Read Te Tusi Tapu I Te Gana Tuvalu Lomiga Lua KENESE 9 Bible Online

KENESE 9 - Te Tusi Tapu I Te Gana Tuvalu Lomiga Lua bible

KENESE 9

¹Ne fakamanuia ne te Atua a Noa mo ana tamaliki tagata, kae fai atu penei ki a latou, “Fakatokouke otou fanau, ko te mea ke salalau atu otou gafa i te lalolagi katoa.

²A manu vaefa katoa, mo manu eva, e pela foki mo ika ka ola mo te mataku ki a koutou. Ka 'nofo katoa i lalo o te otou pulega,

³kae ka mafai o kai ne koutou, e pela foki mo lakau kaina katoa; a mea katoa kona ko tuku atu ne au ke fai mo meakai a koutou.

⁴Ko te mea e se 'tau o kai ne koutou, ko kano o manu kola koi isi ne toto i ei; e se talia ne au te mea tena me i te toto ko te ola tena.

⁵So se tino e tatino, e 'tau o fakasala. Ka fakasala ne au ki te mate so se manu tela e tamate ne ia te tino ola.

⁶A te tino ne faite ki foliga o te Atua, tela la, so se mea ola e tamate ne ia te tino, ka tamate a ia ne nisi tino.

⁷“E tau o fakatokouke otou tamaliki, ko te mea ke salalau atu otou fanau i luga i te lalolagi.”

⁸Muna a te Atua ki a Noa mo ana tamaliki tagata,

⁹“Ko fai nei taku feagaiga mo koe mo tou gafa,

¹⁰e pela foki ki mea ola katoa — manu eva katoa mo manu vaefa katoa mo mea ola katoa kola ne 'mai mo koe i te vaka.

¹¹Konei a pati e fai ei taku feagaiga mo koe: au ko tauto me ka se toe 'ta fakapalele a mea ola katoa i se lofiaga; ka se toe fakamasei eiloa te lalolagi katoa ne se lofiaga.

¹²Tenei te fakailoga o taku feagaiga tumau ki a koutou mo mea ola katoa,

¹³ka fakatu ne au te nuanua i kaumana. Ka fai te mea tena mo fakailoga o taku feagaiga mo te lalolagi.

¹⁴I so se taimi e ufi ei ne au te lagi ki kaumana, kae sae aka mo te nuanua,

¹⁵ka masaua ne au taku tautōga ki a koutou e pela foki ki manu katoa, me ka se toe 'ta fakapalele a mea ola katoa i se lofiaga.

¹⁶Kafai e sae aka se nuanua i kaumana, ka masaua ei ne au taku feagaiga tumau mo mea ola katoa i te lalolagi.

¹⁷Tena te fakailoga o te feagaiga tela ne fai ne au mo mea ola katoa.”

¹⁸A tamaliki tagata a Noa kola ne olo mo ia i te vaka ko Semu, Hamo mo Iafeta. A Hamo ko te tamana o Kanana.

¹⁹A tamaliki tagata konei e tokotolua a Noa, ko tupuga o tino katoa i te lalolagi.

²⁰A Noa, tela se faifatoaga, ko te tino muamua o toki ne ia se togavine.

²¹I te inuga a ia ki uaina, ne kona a ia, tela ne tapale keatea ona gatu, kae takato fuafua i loto i tena faleie.

²²I te mateaga ne Hamo, te tamana o Kanana, i tena tamana e nofo fuafua, ne fano a ia o fakailoa ki ona taina kola e tokolua.

²³Ne puke aka ne Semu mo lafeta se gatu 'loa, kae taofi ne laua i o la tua. Ne sasale laua ki te faleie, mo la tua e fuli ki ei, ulu atu ki loto, faka kafu ei ne laua te la tamana, mo la mata e kilo fakaatea ke se lavea ne laua te la tamana ne nofo fuafua.

²⁴I te 'leiga o te kona o Noa, kae ko logo i te mea ne fai ne tena tama tagata tafa foniki eiloa, ne fai ana pati penei,

²⁵“Ke malaia Kanana! Ka fai a ia mo pologa ki ana taina.

²⁶Ke vikia te Aliki, te Atua o Semu! A Kanana ka fai mo pologa a Semu.

²⁷Ke fakamanuia ne te Atua a Iafeta![26] Ke 'nofo tasi tena fanau mo te fanau a Semu! A Kanana ka fai mo pologa a lafeta.”

²⁸I te oti atuga o te lofiaga, ne ola atu eiloa a Noa e tusa mo te 350 tausaga,

²⁹kae ne mate ka ko tusa mo te 950 tausaga o tena olaga.