Read Te Tusi Tapu I Te Gana Tuvalu Lomiga Lua 2 SAMUELU 2 Bible Online

2 SAMUELU 2 - Te Tusi Tapu I Te Gana Tuvalu Lomiga Lua bible

2 SAMUELU 2

¹I te otiga o mea kona, ko Tavita eiloa ko fesili atu ki te Aliki penei, “E a, e tau au o fano o puke se fa'kai foliki e tasi i Iuta?” Ne tali mai te Aliki, “Ao.” Ne fesili atu Tavita, “Ko te fa'kai fea?” Ne fai atu te Aliki, “Ko Hepelona.”

² Tena ne fano ei a Tavita ki Hepelona, mo ana avaga eiloa e tokolua: ko Ainoama mai i Ieseleelu, mo Apikaila, te avaga a Napalu tela ko mate mai te fa'kai o Kalamelu.

³Ne olo tasi eiloa latou mo tena kau mo olotou kaiga, nofo ei i fa'kai foliki i tafatafa o Hepelona.

⁴ Tena, ne olo atu a tagata o Iuta ki Hepelona, faū ei ne latou Tavita ke fai mo tupu o Iuta. I te logoga o Tavita i a Saulo ko oti ne tanu ne tino Iapese i Kileata,

⁵uga ei ne ia ne tagata ki te fa'kai tena mo te fekau tenei: “A te Aliki ke fakamanuia atu ki a koutou e tusa mo te tanuga ne koutou a te otou tupu, e fakaasi ei te otou tautua mo te fakamaoni ki a ia.

⁶Kae nei, a te Aliki ke alofa atu ki a koutou kae tausi ki a koutou. Ka ko au foki ka fai faka'lei atu ki a koutou e tusa mo te otou mea ne fai.

⁷Ke ma'losi kae 'toa koutou! A Saulo, te otou tupu, ko mate, ka ko au nei ko oti ne faū ne tino Iuta ke fai mo olotou tupu.”

⁸A te takitaki o te kautau a Saulo tela ko Apinelu, te tama tagata a Nelu, ne sola mo Isoposeta, te tama tagata a Saulo, ki Manaima, i te sua feitu o te Iolitana.

⁹I kona, ne fai ei ne Apinelu a Isoposeta mo tupu o koga fenua o Kileata, Asela,[2] Ieseleelu, Efalaima, mo Peniamina, pela foki i luga i Isalaelu katoa.

¹⁰A ia tena ko tusa mo te fasefulu ona tausaga i te taimi ne fai ei mo tupu, kae ne pule a ia i Isalaelu i tausaga e lua. Ka ko te matakaiga o Iuta e fakamaoni eiloa ki a Tavita.

¹¹Ne pule a ia i Hepelona, mo Iuta, i tausaga e fitu mo te afa.

¹²A Apinelu mo ofisa a Isoposeta ne olo atu mai Manaima ki te fa'kai o Kipeona.

¹³A Ioapo, te tama a te fafine e igoa ki a Seluia, mo ofisa a Tavita ne fakafetaui atu ki a latou i pugāloto vai, tena saga'saga ei latou i kona, te sua potukau i te sua feitu o te pugaloto vai tena, ka ko te sua potukau i te sua feitu.

¹⁴Muna a Apinelu ki a Ioapo, “Tuku mai ne tamataene mai a koutou ke fe'paki mo ne tamataene mai a matou.” Ne tali atu Ioapo, “Ko 'lei.”

¹⁵Tena, e tinogafulu mo te tokolua mai te kau a Isoposeta tela e sui mai i te matakaiga o Peniamina, ne taua atu mo te tinogafulu mo te tokolua mai te kau a Tavita.

¹⁶Ne fakatau puke atu eiloa taki vasoa kona, fakatau suki eiloa olotou soa, tena, ne siga katoa eiloa te tinolua mo te tokofa kona ki lalo, mate katoa eiloa. Tena la, a te koga tena i Kipeona e fakaigoa ko te “Laukele o Pelu.”

¹⁷Tena, ko te mea eiloa ko taua a Apinelu mo tena kau mo te kau a Tavita, kae ne takavale a Apinelu mo tena kau.

¹⁸A tamaliki tagata a Seluia kola e tokotolu: ko Ioapo, Apisai mo Asaelu ne nofo i kona. A Asaelu, tela ko ia eiloa ko makini pela me se tia,

¹⁹ne afuli ne ia Apinelu, tele tonu atu eiloa ki a ia.

²⁰Ne kilo ifo Apinelu ki ona tua kae fai aka penei, “A koe na ko Asaelu?” Ne tali atu Asaelu, “Ao.”

²¹Muna a Apinelu, “Sa vau o afuli au! Fanatu o afuli se sotia o fao ana mea.” Ka ko Asaelu ne fanatu eiloa o afuli a ia.

²²Tena, ne toe fai atu Apinelu ki a Asaelu penei, “Sa vau o afuli au! Sa faigina se mea ke tamate koe ne au. E se mafai ne au o fakafesagai ki tou taina ko Ioapo manafai e tamate koe ne au.”

²³Ka ko Asaelu e tele atu eiloa; tena ne velo atu ei ne Apinelu tena tao tu eiloa i te tinae o Asaelu, kae sae ki tua. Ne siga ifo Asaelu, mate eiloa, ka ko tino katoa kola ne o'mai ki te koga tena e takato ei a ia, ne tu i te koga tena.

²⁴Ka ko Ioapo mo Apisai ne olo o sala Apinelu, kae i te tōga o te la, ne oko atu ei laua ki te Mauga o Ama, tela i te feitu ki te saegala o Kia, i te auala ki te vao o Kipeona.

²⁵Ne toe maopoopo a tagata Peniamina ki a Apinelu, kae toe fakatoka mo se taua i luga i te koga maluga.

²⁶Ne kalaga atu a Apinelu ki a Ioapo penei, “E a, ka taua faeloa tatou ki te se gata mai? E se iloa ne koe me kafai ko oti aka te tou taua, ko te fanoanoa fua ka maua ne tatou? A tatou ne tino o te fenua e tasi. E fai mafea koe ki tau kau ke sa toe o'mai o afuli matou?”

²⁷Ne tali atu Ioapo, “Au e tauto i te igoa o te Atua ola, me moi ne se faipati mai koe, penei e afuli faeloa koutou ne taku kau ke oko ki te taeao.”

²⁸Tena, ne fakatagi ne Ioapo te pu e fakailoa ei ki tena kau ke sa toe olo o afuli a te kau Isalaelu, tena ne gata ei te lotou taua.

²⁹Ne ma'laga atu Apinelu mo tena kau i loto i te Vanu o Iolitana i te po katoa tena; ne olo atu latou ki te sua feitu o te Vaitafe o Iolitana, ma'laga atu i te taeao katoa o te aso fou tena, tena oko atu ei latou ki Manaima.

³⁰Ne gata te afuliga a Ioapo i te kau a Apinelu, tena, fakamaopoopo ei ne ia tena kau kae lavea aka nei, e tinogafulu mo te tokoiva a tino i tena kau e galo, fakatasi mo Asaelu.

³¹E toluselau onosefulu tagata i te kau a Apinelu mai i te matakaiga o Peniamina, ne 'ta ne te kau a Tavita.

³²Ne puke mai ne Ioapo mo tena kau a te foitino o Asaelu, o ave o tanu i te tanuga o te kaiga i Peteleema. Tena, ne ma'laga atu latou i te po katoa tena, kae i te vaveao ne oko atu ei latou ki Hepelona.