalau ne au a latou i luga i Isalaelu.

⁸“Iuta, ka tavae koe ne ou taina. E mautakitaki ou lima i ua o ou fili. A ou taina ka ifo atu ki a koe.

⁹A Iuta e pela me se leona, E ta tena tino, ko toe foki atu ei ki tena pu, O falo tena foitino kae takato ki lalo. Kae seai se tino e fakalavelave ki a ia.

¹⁰A Iuta ka puke ne ia te tokotoko fakatupu, Ka ko tena gafa e tupu faeloa. A malo e o'mai mo meaalofa tupe ki a ia, ke taugasoa latou.[99] Kae e ifo mo te fakalogo ki a ia.

¹¹E sai ne ia tena asini ki te lakau ko te vine, Ki vine tafasili i te lei. E ta ne ia ona gatu i te sua o te uaina, tela e kula pela me se toto.

¹²A ona mata ko kulatamimi eiloa mai i tena inuga ki uaina. A ona nifo ko kena i tena inuga ki susu.[100]

¹³“A Sepulona ka nofo pili ki te tai. A te matafaga tena e nofo ei a ia ka fai mo koga e afe ki ei a vakamutu. A tena laufenua ka oko atu eiloa ki Saitonu.

¹⁴“Isakala e pau eiloa me se asini paie, Tela e moe fakalava i luga i te laukele, Mo taga kola e ave i tena tua e takato I feitu takitasi o ia.

¹⁵E matea ne ia a te gali o te koga Tela e manava ei a ia, Mo te fenua foki, se fenua e gali. Tela la, e fakapiko ifo tena tua o amo te amoga, Kae ne faimalo ke galue e pela me se pologa.

¹⁶“A Tanu ka fai mo takitaki o tena fenua. Ka pela eiloa mo nisi matakaiga o Isalaelu.

¹⁷A Tanu ka pela me se gata i tafa o te auala, Ka pela me se gata poisini i tafatafa o te auala, Tela e fakaoso tena poisini ki te mulivae o te solofanua Ko te mea eiloa ko to te tino e sopo i te tua o te solofanua.

¹⁸“Te Aliki, au e fakatalitali atu ki tau fakaolataga.

¹⁹“A tino kaisoa ka o'mai o faitaua ki a Kato. Kae ka afuli latou ne Kato.

²⁰“A meakai lei eiloa ka maua mai te laukele o Asela Ka maua mai i a ia a meakai e tau ki te tupu.

²¹“A Nafatali se tia tela e teletele saoloto fua, Tela e fai tama 'gali.[101]

²²“A Iosefa e pela me se asini vao i tafa o se vaitafe foliki; Se tamā asini vao i tafa mauga foliki.[102]

²³E faitaua ki a ia a ona fili Kae tuli ne latou a ia mo olotou kausana mo matasana.

²⁴Kae ko tena kausana e 'toka faeloa, Mo ana lima e fakamalosigina[103] Ki te mana o te Atua Malosi o Iakopo, Te Tausi Mamoe, te Puiga o Isalaelu.

²⁵Ko te Atua o tou tamana tela e fesoasoani ki a koe, Ko te Atua Malosi e fakamanuia ne ia a koe, Ki vaiua mai luga mo vai mai lalo o te laukele. E fakamanuia foki ne ia a koe o avatu pulumakau e uke pela foki mo tamaliki.

²⁶Fakamanuiaga o saito mo pulalakau,[104] Fakamanuiaga o mauga taumua,[105] Mo mea gali mai mauga foliki kola e tu ki te se gata mai. Ke i luga i a Iosefa a fakamanuiaga konei, Ke i luga i fulumata o ia tela ne fakakese mai i ona taina.

²⁷“A Peniamina e pela me se kuli vao fakamataku. E ta kae folo faeloa ne ia a tino i taeao mo afiafi.”

²⁸Kona a te tinogafulu mo te tokolua a matakaiga o Isalaelu, kae kona foki a pati a te lotou tamana i tena fakamavaega ki a latou takitokotasi.

²⁹Ne fakatonu atu a Iakopo ki ana tama penei, “Nei, au ko pili o mate, masaua la o tanu toku foitino i tafa o oku tupuga i te tanuga tela e tu i te manafa o Efelona te tagata Heti,

³⁰i te koga e igoa ko Makapelu, i te feitu ki te saegala o Mamele, i te fenua o Kanana. A te koga tena ne togi ne Apelaamo mai i a Efelona mo fai te tanuga.

³¹Tena te koga ne tanu ei a Apelaamo mo tena avaga ko Sala, ne tanu foki ei a Isaako mo tena avaga ko Lepeka; tena foki te koga ne tanu ei ne au a Lea.

³²A te manafa tena, mo te ana tena i ei ne togi mai, mai tino Heti. Ave foki au o tanu i ei.”

³³I te otiga o fakatonuga mo akoakoga a Iakopo ki ana tama, ne takato ifo a ia ki lalo te mea eiloa ko mate.