Read Te Tusi Tapu I Te Gana Tuvalu Lomiga Lua KENESE 8 Bible Online

KENESE 8 - Te Tusi Tapu I Te Gana Tuvalu Lomiga Lua bible

KENESE 8

¹Ne seki puli i te Atua a Noa mo manu katoa i te vaka; ne fakaagi ne ia te matagi, ko te vai eiloa ko kamata o fanaifo o 'masa.

²A alavai o te vai i lalo ifo o te laukele, e pela foki mo matavai i te lagi ko 'pono katoa.

³Ne gata te vaiua, ko te vai eiloa ko gasolosolo malie o masa e tusa mo te selau limasefulu aso.

⁴I te po sefulu fitu o te fitu o masina, ne kasa ei te vaka i te ulu o te atumauga o Alalata.

⁵Ne gasolo ifo eiloa te vai ki lalo, kae i te aso muamua o te sefulu o masina, ne 'sae ei a ulu o mauga.

⁶I te katoaga o te fasefulu o aso, ne tala ne Noa te famalama

⁷kae fakaeva atu ne ia a te oleva. Ne seki foki te oleva ki te vaka, kae ne evaeva eiloa ke oko eiloa ki te taimi ne 'masa ei te vai.

⁸Ne toe fakaeva atu ne Noa a te lupe, ke iloa aka me ko masa lei eiloa te vai me ikai.

⁹Ne seki maua se koga o te lupe mo ona tu, me i te laukele koi 'sua eiloa i te vai, tela ne toe foki ei te lupe ki te vaka, kae 'kapa atu te lima o Noa o puke mai ki loto.

¹⁰Ne fakatali a Noa i aso e fitu, toe fakaeva atu ei ne ia a te lupe.

¹¹Ne foki mai te lupe i te afiafi mo te kaula o te olive e u i tena gutu. Tena, ko iloa ei ne Noa i te vai ko gasolo ifo eiloa o 'masa.

¹²Ne toe fakatalitali a ia i ne aso e fitu, toe fakaeva ei ne ia te lupe; i te evaatuga tena, seki toe foki mai eiloa.

¹³I te katoaga o te 601 tausaga o Noa, i te po muamua o te masina muamua, ne masa ei te vai. Ne 'tala ne Noa te fale o te vaka, kilokilo ifo ki te laukele, lavea ei ne ia i te vai ko fano eiloa o 'masa.

¹⁴I te po luasefulu fitu i te lua o masina, ne 'masapakupaku ei te vai i luga i te laukele.

¹⁵Muna a te Atua ki a Noa,

¹⁶“Ulu ki tua mo te vaka, fakatasi mo tau avaga, au tama tagata, mo olotou avaga.

¹⁷Puke atu ki tua a manu eva katoa, mo manu vaefa katoa, ko te mea ke fanafanau kae salalau i luga i te lalolagi.”

¹⁸Tela ne ulu ifo ei a Noa ki tua mo te vaka fakatasi mo tena avaga, ana tamaliki tagata mo olotou avaga.

¹⁹A manu vae fa katoa mo manu eva ne solo ifo ki tua mo te vaka i olotou itukaiga eiloa.

²⁰Ne faite ne Noa se fata-fai-taulaga mo fai tena taulaga ki te Aliki. Ne puke aka ne ia e tasi te manu mai vaega kesekese o manu kola e 'ma i faiga o tapuakiga, manu vaefa mo manu eva, kae sunu katoa i luga i te fata-fai-taulaga mo fai tena taulaga ki te Aliki.

²¹Ne fiafia te Aliki ki te manogi o te taulaga, tela ne fai ifo a ia ki a ia eiloa penei, “Ka se toe fakamalaia ne au te lalolagi katoa mai luga i agasala a te tino e fai. E iloa ne au me i te taimi koi foniki ei a ia, a tena mafaufau e se 'lei. Ka se toe 'ta fakapalele ne au a mea ola katoa, e penei mo taku mea ne fai atu nei.

²²Ka tumau faeloa i te lalolagi a aso e toki ei lakau mo aso e kati ei. Ka tumau foki te moko mo te vela, te 'tau vela mo te 'tau moko e pela foki te ao mo te po.”