Read Te Tusi Tapu I Te Gana Tuvalu Lomiga Lua 2 SAMUELU 5 Bible Online

2 SAMUELU 5 - Te Tusi Tapu I Te Gana Tuvalu Lomiga Lua bible

2 SAMUELU 5

¹Ne o'mai a matakaiga katoa o Isalaelu ki a Tavita i Hepelona kae fai atu ki a ia penei, “A matou ko ou toto mo ou kano tonu.

²I aso ko teka, i aso koi tupu ei a Saulo, kae ne takitaki eiloa ne koe a tino Isalaelu i taua, ka ko te Aliki ne tauto atu ki a koe me ka takitaki ne koe tena fenua, kae fai foki koe mo olotou tupu.”

³Tena, ne olo atu ei a takitaki katoa o Isalaelu ki a Tavita i Hepelona. Ne fai te feagaiga fakataugasoa a Tavita mo latou, faū ei ne latou a Tavita ke fai mo tupu o Isalaelu,

⁴ A Tavita ne fai mo tupu ka ko tolusefulu ei ona tausaga, kae ne takitaki ne ia Isalaelu i tausaga e fasefulu.

⁵Ne fai a ia mo tupu i Iuta i tausaga e fitu mo te afa; ko te laumua o tena malo i te taimi tena ko Hepelona, tela e nofo ei a ia, kae e tolusefulu tolu tausaga ne tupu ei a ia i luga i Isalaelu katoa mo Iuta; ko te laumua o tena malo i te taimi tena ko Ielusalema, tela ne fanatu a ia o nofo i ei.

⁶ Ko oko mai te taimi ko olo atu ei te Tupu ko Tavita mo tena kau o taua ki Ielusalema. A tino Iepuse kona e nofo i kona, e mafaufau aka pela, me e se mafai ne Tavita o fakatakavale te fa'kai, tena ne fai atu ei latou ki a ia penei, “A koe e se mafai o to mai ki loto nei; e mafai fua ne tino kivi mo tino pili o teke atu koutou ke se 'to mai ki loto.”

⁷Kae ne iku eiloa ki te fakatakavale ne Tavita o te olo tena o Siona, tena ne fakaigoa ei ne tino ko te “Fa'kai o Tavita.”

⁸I te aso tena, ne fai atu Tavita ki tena kau penei, “E isi se tino i konei e takalialia malosi ki tino Iepuse penei mo au, tela ko fia tamate ki a latou? Olo atu la i loto i te alā vai o taua atu ki tino kivi kae pili kona.” Tena te mea e fai ei te pati tenei, “A tino kivi mo tino pili e se mafai o ulu atu ki loto i te fale o te Aliki.”

⁹I te otiga ne fakatakavale ne Tavita te fa'kai tena, nofo eiloa a ia i ei, kae fakaigoa ne ia ko te “Fa'kai o Tavita.” Ne faite ne ia te fa'kai i kona, e kamata mai te koga tela i te feitu ki te saegala o te koga maluga tena.

¹⁰Ne gasolo eiloa Tavita mo tena malo o malosi, me i te Aliki te Atua Malosi e fakatasi atu eiloa ki a ia.

¹¹Ne uga atu ne Hilamo, te Tupu o Tulo, ana tino ke olo mo mea togi ki a Tavita; ko lakau ko alasi mo kamuta, mo tufuga e galue i fatu, ke fakatu te palesi.

¹²Tena ne iloa ake ei ne Tavita i te Aliki ko fakamautū eiloa ne ia a ia ke fai mo tupu o Isalaelu, kae ko tuku mai foki ne ia te manuia ki tena malo ona ko tena fenua.

¹³I te tiakinaga ne Tavita a te fa'kai o Hepelona o nofo i Ielusalema, ne toe fai foki ne nisi avaga fakasalasala a ia, tena ne toe maua foki ne nisi tama tagata mo tama fafine a ia.

¹⁴Konei ana tamaliki ne fa'nau i Ielusalema: ko Samua, ko Sopapa, ko Natano, ko Solomona,

¹⁵ko Ipala, ko Elisua, ko Nefeku, ko Iafia,

¹⁶ko Elisaia, ko Eliata mo Elifeleti.

¹⁷I te 'logoga o te kau Filisitia i a Tavita ko fai mo tupu o Isalaelu, tena ne malaga atu ei te kautau a latou ke puke mai fakapagotā. I te logoga o Tavita i te mea tena, ko ia eiloa ko fanaifo ki te koga tela e fai tena olo.

¹⁸Ne oko mai a te kau Filisitia ki te Vanu o Lefaima, nofo ei i ei.

¹⁹Ne fesili atu Tavita ki te Aliki penei, “E a, e 'tau o taua au ki te kau Filisitia? Mata e aumai ne koe te manumalo ki a au?” Ne tali mai te Aliki, “Ao, fano o taua atu ki a latou, me e tuku atu eiloa ne au te manumalo!”

²⁰Tena, ne fanatu Tavita ki Paala Pelasima, fakatakavale ne ia i kona a te kau Filisitia. Muna a ia, “A te Aliki ne fakatakavale ne ia oku fili e pela me se lofiaga.” Tena ne fakaigoa ei te koga tena ko Paala Pelasima.[5]

²¹I te telega o te kau Filisitia, ne tiakina olotou tupua, kae ne ave ne Tavita mo tena kau.

²²Tena ne toe 'foki atu te kau Filisitia ki te Vanu o Lefaima, toe nofo foki i kona.

²³Ne toe fesili atu Tavita ki te Aliki, kae tali mai te Aliki, “Sa taua atu ki a latou mai i konei, kae olo aka pela i te sua feitu o fakatoka o taua mai ki a latou, i tafa o lakau ko palasama.

²⁴Kafai ko lagona ne koe pela me ne tino e solo i luga i taulu o lakau kona, ko koe eiloa ko taua atu, me i a au tenei ko fano i otou mua o fakatakavale te kautau a Filisitia.”

²⁵Ne fai eiloa ne Tavita te fakatonuga a te Aliki, tena ne mafai ei ne ia o afuli a te kau Filisitia mai Kepa ke oko eiloa ki Kesela.