Read Te Tusi Tapu I Te Gana Tuvalu Lomiga Lua 1 TUPU 15 Bible Online

1 TUPU 15 - Te Tusi Tapu I Te Gana Tuvalu Lomiga Lua bible

1 TUPU 15

¹I te sefuluvalu o tausaga o te nofoaiga a te Tupu o Isalaelu ko Ielopoamo, ne fai ei Avia mo tupu o Iuta,

²kae e tusa mo te tolu tausaga ne fai ei a ia mo tupu i Ielusalema. A tena matua ko Maaka, te tama fafine a Apisaloma.

³Ne fai ne ia te agasala tela ne fai foki ne tena tamana, kae e se katoatoa tena fakamaoni ki te Aliki tena Atua, e pela mo tena tupuga ko Tavita ne fakamaoni eiloa ki te Aliki.

⁴ E pela mo tena alofa ki a Tavita, ne tuku mai ei ne te Aliki tena Atua, se tama tagata ki a Avia ke fai mo tupu i Ielusalema i ona tua, kae ke tausi fakalei Ielusalema ke saogalemu.

⁵ Ne fai ne te Aliki te mea tena me i a Tavita ne fai ne ia a mea e fiafia ki ei a ia, kae e seki teke foki eiloa ki ana fakatonuga, na ko te mea fua tela ne tupu i a ia mo te avaga a te tagata Heti e igoa ki a Ulia.

⁶ A Avia mo Ielopoamo e faitaua faeloa i aso o te nofoaiga a Avia.

⁷A nisi tala e uiga ki a Avia e fakamau katoa i te tusi ko Te Tala Tukufakasolo o Tupu o Iuta.

⁸Ne mate atu Avia, kae ne tanu i te Fa'kai o Tavita, kae ne sui a ia ne tena tama tagata ko Asa.

⁹I te luasefulu o tausaga o te nofoaiga a Ielopoamo i Isalaelu, ne fai ei a Asa mo tupu o Iuta kae ne fai a ia mo tupu i Ielusalema i tausaga e fasefulu tasi.

¹⁰A tena tupuna fafine, ko Maaka, te tama fafine a Apisaloma.

¹¹A Asa ne fakafiafia ne ia te Aliki i ana mea ne fai, e pela eiloa mo tena tupuga ko Tavita.

¹²Ne afuli ne ia keatea mai te fenua a tagata tali fafine mo fafine tali tagata katoa kola e tavini i koga tapuaki fapau'pau, kae ne ave keatea foki ne ia a tupua kola ne faite ne tupu i ona mua.

¹³Ne ave keatea foki ne ia tena tupuna fafine ko Maaka mai tena tulaga ko te tupu fafine, me ne faite ne ia se fakatusa tupua o te atua fafine ko Asaila. Ne ofa ne Asa te tupua tena kae ave o sunu i te vanu o Kitilona.

¹⁴E ui eiloa e seki fakamasei ne Asa a koga tapuaki fapaupau katoa, ka ko ia ne tumau eiloa tena fakamaoni ki te Aliki i tena olaga kātoa.

¹⁵Ne tuku ne ia i te Faletapu a mea katoa kola ko oti ne fakatapu ne tena tamana mō te Atua, e pela foki mo aulo mo siliva kola ne fakatapu eiloa ne ia.

¹⁶A te Tupu o Iuta ko Asa mo te Tupu o Isalaelu ko Paasa, e taua faeloa i aso kona ne fai ei laua mo tupu o malo kona.

¹⁷A Paasa ne taua atu ki Iuta, kae ne toe faite ne ia a te fa'kai o Lama ko te mea ke pono ei a auala ki loto mo auala ki tua mai i Iuta.

¹⁸Tena ne puke aka ei ne Asa a siliva mo aulo katoa i loto i te Faletapu mo te palesi, kae tuku ne ia ki ana ofisa ke olo o ave ki Tamaseko, ki te Tupu o Sulia ko Peniata, te tama tagata a Tapilimoni, kae ko te mokopuna o Hesioni, mo te fekau tenei:

¹⁹“E talia ne koe ke taugasoa taua, e pela mo ta tamana. A siliva mo aulo kona, ko taku meaalofa ki a koe. Fakagata tou va fakataugasoa mo te Tupu ko Paasa o Isalaelu, ko te mea ke na olo keatea tena kautau mai i toku laukele.”

²⁰Ne talia ne te Tupu ko Peniata te manako o Asa, tena ne uga atu ei ne ia ana ofisa mo olotou kautau ke olo o taua ki fa'kai o Isalaelu. Ne fakatakavale ne latou a kogā koga konei: ko Itioni, ko Tanu, ko Apelu Peta Maaka, ko te laukele i tafa o te Vai o Kalilaia, mo te kogā laukele katoa o Nafatali.

²¹I te logoga o te Tupu ko Paasa i te mea ko tupu, ne fakagata ei tena galuega ki te faitega o te olo o Lama, kae fanatu ei ki Tilesa.

²²Tena, ne fakasalalau atu ei te fakatonuga a te Tupu ko Asa i luga i Iuta kātoa ki tino katoa ke olo o tali keatea mai i Lama a fatu mo laupapa kola ne fakaaoga ne Paasa mo faite te olo o Lama. Ne fakaaoga ne Asa a mea kona o faite ei a olo o te fa'kai o Mesepa mo Kepa, se fa'kai i te kogā laukele o Peniamina.

²³A nisi mea aka katoa a te Tupu ko Asa ne fai, pela mo mea a ia ne fai e iloga ei tena loto toa, mo fa'kai ne fai ne ia olotou olo, e fakamau katoa i te tusi ko Te Tala Tukufakasolo o Tupu o Iuta. I te taimi ko toeaina ei a ia, ne maua ei a ia ne te masaki ko te 'pili.

²⁴Ne mate atu Asa kae ne tanu i te tānuga fakatupu i te Fa'kai o Tavita. Ko tena tama tagata ko Iosefatu ne sui tulaga i a ia.

²⁵I te lua o tausaga o te nofoaiga a Asa i Iuta, ne fai ei te tama tagata a Ielopoamo ko Natapu mo tupu o Isalaelu, kae e tusa fua mo te lua tausaga ne tupu ei a ia.

²⁶A ia tena ne agasala ki te Aliki kae 'taki foki ne ia te fenua ki te agasala, e pela eiloa mo tena tamana.

²⁷A Paasa, te tama tagata a Aita, mai te matakaiga o Isakala ne lamalama ne ia Natapu, tena ne tamate eiloa ne ia i te taimi ne taumafai ei Natapu o puke a te fa'kai o Kipetoni i Filisitia.

²⁸A te mea tena ne tupu i te tolu o tausaga o te nofoaiga a Asa, te tupu o Iuta. Tena, ne fai ei a Paasa mo tupu o Isalaelu o sui a Natapu.

²⁹ Tena, kamata eiloa a ia o tamate a tino i te kaiga o Ielopoamo. E pela eiloa mo muna a te Aliki kola ne folafola mai ne tena tavini ko Aita, te pelofeta mai Sailo, ne mate katoa eiloa a tino i te kaiga o Ielopoamo, e seai eiloa se tino ne sao.

³⁰Ne tupu eiloa te mea tena me i te Aliki ko kaitaua i uiga se 'lei o Ielopoamo, pela foki mo te takiga ne ia o te fenua ke agasala.

³¹A nisi tala aka o Natapu e fakamau katoa i te tusi ko Te Tala Tukufakasolo o Tupu o Isalaelu.

³²A te Tupu o Iuta ko Asa mo te Tupu o Isalaelu ko Paasa e tumau faeloa te taua sale i aso ne pule ei laua.

³³I te tolu o tausaga o te nofoaiga a Asa, te Tupu o Iuta, ne fai ei Paasa, te tama tagata a Aita, mo tupu o Isalaelu katoa, kae ne tupu a ia i Tilesa i tausaga e luasefulu fa.

³⁴A ia ne agasala ki te Aliki kae taki foki ne ia a te fenua ki te agasala, e pela eiloa mo te tupu ko Ielopoamo.