Read Te Tusi Tapu I Te Gana Tuvalu Lomiga Lua KENESE 7 Bible Online

KENESE 7 - Te Tusi Tapu I Te Gana Tuvalu Lomiga Lua bible

KENESE 7

¹Muna a te Aliki ki a Noa, “Olo ki loto i te vaka mo tou kaiga katoa; ko iloa ne au me ko koe fua tokotasi i te lalolagi katoa e amiotonu.

²Puke ne koe e fitu vasoa o vaega manu kola e 'ma i faiga o tapuakiga, kae tasi te vasoa mai manu kola e lai'lai.

³Ke ave foki ne koe e fitu a vasoa o vaega manu eva kesekese. Fai te mea tena ko te mea ke tausi a manu vae fa kesekese mo manu eva ke ola, ko te mea ke toe fanafanau i te lalolagi.

⁴Ko te fitu o aso, mai te aso tenei, ka faka'to ifo ne au te vaiua tela ka 'to e tusa mo te fasefulu ao fasefulu po, ko te mea ke fulu faka'ma ei a mea ola katoa kola ko oti ne faite ne au.”

⁵Ne fai eiloa ne Noa a mea katoa kola ne fakatonu atu ne te Aliki ke fai.

⁶I te taimi ne oko mai ei te lofiaga ki te lalolagi, ka ko Noa ko 600 ona tausaga.

⁷ A ia mo tena avaga, mo ana tamaliki mo olotou avaga, ne ulu ki loto i te vaka ke 'sao latou mai te lofiaga.

⁸E taki lua manu, te manu tagata mo te manu fafine, mai vaega manu vae fa katoa mo manu eva, faitalia me ne manu 'ma me ikai,

⁹ne ulu tasi katoa mo Noa ki loto i te vaka, e pela eiloa mo te fakatonuga a te Atua.

¹⁰E fitu aso mai tua ifo, kae oko mai te lofiaga.

¹¹I te katoaga o te 600 tausaga o Noa, i te sefulu fitu o aso o te lua o masina ne 'puna ake a vai mai te vai tela i lalo ifo o te lalolagi, e pela foki mo matavai i te lagi ko ma'tala foki,

¹²tela ne 'to ei te vaiua ki te laukele e tusa mo te fasefulu ao fasefulu po.

¹³I te aso eiloa tena, ne olo ei a Noa mo tena avaga ki loto i te vaka mo la tamaliki ko Semu, Hamo mo lafeta, mo olotou avaga.

¹⁴Ne olo tasi latou mo vaega manu vae fa valevale, manu fagai mo manu vao, manu 'lasi mo manu fo'niki, pela foki mo vaega manu eva valevale.

¹⁵Ne puke ne Noa se manu tagata mo se manu fafine mai vaega mea ola katoa, ke olo mo ia i te vaka,

¹⁶e pela eiloa mo te fakatonuga a te Atua. Fakamuli ifo, pono atu ei ne te Aliki te mataloa i te uluga o Noa ki loto i te vaka.

¹⁷Ne tumau te lofiaga i aso e fasefulu, tela ko mafai ei o laga a te vaka i te 'sua o te vai.

¹⁸Ne gasolo eiloa o sua te vai, tela ko tapea atu ei te vaka.

¹⁹Ne fanake eiloa o sua malosi te vai, tela ko 'galo ei a ulu o mauga maluga eiloa;

²⁰ne gasolo eiloa o sua, tela ko tusa mo te fitu o mita te maluga mai ulu o mauga.

²¹Ne 'mate katoa a mea ola i te laukele — ko manu eva katoa, ko manu vaefa katoa, mo tino katoa.

²²A mea katoa i te lalolagi kola e manava, ne 'mate katoa.

²³Ne solo faka'ma ne te Aliki a mea ola katoa i te lalolagi — ko tino, manu vaefa mo manu eva. Ko Noa fua mo latou kola ne olo tasi mo ia ki loto i te vaka e seki 'mate.

²⁴E tusa mo te 150 aso mai tua ifo kae fatoa kamata o fanaifo te vai.