Read Te Tusi Tapu I Te Gana Tuvalu Lomiga Lua 2 SAMUELU 13 Bible Online

2 SAMUELU 13 - Te Tusi Tapu I Te Gana Tuvalu Lomiga Lua bible

2 SAMUELU 13

¹A te tama tagata a Tavita ko Apisaloma, e isi sena tuagaene taulekaleka kae seki avaga e igoa ki a Tamala. A Amanono, te sua tama tagata a Tavita ne fiafai ki a Tamala.

²Ko oko eiloa i tena fiafai ki a Tamala tela ko masaki ei a ia, me ko oko eiloa te mata faigata o maua ne ia a Tamala. A Tamala se taupou, tela la, e tausi fakamao eiloa a ia mai i tagata.

³Kae e isi se taugasoa o Amanono e igoa ki a Ionatana, te tama a Sama te taina o Tavita.

⁴Muna a Ionatana ki a Amanono, “A koe ko te tama a te tupu, kae e matea faeloa koe ne au e mata fanoanoa i aso takitasi. Se a te mea e fanoanoa ei koe?” Ne tali atu a ia, “Au e fiafai ki a Tamala, te tuagaene tonu o toku afa taina ko Apisaloma.”

⁵Muna a Ionatana ki a ia penei, “Fakaloiloi pela i a koe e masaki, kae fano o moe. Kafai e fanatu tou tamana o asi atu ki a koe, fai ki ei penei, ‘Fakamolemole, fai aka ki toku tuagaene ko Tamala ke vau o fagai a au. Au e manako ke vau o fakatoka te meakai i konei, ke lavea atu a ia ne au, ko laulau mai foki ei ne ia a meakai ki a au.’ ”

⁶Tena, ne fai aka ei a Amanono i a ia ko masaki, fano eiloa o moe. Ne fanatu te Tupu ko Tavita o asi atu ki a ia, kae fai mai a Amanono ki a Tavita, “Fakamolemole, fai ki a Tamala ke vau o fai ne mu keke i konei, ke lavea atu a ia ne au, kae ke laulau mai foki ne ia ki a au.”

⁷Tena ne uga ei te fekau a Tavita ki a Tamala i te palesi, muna a ia: “Fano ki te fale o Amanono o fakatoka ne meakai ma ia.”

⁸Ne fanatu Tamala, maua atu ne ia e moe mai i tena moega. Ne puke mai ne ia ne mu falaoa, faite ei ne ia ne keke i kona, ke matea mai a ia ne Amanono. Ne tao ne ia a keke, oti aka,

⁹tapale ei ne ia ki tua, kae avatu ke kai a Amanono, kae seki kai ne ia. Muna a Amanono, “Uga a tino katoa ke olo keatea,” tena ne olo katoa ei a tino mai i kona.

¹⁰Tena, fai atu ei a Amanono ki a Tamala penei, “Aumai a keke ki konei, ki toku moega, o fagai au ne koe.” Ne puke aka ne ia a keke, avatu ei ne ia ki a Amanono.

¹¹I te tukuatuga ne Tamala a keke ki a Amanono, kae puke mai Amanono ki a ia kae fai mai penei, “Vau ke moe taua!”

¹²Ne fai atu Tamala, “Ikai, sa fai malogina au ke fai se mea tafalalo pena! Ko oko eiloa i te masei o tau mea tenei ka taumafai o fai!

¹³Ka fai te mea tenei mo mea e fakalumalumagina ei au i te fenua nei. Ka ko koe, a koe ka masiasi masei eiloa i luga i Isalaelu. Fakamolemole, faipati ki te tupu, kae talitonu au me e tuku mai eiloa ne ia a au ki a koe.”

¹⁴Ka ko Amanono e se fia fakalogo eiloa ki a Tamala; tena ne puke mālo eiloa ne ia a Tamala me e malosi atu la a ia i a Tamala.

¹⁵Tena, ko Amanono eiloa ko poko te takalialia i a Tamala; ko lasi atu tena takalialia ki a Tamala i te taimi nei, i lo tena alofa ki ei i te taimi muamua. Muna a Amanono ki ei, “Fano keatea!”

¹⁶Ne tali atu Tamala, “ikai.” “E sili atu te masei ma uga mai ne koe au penei i lo tau mea tenei ne fatoa fai atu nei!” Ka ko Amanono e se fia fakalogo eiloa ki ei;

¹⁷ne kalaga atu a ia ki tena tavini kae fai ki ei penei, “Ave keatea te fafine tenei mai oku mua! Pei atu ki tua kae loka mai te mataloa!”

¹⁸Ne puke atu te tavini ki te fafine tena, pei atu ki tua kae loka te mataloa. A Tamala e pei ki te gatu 'loa kae lima 'loa foki, te gatu eiloa e masani o pei sale ki ei a pulinisese kola e seki avaga i aso kona.

¹⁹Ne faka matu'tutu ne ia a lefu ki tena ulu, saesae tena gatu 'loa, kae tagi o fano, mo ana lima e pono i ona mata.

²⁰I te laveaga a ia ne tena tuagaene ko Apisaloma, ne sili atu ei penei, “A koe ne fai ne Amanono? Tuagaene, fakamolemole, sa saga malosi ki ei. A ia se tuagaene foki o koe, e tamana tasi koulua kae matua kesekese, tela la, sa faipati ki se tino e uiga ki te mea tena.” Tena, ne nofo eiloa a Tamala i te fale o Apisaloma, mo te fanoanoa.

²¹I te logoga a Tavita i te mea ne tupu, ko oko eiloa i ana kaitaua.

²²A Apisaloma ko oko eiloa i te takalialia i a Amanono ona ko te puke malōga ne ia o tena tuagaene ko Tamala, tela la, ko se toe faipati eiloa a ia ki a Amanono.

²³E lua tausaga mai tua ifo, kae fai te velega o fulufulu o mamoe a Apisaloma i Pala Hasola, i tafa o te fa'kai foliki o Efalaima, tela ne kami ei ne ia a tama tagata katoa a te tupu ke olo atu ki kona.

²⁴Ne fanatu a ia ki te Tupu ko Tavita, kae fai atu penei, “Tou Malu, aku mamoe nei ka vele olotou fulufulu. E talia ne koe ke o'mai koutou mo au ofisa ki te fakafiafiaga o te velega o fulufulu o aku mamoe?”

²⁵Ne tali atu te tupu, “Taku tama, kāti ka to lasi tau fakatokatokaga manafai e olo atu katoa matou.” Ne finau atu eiloa Apisaloma, kae makeke eiloa te tupu i a latou se olo, tena ne fai atu ei a ia ki a Apisaloma ke na fano.

²⁶Kae ne fai atu Apisaloma, “Kae a, e talia ne koe ke tuku mai toku taina ko Amanono ke vau?” Ne fesili atu te tupu, “Ai a e fanatu ei a ia?”

²⁷Ka ko Apisaloma e finau eiloa, tena ne tuku atu ei ne Tavita a Amanono mo ana tama tagata katoa ke olo mo Apisaloma. Ne fakatoka ne Apisaloma se 'kaiga lasi pela me se 'kaiga a te tupu.

²⁸Kae fakatonu atu ki ana tavini penei: “Kilo'kilo faka'lei ki a Amanono manafai ko to kona, ko tamate ei manafai e fai atu ne au te fakatonuga ke tamate. Sa ma'taku. A te 'se e i luga eiloa i a au. Ke 'toa otou loto, kae sa fakatalave!”

²⁹Tena, ne faka'logo eiloa a tavini kona ki te fakatonuga a Apisaloma, tamate ei ne latou a Amanono. Ne fakatau sopo a tama tagata katoa a Tavita ki olotou miula, te mea eiloa ko 'tele.

³⁰I te lotou auala ki olotou fale, ne oko atu te tala ki a Tavita penei: “A au tama tagata katoa ko palele ne 'ta ne Apisaloma, e seai eiloa se tino ne sao!”

³¹Ne tu aka te tupu, saesae ona gatu i te fanoanoa, kae fakasiga ifo ki te laukele. A tavini kona e 'nofo mo ia i kona, ne sae'sae foki olotou gatu.

³²Kae ne fai atu mo Ionatana, te tama tagata a Sama te taina o Tavita penei, “Tou Malu, e seki tamate ne latou au tama tagata katoa. Ko Amanono fua ne tamate. E tau o lavea ne koe i mata o Apisaloma, me ko leva ne mafaufau o fai te mea tena, talu mai te taimi ne puke mālo ei ne Amanono tena tuagaene ko Tamala.

³³Tela la, sa talitonu ki te tala i au tama tagata katoa ko mate; ko Amanono fua ne tamate.”

³⁴I te taimi tena, a Apisaloma i ei ko oti ne sola. I te taimi foki eiloa tena, ko te sotia tu eiloa ko lavea ne ia se potukau e o'mai mai te koga maluga i te auala mai Holonaima. Ne fano a ia ki te tupu, fakaasi ei ne ia a te mea ne lavea ne ia.

³⁵Muna a Ionatana ki a Tavita, “Ko au tama tagata kona ko o'mai, e pela eiloa mo aku muna me e o'mai eiloa.”

³⁶I te otiga o ana pati kona, ko tama tagata eiloa a Tavita ko ulu atu ki loto; ne 'tagi latou i kona, pela foki Tavita mo ana ofisa.

³⁷Apisaloma ne sola ki te tupu o Kesula ko Talamai, te tama tagata a Amiuta, nofo eiloa a ia i kona i tausaga e tolu. Ne tagi fanoanoa eiloa Tavita mō tena tama ko Amanono i se taimi leva eiloa;

³⁹kae i te 'tokaga o te loto o te tupu i te mate o Amanono, kae oko atu ki a ia te alofa ki tena tama ko Apisaloma tela ne sola.