Read Te Tusi Tapu I Te Gana Tuvalu Lomiga Lua 2 SAMUELU 7 Bible Online

2 SAMUELU 7 - Te Tusi Tapu I Te Gana Tuvalu Lomiga Lua bible

2 SAMUELU 7

¹Ne nofo te Tupu ko Tavita i tena palesi, kae ne tausi eiloa a ia ne te Aliki ke sao mai ona fili katoa.

²Ne fai atu te tupu ki te pelofeta ko Natano penei, “Kilo mai i a au tenei e nofo i te palesi ne faite ki laupapa o alasi, ka ko te Pusa o te Feagaiga a te Atua e tausi fua i te faleie!”

³Ne tali atu Natano, “Fai te mea e mafaufau koe o fai, me i te Aliki e fakatasi atu ki a koe.”

⁴Kae i te afiafi tena, ne faipati atu te Aliki ki a Natano penei,

⁵“Fano o fai ki taku tavini ko Tavita a pati a aku konei ki a ia, ‘E se ko koe te tino ka faite te faletapu mo oku nofo.

⁶Mai te taimi ne fakasao ei ne au a tino Isalaelu mai Aikupito, au seki nofo eiloa i se faletapu; au ne malaga sale eiloa kae nofo eiloa i te faleie.

⁷I taimi ne ma'laga sale ei matou mo tino Isalaelu, au seki muimui eiloa ki takitaki[12] o Isalaelu me ai a seki faite ei ne latou se faletapu mo oku ki lakau ko alasi.’

⁸“Fai ki taku tavini ko Tavita, me i a au, te Aliki Malosi, e faipati atu ki a ia penei, ‘Ne aumai ne au koe mai tau galuega ko te tausi mamoe, o fai koe mo tupu o toku fenua ko Isalaelu.

⁹Au ne fakatasi atu faeloa ki a koe i so se koga ne fano koe ki ei, kae ne fakatakavale sale foki ne au ou fili. Ka fai ne au a koe ke takutakua e pela eiloa mo te takutakua o takitaki tafasili eiloa i te lalolagi.

¹⁰Ko oti ne fili ne au te koga mo 'nofo tino Isalaelu, kae ko oti nei ne fakanofo ne au latou i kona, te koga ka nofo ei latou e se toe fakapuapuaga ne nisi malo. Talu mai te taimi ne ulu mai ei latou ki loto i te fenua tenei, ne taua sale atu ki a latou a tino fakasaua i konei, kae nei ka se toe tupu se mea pena. Au e tauto o tausi koe mai ou fili, kae fakatokouke a tino i tou gafa.

¹² Kafai ko mate a koe kae ko tanu fakatasi atu foki koe mo ou tupuga, kae ka fai ne au se tama tagata mai au tama ta'gata ke fai mo tupu, kae ka tausi foki ne au tena malo ke malosi.

¹³Ko ia tena ka faite ne ia se faletapu mo oku, kae ka onoono faka'lei eiloa au ke tumau faeloa te fakasologa o tupu mai i tino o tena gafa.

¹⁴ Ka fai au mo tamana ki a ia, ka ko ia ka fai mo aku tama. Kafai e isi sena mea 'se e fai, e fakasala eiloa ne au a ia, e pela mo te tamana e fakasala tena tama.

¹⁵E se mafai au o fano keatea mai i a ia e pela mo te mea ne fai ne au ki a Saulo, tela ne ave keatea ne au ke fai koe mo tupu.

¹⁶ A tou gafa ka ola faeloa, ka ko tou malo ka fai ne au ke tumau ki te se gata mai. A te fakasologa o tupu ka tumau eiloa i tou gafa.”’

¹⁷Tena, ne fakaasi katoa eiloa ne Natano ki a Tavita a mea katoa kola ne fai atu ne te Atua ki a ia.

¹⁸Tena, ne fanatu te Tupu ko Tavita ki loto i te Faleie o te Aliki, sagasaga ki lalo kae 'talo penei, “Te Aliki Maluga, a mea ko oti ne fai ne koe mō oku, ko to 'lei katoa, i a au nei se tagata fua e seai se aoga pela foki toku kaiga.

¹⁹Kae nei, te Aliki Maluga, ko toe fai mai foki ne koe a nisi mea lei mo oku; ne tauto koe e uiga mō toku gafa i tausaga mai mua. Te Aliki Maluga, kae ne talia foki ne koe ke lavea ne tino a mea kona![13]

²⁰Ne a foki aku pati ka fai atu ki a koe! E iloa 'lei eiloa ne koe a au, tau tavini.

²¹Ko tou loto eiloa mo tou fakamoemoega ke fai te mea tenei; ko oti ne fai ne koe a mea tafasili konei, ko te mea ke akoako ei au.

²²Te Aliki Maluga, ko se fakatau mai eiloa tou sili mo tou maluga! E seai eiloa se tino e pau mo koe; ko oti ne iloa sale eiloa ne matou me ko koe fua tokotasi ko te Atua.

²³ E seai aka foki se malo i te lalolagi e pau mo Isalaelu, tela ne fakasao ne koe mai te fakapologa kae ke fai mo fenua tonu o koe. A mea gali mo mea fakaofoofogia ne fai ne koe mō latou [14] takutakua i te lalolagi katoa. Ne afuli ne koe ki tua[15]a nisi malo mo olotou atua i mua o tou fenua, ko tino ne fakasao ne koe mai Aikupito ke fai mo ou tino tonu.

²⁴Te Aliki, ko oti ne fai ne koe Isalaelu mo ou fenua tonu ki te se gata mai, kae ko fai foki koe mo Atua o latou.

²⁵“Kae nei, te Aliki te Atua, fakataunu tau tautoga ne fai e uiga ki a au mo toku gafa, kae fai te mea ne mafaufau koe o fai.

²⁶A koe ka tafasili i te takutakua, ka ko tino ka faipati faeloa penei, ‘A te Aliki Malosi, ko te Atua o Isalaelu.’ Kae ka tausi faeloa ne koe ke tumau te fakasologa o tupu i toku gafa.

²⁷Te Aliki Maluga, te Atua o Isalaelu! Ko malosi toku loto o talo atu ki a koe penei, me ne fakaasi mai ne koe a mea katoa kona ki a au, tau tavini, kae ne fai mai foki koe me ka fili faeloa ne koe a tupu mai tino o toku gafa.

²⁸“Kae nei, te Aliki Maluga, a koe ko te Atua; e tausi faeloa ne koe au tautoga e fai, kae nei, ko oti ne fai ne koe se tautoga gali ki a au.

²⁹Au e fakamolemole atu ki a koe ke fakamanuia mai toku gafa, ko te mea ke tumau faeloa tou fiafia ki a latou. Te Aliki Maluga, ko oti ne tauto mai ne koe te mea tenei, ka ko tau fakamanuiaga ka tumau i luga i tino o toku gafa ki te se gata mai.”