Read Te Tusi Tapu I Te Gana Tuvalu Lomiga Lua KENESE 50 Bible Online

KENESE 50 - Te Tusi Tapu I Te Gana Tuvalu Lomiga Lua bible

KENESE 50

¹Ne sai atu a Iosefa ki te foitino o tena tamana o sogi atu ki ei kae tagi.

²Oti aka fai ei te fakatonuga a ia ke fakavailakau te foitino o tena tamana ke mo a e pala.

³E tusa mo te fasefulu aso ne fakavailakau ei te foitino o Iakopo, e pena eiloa te leva o te galuega tena. Ne tagi fanoanoa a tino Aikupito e tusa mo te fitu sefulu aso.

⁴I te otiga o aso o te fanoanoa, ne fai atu ei a Iosefa ki ofisa a te tupu penei, “Fakamolemole, olo o fai taku fekau tenei ki te tupu:

⁵ ‘I te taimi ne fai ei o mate a toku tamana, ne fai mai ke tauto au ke ave tena foitino o tanu i te tanuga tela ko oti ne fakatoka ne ia i te fenua o Kanana. Tela la, fakamolemole eiloa koe, tuku mai au ke fano o tanu toku tamana ko foki mai ei au.’ ”

⁶Ne tali te tupu penei, “Ko lei, fano o tanu tou tamana, e pela eiloa mo tau tautoga ki a ia.”

⁷Tena ne malaga atu ei a Iosefa o tanu tena tamana. A ofisa katoa a te tupu, pela foki a ofisa matuatua mo tino taua katoa o Aikupito ne olo fakatasi mo Iosefa.

⁸A tino o tena kaiga, ko ana taina, mo tino katoa i te kaiga o tena tamana ne olo katoa mo ia. Ko olotou tamaliki foliki fua mo mamoe, kouti mo pulumakau ne nofo eiloa i Kosena.

⁹A tino e sopo i kaliota mo tino i luga i solofanua ne olo foki mo ia; te kau ne olo mo ia se potukau lasi eiloa.

¹⁰I te okoatuga a latou ki te koga tuki saito i Atata, i te feitu ki te saegala o te Iolitana, ne tagi fanoanoa latou mo olotou leo e fai eiloa i luga i se taimi leva eiloa. Ka ko Iosefa ne takitaki ne ia a faifaiga o te fanoanoa i aso e fitu.

¹¹I te mateaga ne tino Kanana a latou kona e tagi fanoanoa i Atata, ne fai ake olotou muna penei, “Ko oko eiloa i te 'malu o te faiga o te fanoanoa a tino Aikupito kona!” Tena te mea e fakaigoa ei te koga tena ko Apela Misalaima.[106]

¹²Tena, ne fai eiloa ne tama tagata a Iakopo e pela eiloa mo tena fakatonuga ki a latou;

¹³ne ave ne latou tena foitino ki Kanana o tanu i te ana i Makapelu, i te feitu ki te saegala o Mamele, i te laukele tela ne togi ne Apelaamo mai i te tagata Heti e igoa ki a Efelona, mo fai te tanuga.

¹⁴I te otiga ne tanu ne Iosefa a tena tamana, ne foki atu ei a ia ki Aikupito, fakatasi mo ana taina, mo latou katoa kola ne olo mo ia.

¹⁵I te mate atuga o Iakopo, ne faipati aka ei a taina o Iosefa i a latou eiloa penei, “Se a te tou mea ka fai, mafai a Iosefa koi ita eiloa ki a tatou kae taumafai o taui mai te mea a tatou tela ne fai ki a ia?”

¹⁶Tela, ne ave ei ne latou te fekau a latou ki a Iosefa penei: “I te taimi ne fai ei o mate te tou tamana,

¹⁷ne fai mai ki a matou ke olo atu matou ki a koe o fakatoese atu e tusa mo te agasala tela ne fai ne matou ki a koe. Nei, ko fakatoese atu matou, ko tavini a te Atua o tou tamana, e tusa mo te amioga se 'lei tela ne fai ne matou.” Ne tagi a Iosefa i te oko atuga o te fekau tena ki a ia.

¹⁸Tena ne olo atu eiloa a ona taina o ifo atu i ona mua kae fai atu penei, “Konei matou ke fai mo au pologa.”

¹⁹Kae ne fai atu Iosefa, “Sa mataku; au se ko te Atua ke mataku mai koutou ki a au.

²⁰Ne fai ne koutou se togafiti masei ki a au, kae ne fuli ne te Atua te togafiti masei a koutou tena ki te mea 'lei, ko te mea ke fakasao a ola o tino e tokouke konei e ola nei, mai te fakalavelave tenei e tupu.

²¹E seai se mea e tau o mataku koutou ki ei. Ka tausi eiloa ne au a koutou mo otou tamaliki.” Tena, ne fakalei ei ne ia olotou loto ki ana pati alofa ki a latou.

²²Ne nofo eiloa a Iosefa fakatasi mo te kaiga o tena tamana i Aikupito; ne mate a ia ka ko tusa mo te selau sefulu tausaga o tena olaga.

²³Ne ola eiloa a ia o kilo ana mata ki tamaliki a Efalaima mo ana mokopuna. Ne lavea foki eiloa ne ia a tama a Makila te tama a Manase, tela ne fakaofi mai ei ne ia ki loto i te kaiga.

²⁴Muna ia ki ona taina, “Ko pili nei au o mate, kae e iloa ne au me e tausi eiloa koutou ne te Atua kae ka taki foki ne ia koutou keatea mai i te fenua tenei, ki te fenua tela ne tauto ei a ia ki a Apelaamo, Isaako, mo Iakopo.”

²⁵Tena, ne fai atu ei a Iosefa ki ona tino ke tauto atu ki a ia me kafai ko ave latou ne te Atua ki te fenua tena, ke ave foki ne latou tena foitino.

²⁶Tena, ne mate ei a Iosefa i Aikupito ka ko tusa mo te selau sefulu ona tausaga. Ne fakavailakau ne latou tena foitino kae tuku ki loto i tena pusa.