Read Te Tusi Tapu I Te Gana Tuvalu Lomiga Lua 2 SAMUELU 12 Bible Online

2 SAMUELU 12 - Te Tusi Tapu I Te Gana Tuvalu Lomiga Lua bible

2 SAMUELU 12

¹Ne uga ne te Aliki a te pelofeta ko Natano ke fano ki a Tavita. Ne fanatu Natano ki a Tavita, kae fai atu penei, “E tokolua tagata e nofo i te fa'kai e tasi; a te suā tagata e maumea, ka ko te suā tagata e mativa.

²A te tagata maumea e uke ana pulumakau mo mamoe,

³ka ko te tagata mativa e tasi fua tena mamoe, tela ne togi ne ia. Ne tausi faka'lei eiloa ne ia; tela la, ne tupu aka eiloa i tena fale, fakatasi mo ana tamaliki. E fagai ne ia ki ana meakai eiloa, e fainu foki ne ia ki tena ipu, kae fakatakato sale ne ia i ona vae. A te tamā mamoe tena e pela eiloa me se tamaliki fafine a ia.

⁴I te aso e tasi, ne oko atu se tino ki te fale o te tagata maumea. A te tagata maumea e se manako o ta se mamoe a ia mo fai te talitali o tena malo tena ne vau; kae ne fanatu a ia o puke mai te tamā mamoe a te tagata mativa ke tunu mo fai te talitali o tena malo.”

⁵A Tavita ko oko eiloa i ana kaitaua ki te tagata maumea, ana muna, “Au e tauto i te igoa o te Aliki ola, i te tagata tena ne fai ne ia te mea tena, e tau o tamate!

⁶E tau la o togi ne ia e fakafa taimi o mea ne puke ne ia, e tusa mo te amioga se 'lei a ia ne fai.”

⁷Tena ne fai atu ei Natano ki a Tavita penei, “Ko koe ko te tagata tena. Konei a muna a te Aliki te Atua o Isalaelu: ‘Ne fai ne au a koe mo tupu o Isalaelu, kae ne fakasao foki ne au a koe mai i a Saulo.

⁸Ne avatu ne au ki a koe tena malō mo ana avaga; ne fai ne au a koe mo tupu i Isalaelu mo Iuta. Moi ne se lava a mea kona, e penei e tuku atu ne au e fakalua taimi te uke.

⁹Ai a ko teke ei nei ne koe aku fakatonuga? Ai a ne fai ei ne koe se mea se 'lei pena? Ne fai ne koe a Ulia ke mate i te taua; ne tuku ne koe a ia ke tamate ne te kau Amoni, kae puke ne koe tena avaga!

¹⁰Nei, i tupulaga takitasi, ka isi eiloa ne tino i tou gafa ka mate i se mate fakasaua, me i a koe ne se fakalogo mai ki a au, kae puke aka foki mo te avaga a Ulia.

¹¹ Au e tauto atu ki a koe me ka fai ne au se tino o tou kaiga ke aumai ne ia te puapuaga ki luga i a koe. Ka matea ne koe manafai ko ave ne au au avaga ki se tagata fakaatea; kae ka 'moe mo ia i te ao malamalama.

¹²A koe ne agasala kae se iloa ne tino, kae ka fai ne au te mea tenei i te ao malamalama ke lavea ne Isalaelu katoa.”’

¹³Muna a Tavita, “Au ko agasala ki te Aliki.” Ne tali atu Natano, “A koe ko fakamagalo ne te Aliki; a koe ka se mate.

¹⁴Kae mai luga o tou se fia saga ki tulafono a te Aliki, a tau tamaliki ka mate.”

¹⁵Tena, ko Natano eiloa ko foki ki tena fale. Ne fai ne te Aliki te tamaliki a Tavita i te avaga a Ulia, tela ko oti ne fanau, ke masaki malosi.

¹⁶Ne talo Tavita ki te Atua ke aumai te malosi ki te tamaliki. Ne ita Tavita ma kai ki se meakai, kae i po katoa e fano a ia ki loto i tena potu kae ne moe i te fola i te po katoa tena.

¹⁷Ne olo atu ana ofisa o taumafai ke tu aka a ia, kae e ita eiloa a ia; e ita foki ma kai fakatasi mo ana ofisa.

¹⁸E tasi te vaiaso mai tua ifo, ko te tamaliki eiloa ko mate, ka ko ofisa a Tavita ko ma'taku ma fakaasi atu ne latou ki a Tavita te tala tena. Muna a latou, “I te taimi koi ola ei te tamaliki, a Tavita e seki faipati mai eiloa ki a tatou manafai e faipati atu tatou ki a ia. E fakailoa pefea ne tatou ki a ia i tena tama ko mate? I te mea fua ma fai ei ne ia se mea ki a ia eiloa!”

¹⁹I te mateaga ne Tavita i a latou kona e musu'musu, iloa eiloa ne ia i tena tama ko mate. Tena ne fesili atu ei a ia ki a latou penei, “E a, ko mate te tamaliki?” Ne tali mai latou, “Ao, ko mate.”

²⁰Ne tu aka Tavita mai te fola o tena fale, koukou, selu faka'lei tena ulu, kae sui ona gatu. Tena fano ei a ia o tapuaki i te fale o te Aliki. I tena fokimaiga, ne kalaga a ia ke avatu a meakai, kai eiloa a ia i te otiga ne laulau atu ki ona mua.

²¹Ne fai aka ana ofisa penei, “A matou nei se malamalama i te mea tenei. I te taimi koi ola ei te tamaliki, a koe ne tagi malosi eiloa, kae e se kai; kae i te taimi eiloa ne mate ei, ko koe eiloa ko tu aka o kai!”

²²Ne tali atu Tavita, “E tonu, au ne fakalikiliki kae tagi fanoanoa i te taimi koi ola ei. Au ne mafaufau aka pela, kaati ka alofa mai te Aliki ki a au, o se tuku te tamaliki ke mate.

²³Kae nei, ko oti ne mate te tamaliki, ai a ka fakalikiliki fua ei au? Mata e mafai ne au o fakafoki mai te tamaliki ki te ola? Fakamuli ifo, ko fano ei au ki te koga e nofo ei a ia, ka ko ia e se mafai o toe foki mai ki a au i te olaga nei.”

²⁴Ne fakamafanafana ne Tavita te loto o Patisepa ona ko te la tama. Ne toe 'moe fakatasi laua, tena ne faitama ei a Patisepa, fanau mai ei se tama tagata, kae ne fakaigoa ne Tavita ko Solomona.

²⁵A te Aliki e alofa ki te tamaliki tagata tena, kae ne fakatonu atu ki a Natano ke fakaigoa te tamaliki ko Ietitaia,[16] me e alofagia ne te Aliki.

²⁶I te vaitaimi tena, a Ioapo koi taua atu eiloa ki te fa'kai o Lāpa, te laumua o Amoni, kae ko tai takavale aka eiloa i tena kau.

²⁷Ne uga ana avefekau ki a Tavita mo te lipoti penei, “Au ne taua ki te fa'kai ko Lāpa, kae tenei ko oti ne puke ne au te auala e maua ei olotou vai.

²⁸Fakatoka nei tau kautau o'mai o taua ki te fa'kai, ke puke eiloa ne koe. Au se manako ke taku toku igoa me ne fakatakavale ne au.”

²⁹Tena, ne fakamaopoopo te kautau a Tavita, olo atu eiloa o taua ki Lāpa, fakatakavale eiloa ne latou.

³⁰Ne puke ne Tavita te kalauna aulo mai te ulu o te atua tupua o Amoni e igoa ko Milikoma. A te kalauna aulo tena e tusa mo te tolusefulu lima kilokalame te 'mafa, kae e isi se fatu taua i loto i ei. Ne puke Tavita ki te fatu tāua tena, fakapiki ei ki luga i tena kalauna. Ne 'fao mai foki ne ia a mea tāua valevale mai te fa'kai,

³¹kae fakagalue a tino o te fa'kai tena ki soa, fiti tofa laukele, takū fiti, kae fai mālo ke galue i te faiga o puliki. Ne fai foki ne ia pena a tino o nisi fa'kai fo'liki o Amoni. Tena, ko ia eiloa mo tena kau ko foki atu ki Ielusalema.