Read Te Tusi Tapu I Te Gana Tuvalu Lomiga Lua 2 SAMUELU 21 Bible Online

2 SAMUELU 21 - Te Tusi Tapu I Te Gana Tuvalu Lomiga Lua bible

2 SAMUELU 21

¹I aso ne tupu ei a Tavita, e isi se oge ne poko i te fenua, e tusa mo te tolu tausaga te leva. Ne talo Tavita ki te Aliki, “A Saulo mo tena kaiga e taia i te agasala ko te tatino me ne tamate ne ia a tino Kipeona.”

² A tino Kipeona e se ne tino Isalaelu; a latou ne tino Amoli kola ne fai feagaiga mo tino Isalaelu ke puipui latou ne tino Isalaelu, ka ko Saulo ne taumafai o tamate latou ona ko tena loto mō Iuta mo Isalaelu.

³Ne kalaga atu Tavita ki tino Kipeona, kae fai atu ki a latou penei, “Se a te mea e ma'nako ki ei koutou ke fai ne au mō koutou? Au e manako o fai se mea 'lei mō koutou, e sui ei te mea se 'lei tela ne fai ne Saulo ki a koutou, ko te mea foki ke fakamanuia ne koutou a tino o te Aliki.”

⁴Ne tali mai latou, “Te kinauga i te va o matou mo Saulo mo tena kaiga e se mafai o fakagata ki aulo mo siliva; a matou foki e se manako o tamate ne tino Isalaelu.” Ne fesili atu Tavita, “Se a la te mea e ma'nako koutou ke fai ne au mo koutou?”

⁵Ne tali mai latou, “Saulo ne manako o ta fakapalele matou, ke seai eiloa se tino o matou ke ola i Isalaelu.

⁶Tela la, aumai ne tagata e tokofitu mai te gafa o Saulo, ke noaua ne matou i mua o te Aliki i Kipea, te fa'kai o Saulo, te tupu ne filifilia ne te Aliki.” Ne tali mai te tupu, “Ko 'lei, e avatu eiloa ne au.”

⁷ Ne fakasao ne Tavita a Mefiposeta, te tama a Ionatana ona ko te feagaiga tapu a laua mo Ionatana tela ne fai.

⁸ Kae ne puke aka ne ia a Alimoni mo Mefiposeta, ko tama tagata a Saulo i a Lisepa, te tama fafine a Aia; ne puke aka foki ne ia e tokolima tama tagata a te tama fafine a Saulo ko Melapa kola ne fai i a Atilielu te tama tagata a Pasilai mai te fa'kai o Meola.

⁹Ne tuku ne Tavita a latou kona ki tino o te fa'kai ko Kipeona kola ne noaua ne latou i luga i te mauga i mua o te Aliki, tena, ne mate atu eiloa latou kona e tokofitu. A latou kona ne tamate i te taimi ko fakaotioti ei te tau o te muakiga, ka ko kalite ei ko fatoa kamata o kati.

¹⁰Ne fanatu te avaga fakasalasala a Saulo ko Lisepa, te tama fafine a Aia, o puke mai a lautaga o faite ki ei tena fakamalumalu i luga i te kaupapa tela ne tuku ki ei a foitino o tino kona ne mate, nofo eiloa a ia i kona mai te kamataga o te katiga o saito, ke oko eiloa ki te taimi ko kamata ei a vaiua o te tau vaiua. I te ao, e masani sale o afuli keatea ne ia a manu eva mai foitino 'mate kona, kae i te po ko nofo a ia o afuli keatea a manu o te vao.

¹¹I te logoga o Tavita i te mea a Lisepa tena ne fai,

¹² ne fanatu ei a ia o puke mai a ivi o Saulo mo tena tama ko Ionatana mai i tino o Iapese i Kileata. A ivi o laua kona ne kaisoa mai ne tino Iapese, mai i te malae o te malo i Peta Sana, te koga ne fakatautau ei ne tino Filisitia o la foitino i te aso ne tamate ei ne latou a Saulo i luga o te Mauga o Kilipoa.

¹³Ne puke ne Tavita a ivi o Saulo mo Ionatana pela foki mo ivi o te tokofitu kola ne noaua.

¹⁴Ne tanu ne latou a ivi o Saulo mo Ionatana i te tanuga o te tamana o Saulo ko Kiso, i Sela, i te kogā laukele o Peniamina, e pela eiloa mo te fakatonuga a te tupu. Oti aka, kae tali mai te Atua ki olotou talosaga mo te lotou fenua.

¹⁵E isi foki se taua ne toe fai i te va o Filisitia mo Isalaelu, tena ne olo atu ei a Tavita mo tena kau o taua mo te kau Filisitia. I te taimi e tasi ne fepaki ei latou, ko Tavita eiloa ko tai fita.

¹⁶E isi se mafi e igoa ki a Isipenopa tela e isi sena tao palasi e tusa mo te tolu mo te afa kilokalame te mafa, kae e isi foki sena pelu fou, ne manatu pela me ko mafai ne ia o tamate a Tavita.

¹⁷ Ka ko Apisai te tama a Seluia ne vau o fesoasoani ki a Tavita, tamate ei ne ia te mafi tena. Tena, ko te kau eiloa a Tavita ko fai ki a Tavita ke tauto atu ki a latou ke tapu eiloa a ia e toe vau i a latou ki se taua. Muna a latou, ‘A koe te fakamoemoega o Isalaelu, tela la, matou e se manako ke mate koe.”

¹⁸Mai tua ifo, ne taua foki tino Isalaelu mo tino Filisitia i Kopo; ko te taimi tena ne tamate ei ne Sipekai, te tagata Husa, a te mafi e igoa ki a Safo.

¹⁹E isi foki se taua a Isalaelu mo Filisitia i Kopo tela ne tamate ei ne Eleana, te tama tagata a Iaila[24] mai Peteleema, a Koliata mai i te fa'kai o Kata tela e isi sena tao e fula pela mo te fiti i luga i te mea 'laga laugatu.

²⁰E isi foki se taua a latou i Kata, kae e isi se mafi i kona tela ko ia eiloa ko fia taua sale. E taki ono ona matikao i ona lima takitasi, pela foki ona matikao vae.

²¹Ne manako a ia o fepaki ki se tagata Isalaelu, kae ne tamate fua ne Ionatana te tama tagata a te taina o Tavita ko Sama.

²²A te tokofa kona ko tino i te gafa o te mafi o Kata, kae ne tamate fua latou ne Tavita mo tena kau.